Dövlətin göstərdiyi diqqət və qayğı sayəsində təhsildə yüksək uğura nail olan gənclərin sayı artır

Bakı:

14 °C

88 %

3 m/s

AZ RU EN

Ana səhifə / Sosial / Dövlətin göstərdiyi diqqət və qayğı sayəsində təhsildə yüksək uğura nail olan gənclərin sayı artır

Dövlətin göstərdiyi diqqət və qayğı sayəsində təhsildə yüksək uğura nail olan gənclərin sayı artır

16.08.2019 [09:26]

Toğrul Hacızadə: Bundan sonra məqsədim bilik səviyyəmi yüksəltmək və xaricdə təhsilimi davam etdirməkdir
Xəbər verildiyi kimi, Dövlət İmtahan Mərkəzi (DİM) 2019/2020-ci tədris ili üçün Azərbaycan Respublikasının ali təhsil müəssisələrinə yerləşdirmənin nəticələrini elan edib. Dövlət İmtahan Mərkəzindən qəzetimizə verilən məlumata görə, ali təhsil müəssisələrinin müsabiqəsində 58258 nəfər iştirak edib. Bunlardan 42062 nəfəri (o cümlədən 3542 subbakalavr) ali təhsil müəssisələrinə qəbul olunub ki, onlardan da 17820 nəfər (o cümlədən 586 subbakalavr) dövlət sifarişi əsasında, 24242 nəfər (o cümlədən 2956 subbakalavr) isə ödənişli əsaslarla təhsil almaq hüququ əldə edib.
Beləliklə, ənənəyə sadiq qalaraq, bu il də yüksək bal toplayan abituriyentləri oxucularımızla tanış edirik. DİM tərəfindən respublikanın ali məktəblərinə keçirilən qəbul imtahanlarında yüksək bal toplayan abituriyentlərdən biri də akademik Zərifə Əliyeva adına Liseyin məzunu Toğrul Hacızadədir. Məlumat üçün bildirək ki, Toğrul liseyi qızıl medalla bitirib. Ali təhsil müəssisələrinə qəbul imtahanlarındakı nəticəsi isə nəinki məktəb üzrə, bütövlükdə ölkə üzrə seçilir. Belə ki, o, 11-ci sinif buraxılışında 295, yaz qəbul imtahanında 397 bal toplayıb. Ümumilikdə, 692 bal toplayaraq II ixtisas qrupu üzrə respublika birincisi olub. Bundan başqa, Coğrafiya fənni üzrə iki dəfə respublika fənn olimpiadalarında gümüş medal qazanıb. Həmçinin “Əlaçı” və “Mən azərbaycanlıyam” intellektual telelayihələrinin qalibi olub. Azərbaycan Dövlət İqtisad Universitetinin Maliyyə ixtisası fakültəsinə qəbul olsa da, bakalavr təhsilini ingilis dilində Türkiyənin Orta Doğu Texniki Universitetində davam etdirəcək.
Qazandığı böyük uğurun sevincini yaşayan Toğrul təəssüratlarını “Yeni Azərbaycan” qəzetinin əməkdaşı ilə bölüşüb. Onun sözlərinə görə, daim dərslərinə məsuliyyətlə yanaşıb, ciddi hazırlaşıb və yüksək nəticəyə nail olub. Həmsöhbətimiz bütün uğurlarına görə ona mənəvi dəstək olan valideynlərinə və elmin, təhsilin sirlərini öyrədən müəllimlərinə minnətdarlığını bildirib.
Bütün fənlərə eyni dərəcədə maraq göstərdiyini deyən gənc, eyni zamanda, boş vaxtlarında kitab oxumağı, film izləməyi və üzgüçülüklə məğul olmağı sevdiyini söyləyir: “Ailəmiz 4 nəfərdən ibarətdir. Atam neft şirkətində mühəndis, anam riyaziyyat müəllimi, qardaşım isə Fizika, riyaziyyat və informatika təmayüllü liseyin 9-cu sinif şagirdidir. İqtisadiyyat ixtisasını özüm seçdim. Düzü, ailəm həmişə həkim olmağımı istəyib. Lakin özümü bu sahədə görmürdüm. İqtisadçı olmaq istədiyimi bildirəndə valideynlərim seçimimə dəstək verdi. Bundan sonra məqsədim ali məktəbdə yaxşı təhsil almaq, bilik səviyyəmi yüksəltmək və xaricdə təhsilimi davam etdirməkdir”.
Toğrul deyib ki, hansı ölkədə təhsil almasından, yaxud karyerasını qurmasından asılı olmayaraq, hər zaman ölkəmizə töhfə vermək haqqında düşünəcək.
Həmsöhbətimiz onu da bildirib ki, dövlətin təhsilə göstərdiyi diqqət və qayğı sayəsində təhsildə yüksək uğura nail olan gənclərin sayı artır.
Müşfiqə BAYRAMLI

Paylaş:

Baxılıb: 687 dəfə