Birinci vitse-prezident Mehriban Əliyevanın təşəbbüsü ilə hərbi qulluqçularımız üçün dəstək aksiyası davam etdirilir

Bakı:

23 °C

73 %

2 m/s

AZ RU EN

Ana səhifə / Sosial / Birinci vitse-prezident Mehriban Əliyevanın təşəbbüsü ilə hərbi qulluqçularımız üçün dəstək aksiyası davam etdirilir

Birinci vitse-prezident Mehriban Əliyevanın təşəbbüsü ilə hərbi qulluqçularımız üçün dəstək aksiyası davam etdirilir

30.12.2020 [09:24]

İşğaldan azad olunan ərazilərimizdə Vətənin keşiyini çəkən hərbi qulluqçularımıza dəstək aksiyası davam edir.
AZƏRTAC xəbər verir ki, Birinci vitse-prezident Mehriban Əliyevanın təşəbbüsü ilə Heydər Əliyev Fondu və “Bravo” supermarketlər şəbəkəsi tərəfindən reallaşan aksiyanın növbəti ünvanı Xocavənd rayonunun Hadrut qəsəbəsi olub.
Dekabrın 29-da səhər Hadruta doğru yola düşdük. Yolboyu şanlı Azərbaycan Ordusunun yağı düşməndən geri aldığı torpaqlarımızı gördükcə bir daha qürur duyduq. Ətrafa səpələnmiş erməni hərbi texnikaları düşmənin necə ağır məğlubiyyətə uğradığını əks etdirirdi. 1992-ci ilin oktyabrında işğal olunan bu ərazilər qəhrəman Azərbaycan əsgərinin şücaəti nəticəsində 28 ildən sonra öz sahiblərinə qayıtdı.
Hadruta çatırıq. Bizi əsgərlərimiz qarşılayır. “Bravo” supermarketlər şəbəkəsinin nümayəndələri gətirdikləri bağlamaları hərbi qulluqçularımıza paylayır və onların istəklərini qeydə alırlar.
Həmsöhbəti olduğumuz qəhrəmanlarımızdan onların keçdiyi şərəfli döyüş yolları barədə məlumat aldıq. Bir daha şahid olduq ki, Azərbaycan əsgəri şanlı tarix yazaraq işğaldan azad etdiyi Vətən torpaqlarında xidmətini qələbə əhval-ruhiyyəsi ilə yerinə yetirir.
Hadrutun azad olunmasında iştirak edən və 3 fərqli medalla təltif edilən kiçik çavuş Mehdizadə Vətənin keşiyində ayıq-sayıq dayandıqlarını bildirib: “Düşməni Hadrutdan qovub çıxardıq. Bu torpaqlara ilk ayaq basan Azərbaycan hərbçilərindən biri də mənəm. Bu Qələbə müzəffər Ali Baş Komandanımızın dəmir yumruğu, xalq-ordu birliyi nəticəsində bizlərə qismət oldu. Həsrətində olduğumuz bu torpaqlarda xidmət etmək bizim üçün qürur və şərəfdir”.
Uzun illərdir torpaqlarımızın işğaldan azad edilməsi arzusu ilə yaşayanlardan biri də Vətən müharibəsinin iştirakçısı olan mayor Mustafayevdir. “Azərbaycanın şanlı Ordusu düşmənə elə bir zərbə endirdi ki, onlar bu məğlubiyyətin təsirindən çətin çıxsınlar. Döyüşlər zamanı hərbçilərimizin ruh yüksəkliyi necə idisə, bu gün də o ruh yüksəkliyi ilə Vətənin keşiyində dayanmışıq. Bütün hərbçilərin əhval-ruhiyyəsi, mənəvi-psixoloji vəziyyəti yüksək səviyyədədir, təminatımız da öz qaydasındadır. Həm dövlət, həm də xalqımız tərəfindən daim mənəvi və maddi qayğını hiss edirik”, - deyə o vurğulayıb.
Baş leytenant Abbasov qalib ordunun qalib zabiti olmaqdan şərəf duyduğunu söyləyib. O deyib ki, Azərbaycan Ordusu nəinki Ermənistana, bütün dünyaya necə güclü olduğunu göstərdi: “Düşmənin başını elə əzdik ki, bu müharibə hələ uzun illər yaddan çıxarmayacaq. Ali Baş Komandanımızın rəhbərliyi ilə xalqımızın tarixinə Şanlı Qələbə yazdıq. Şəhidlərimizin ruhları indi rahatdır, onların qisası alındı, torpaqlarımız azad olundu”.
Baş əsgər Quliyev də qalib ordu sıralarında olduğu üçün özünü xoşbəxt sanır. Vaxtilə bu yerlərin şəkillərinə həsrətlə baxdığını, indi isə həmin torpaqlarda fəxrlə xidmət etdiyini söyləyir.
Tibb xidməti rəisi, baş leytenant Qiyaslı əsgərlərimizin əhval-ruhiyyəsinin yüksək səviyyədə olduğunu bildirərək, döyüşlərin ilk günlərindən arxa cəbhənin dəstəyini hiss etdiklərini və bunun onlara əlavə güc verdiyini vurğulayıb.
Beləliklə, Birinci vitse-prezident Mehriban Əliyevanın təşəbbüsü ilə Heydər Əliyev Fondu və “Bravo” supermarketlər şəbəkəsi tərəfindən reallaşan aksiya Hadrutda da təşkil olundu.
Bir daha şahid olduq ki, Azərbaycan əsgəri qəhrəmanlıq və şücaət göstərərək işğaldan azad etdiyi Vətən torpaqlarında xidmətini qələbə əhval-ruhiyyəsi ilə aparır. İşğaldan azad olunan ərazilərdə yerləşən qoşunlarımızın təminatı isə yüksək səviyyədədir.

Paylaş:

Baxılıb: 727 dəfə