“Peyvənd olunan şəxslərin sayının artması xəstəliyin ağır keçməsinin və geniş yayılmasının qarşısını alacaq”

Bakı:

23 °C

73 %

9 m/s

AZ RU EN

Ana səhifə / Sosial / “Peyvənd olunan şəxslərin sayının artması xəstəliyin ağır keçməsinin və geniş yayılmasının qarşısını alacaq”

“Peyvənd olunan şəxslərin sayının artması xəstəliyin ağır keçməsinin və geniş yayılmasının qarşısını alacaq”

17.04.2021 [08:53]

Məlum olduğu kimi, Azərbaycan COVID-19 pandemiyasına qarşı mübarizə tədbirlərini uğurla təşkil edən ölkələr sırasındadır. Əhalinin peyvənd olunması prosesi də kifayət qədər effektiv təşkil olunub. Yeri gəlmişkən, TƏBİB bu məsələdə əsas hədəfin ölkəmizdə əhalinin 80 faizinin vaksinasiya edilməsindən ibarət olduğunu bəyan edib.

Məsələ ilə bağlı qəzetimizə açıqlama verən həkim-infeksionist Aytən Babayeva vaksinasiya prosesinin COVID-19-a qarşı effektiv mübarizə üsulu olduğunu deyib. O bildirib ki, vaksinasiyaya könüllü qoşulanların sayı getdikcə artır: “Ölkəmizdə vaksinasiya tədbirləri davam edir. Peyvənd olunan şəxslərin sayının artması xəstəliyin ağır keçməsinin və geniş yayılmasının qarşısının alınmasında mühüm rol oynayacaq”.

Mütəxəssis vətəndaşların peyvəndin zəruriliyini düzgün qiymətləndirməsinin də vacib olduğunu diqqətə çatdırıb. O qeyd edib ki, yoluxucu xəstəliklərlə mübarizənin ən təsirli yolu məhz peyvəndlərin tətbiq olunmasıdır. Buna görə də hər kəs bu prosesə məsuliyyətlə yanaşmalı, peyvənd olunmaqdan çəkinməməlidir: “Qeyd etdiyim kimi, koronavirusdan qurtulmağın yeganə yolu məhz vaksinasiyadır. Mən və ailə üzvlərim vaksinin hər iki dozasını vurdurmuşuq və səhhətimizdə heç bir problem yoxdur. Kollektiv immunitetin yaranması, məhdudlaşdırıcı tədbirlərin tətbiq olunmaması üçün əhalinin peyvənd olunması olduqca vacibdir”.

Həkim-infeksionistin sözlərinə görə, “gözəgörünməz düşmən”lə mübarizədə hər kəs birlik nümayiş etdirməlidir: “Ona görə də vətəndaşları vaksinasiyada aktiv iştirak etməyə və üç qızıl qaydaya - tibbi maska istifadəsinə, sosial məsafə saxlanılmasına, gigiyena qaydalarına əməl edilməsinə səsləyirəm. Qoruyucu maskadan dəfələrlə istifadə etmək, onu çantada, cibdə gəzdirmək və yenidən istifadə etmək yoluxma riskini artırır. Belə ki, bu zaman tibbi maskanın xarici səthinə əlimizi vururuq, əlimizi üzümüzə, hansısa səthlərə toxundururuq. Nəticədə, həm özümüz yoluxa bilərik, həm də toxunduğumuz səthlərə kimsə əli ilə təmas etdikdə onlar da yoluxa bilərlər. Bununla yanaşı, əl və respirator gigiyena qaydalarına da əməl olunmalıdır. Asqırarkən, öskürərkən ağzımızı dirsək bükümü ilə örtməliyik və ya birdəfəlik salfetlərdən istifadə etməliyik ki, virusu yaymayaq. Bunlar hamısı qoruyucu tədbirlərdir”.

Həkim xüsusilə müqəddəs Ramazan ayında insanları daha da diqqətli olmağa və kollektiv toplaşmamağa səsləyir: “Ötən il də Ramazan ayı pandemiya dövrünə təsadüf etmişdi. Pandemiya dövründə, təbii ki, hər bir insan xəstəliklə mübarizə aparır. Hamı bir nəfər kimi xəstəlikdən qorunmaq üçün əlindən gələni etməlidir. Əslində, pandemiyaya görə təkcə Azərbaycanda deyil, bütün müsəlman ölkələrində həmin ayın özünəməxsus ayinlərinin evlərdə təşkili daha məqsədəuyğun hesab edilir”.

“Koronavirusun dünyada geniş tüğyan etdiyi indiki şəraitdə kütləvi mərasimlər təşkil etmək, eləcə də toy və yas mərasimlərində toplaşmaq həm özümüz, həm də cəmiyyətimiz üçün təhlükəlidir. Bildiyiniz kimi, koronavirusla mübarizədə ciddi təhdid yaratdığına görə kütləvi tədbirlərin, o cümlədən yas və toy mərasimlərinin keçirilməsinə qadağalar qoyulub. Virusun geniş yayılmaması üçün, o cümlədən xalqımızın sağlamlığı naminə kütləvi toplaşmaq olmaz. Hər kəs təkcə özünün deyil, başqalarının da sağlamlığının qorunmasına çalışmalıdır. Xəstəlik ehtimalı olan yerlərdən uzaq durmaqla özümüzü də, digər insanları da qorumuş olarıq”, - deyə A.Babayeva söyləyib.

MÜŞFİQƏ

Paylaş:

Baxılıb: 843 dəfə