Bakıda iqtisadiyyat və idarəetmə ixtisasları üzrə magistrlərin I beynəlxalq elmi konfransı keçirilir

Bakı:

30 °C

54 %

12 m/s

AZ RU EN

Ana səhifə / Sosial / Bakıda iqtisadiyyat və idarəetmə ixtisasları üzrə magistrlərin I beynəlxalq elmi konfransı keçirilir

Bakıda iqtisadiyyat və idarəetmə ixtisasları üzrə magistrlərin I beynəlxalq elmi konfransı keçirilir

01.06.2019 [10:10]

Mayın 31-də Bakıda iqtisadiyyat və idarəetmə ixtisasları üzrə magistrlərin I beynəlxalq elmi konfransı öz işinə başlayıb.
AZƏRTAC xəbər verir ki, konfrans Azərbaycan Dövlət İqtisad Universitetinin (UNEC) Beynəlxalq Magistratura və Doktorantura Mərkəzinin təşkilatçılığı və ICLEL-in (International Conference on Lifelong Education and Leadership) dəstəyi ilə reallaşıb.
Tədbirdə çıxış edən rektor Ədalət Muradov UNEC-in elmi tədqiqatyönümlü universitetə çevrilməsi istiqamətində görülən işlərdən danışıb. Professor Ədalət Muradov müəllimlərin “Web of Science”da çap olunan məqalələrinin 76 faizinin məhz son 4 ilin payına düşdüyünü bildirib. Rektor UNEC-də iqtisadiyyat elminin aktual problemlərini araşdıran 26 tədqiqat mərkəzinin yaradıldığını, həmin mərkəzdə aparılan tədqiqatın nəticələrinin məşhur “Şpringer” nəşriyyatında çap olunduğunu vurğulayıb. Rektor magistr və tələbələrin elmi fəaliyyətlərinin stimullaşdırılması məqsədilə UNEC-də mükafatlandırma sisteminin yaradılmasından söz açıb. Bildirib ki, impakt dərəcəsindən asılı olaraq nüfuzlu jurnallarda çap olunan hər bir məqaləyə görə UNEC-in bakalavr və magistrləri 4000 manatadək mükafat əldə edə bilirlər. UNEC-in ikili diplom proqramlarından danışan rektor qeyd edib ki, yeni tədris ilindən UNEC-in ABŞ-ın Linkoln Universiteti ilə magistratura pilləsi üzrə ikili diplomu reallaşdırılacaq.
Tədbirdə təhsil naziri Ceyhun Bayramov bildirib ki, bilik iqtisadiyyatı dövründə hərtərəfli inkişafın təmin ediməsində elm və təhsilin rolu artmaqdadır. Yeni biliklər, tətbiq edilən texnologiyalar və onların nəticələri iqtisadiyyatın dayanıqlı inkişafını təmin etməkdə mühüm amillərdir. Rəqabətin kəskinləşdiyi və qloballaşdığı bir şəraitdə insan kapitalının inkişafının, innovasiyaya əsaslanan ekosistemin qurulmasının zəruriliyini anlayan ali təhsil müəssisələri və elmi-tədqiqat institutları yeni təşəbbüslər, innovativ yanaşmalarla seçilməyə çalışdı və bununla da öz sahələrinin prioritet istiqamətlərini elan etdilər. Danılmaz faktdır ki, iqtisadiyyatın inkişafında ali təhsilin rolu xüsusi önəm kəsb edir. “Azərbaycan Respublikasında təhsilin inkişafı üzrə Dövlət Strategiyası”nın hədəflərinə uyğun olaraq son 6 ildə ali təhsil müəssisələrinə qəbul olan tələbələrin sayında 20,8 faiz artım müşahidə edilib, 2018-ci ildə 41 mindən çox şəxs tələbə adını qazanıb. Azərbaycan vətəndaşlarının ali təhsilə çıxış imkanlarının genişləndirilməsi dövlət siyasətində prioritet istiqamətlərdən biridir. Ali məktəblərdə 2019-2020-ci tədris ili üçün dövlət sifarişli yerlərin sayı 66 faiz təşkil edir. Hazırda magistratura səviyyəsində qəbul dinamikası müşahidə olunur.
UNEC-in Beynəlxalq Magistratura və Doktorantura Mərkəzinin (BMDM) direktoru, dosent Fariz Əhmədov rəhbərlik etdiyi qurumun fəaliyyətindən danışıb. Bildirib ki, BMDM-də 11 ixtisas və 39 ixtisaslaşma üzrə 4 dildə tədris aparılır. Mərkəzdə 1200-dək yerli və əcnəbi magistr təhsil alır. UNEC-in magistrlərinin 4 məqaləsi “Web of Science”də indeksləşmiş jurnallarda dərc olunub. Konfransa yerli və əcnəbi magistrlər tərəfindən 385 məqalə tədim edilib.
Plenar iclasda UNEC magistrləri 4 dildə təqdimatla çıxış ediblər.
Sonda təhsil naziri Ceyhun Bayramov magistrlərə sertifikatları təqdim edib.
İyunun 2-dək davam edəcək konfransda iqtisadiyyat və idarəetmə ixtisaslarında təhsil alan həm yerli, həm də xarici ölkələrdən olan gənclər bir araya gələrək, magistr tədqiqatlarının nəticələrinin paylaşılması, elmi araşdırmaların keyfiyyətinin artırılması istiqamətində fikir mübadiləsi aparacaqlar.

Paylaş:

Baxılıb: 664 dəfə