Nurəddin Məmmədli sosial şəbəkələrdə Azərbaycan dövlətinə qarşı çirkin təbliğat aparır

Bakı:

19 °C

88 %

0 m/s

Əlaqə

AZ RU EN

Ana səhifə / Sosial / Nurəddin Məmmədli sosial şəbəkələrdə Azərbaycan dövlətinə qarşı çirkin təbliğat aparır

Nurəddin Məmmədli sosial şəbəkələrdə Azərbaycan dövlətinə qarşı çirkin təbliğat aparır

18.07.2021 [09:20]

Azərbaycanda radikal müxalifətin antimilli fəaliyyət göstərməsi cəmiyyətimizə məlum olan reallıqdır. Radikallar öz “ənənə”lərinə sadiq qalaraq yenə çirkin əməllərindən əl çəkmirlər. Ümumiyyətlə, bu düşərgə mənsublarının istəyi Azərbaycanda sabitliyin pozulması, qarşıdurma yaranması və beynəlxalq müstəvidə ölkəmizin müsbət imicinə xələl gəlməsidir. Hazırda antimilli şura və orada birləşən radikal ünsürlər də məhz bu istiqamətdə canfəşanlıq göstərirlər. Antimilli şuranın “fəalları”ndan biri olan AXCP funksioneri Nurəddin Məmmədli isə bu baxımdan xüsusilə fərqlənir. O, sosial şəbəkələrdə dövlətimizə və xalqımıza qarşı qarayaxma kampaniyası aparır. Onun paylaşdığı qərəzli fikirlər, ifadə etdiyi absurd iddialar bunu təsdiqləyir. Belə ki, N.Məmmədli davamlı olaraq müzəffər ordumuzu hədəfə almağa, həmçinin dövlətin uğurlu sosial siyasətinə kölgə salmağa çalışır. Bu isə düşmən dəyirmanına su tökməkdən başqa bir şey deyil.

N.Məmmədlinin Ermənistan silahlı qüvvələrinin son günlər atəşkəs rejimini pozması və mövqelərimizi atəşə tutması məsələsindən Azərbaycan dövlətinə qarşı istifadə etməkdən çəkinmir. Əslində, sağlam düşüncəli Azərbaycan vətəndaşı bu təxribatlara görə düşmən tərəfi ittiham və kəskin tənqid etməlidir. Amma AXCP funksioneri özünün “facebook” səhifəsində paylaşdığı fikirlərdə atəşkəsi pozan Ermənistana qarşı bir cümlə belə işlətməyib. O unutmamalıdır ki, 44 günlük Vətən müharibəsi Azərbaycan Ordusunun, hərbçilərimizin gücünü və rəşadətini bütün dünyaya nümayiş etdirdi. Qısa müddətdə ordumuz uzun illər işğal altında olan torpaqlarımızı azad etdi. Bu müharibə Ermənistan ordusunun darmadağın olması ilə nəticələndi. Təsadüfi deyil ki, 44 günlük müharibə XXI əsrin müharibəsi kimi xarakterizə olunur və bir sıra ölkələr Azərbaycan Ordusunun təcrübəsini öyrənməyə başlayıblar.

Ümumiyyətlə, Azərbaycan Ordusunun qüdrəti xaricdəki anti-azərbaycançı mərkəzlər, ermənipərəst dairələr tərəfindən narahatlıqla qarşılanır. Əlbəttə ki, AXCP funksionerinin fikirlərindən belə aydın olur ki, radikal müxalifət də bu prosesdən narahatdır. Bu da radikalların xaricdəki məlum dairələrlə sinxron fəaliyyət olduğunu göstərir.

N.Məmmədlinin dövlətimizin uğurlu sosial siyasətinə kölgə salmaq cəhdlərinə gəlincə, bu da uğursuz manipulyasiyalardan biridir. Sirr deyil ki, ölkəmizdə əhalinin sosial müdafiəsinin gücləndirilməsi, rifahının yüksəldilməsi dövlət siyasətinin prioritetlərindəndir. Hətta pandemiya şəraitində ölkəmizdə heç bir sosial proqram təxirə salınmadı, əksinə, hökumət tərəfindən vətəndaşların rifah halının qorunması üçün böyük maliyyə tutumlu müxtəlif proqramlar həyata keçirildi. Eyni zamanda, şəhid ailələrinə, müharibə əlillərinə və veteranlarına qayğı xüsusi diqqət mərkəzindədir. Dövlət başçısının müvafiq Sərəncamı ilə bu kateqoriyadan olan insanların təqaüdləri, müavinətləri əhəmiyyətli dərəcədə artırılıb və s.

Bir sözlə, fəaliyyətini yalnız sosial şəbəkələr üzərində quran “beşinci kolon” - radikal düşərgə Azərbaycan xalqına və dövlətinə qarşı xəyanətkar mövqe sərgiləyir.

Nardar BAYRAMLI

Paylaş:

Baxılıb: 861 dəfə