Azərbaycan və Belarus respublikalarının milli təhlükəsizlik orqanları arasında əməkdaşlığın inkişaf perspektivləri müzakirə olunub

Bakı:

21 °C

88 %

6 m/s

AZ RU EN

Ana səhifə / Xarici siyasət / Azərbaycan və Belarus respublikalarının milli təhlükəsizlik orqanları arasında əməkdaşlığın inkişaf perspektivləri müzakirə olunub

Azərbaycan və Belarus respublikalarının milli təhlükəsizlik orqanları arasında əməkdaşlığın inkişaf perspektivləri müzakirə olunub

15.08.2013 [08:41]

Azərbaycan Respublikasının milli təhlükəsizlik naziri general-leytenant Eldar Mahmudovun dəvəti ilə Belarus Respublikasının Dövlət Təhlükəsizlik Komitəsinin sədri general-mayor Valeri Vakulçik cari il avqustun 14-də ölkəmizə rəsmi səfərdə olub.
Azərbaycan Respublikası Milli Təhlükəsizlik Nazirliyinin ictimai əlaqələr mərkəzindən AzərTAc-a bildiriblər ki, əvvəlcə belaruslu qonaqlar və general-leytenant Eldar Mahmudov başda olmaqla Milli Təhlükəsizlik Nazirliyinin rəhbər heyəti Fəxri xiyabanda Ümummilli lider Heydər Əliyevin xatirəsini ehtiramla yad edib, məzarı önünə əklil qoyub.
Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül-çiçək dəstələri düzülüb.
Şəhidlər xiyabanında Azərbaycanın müstəqilliyi və ərazi bütövlüyü uğrunda döyüşlərdə canlarından keçmiş soydaşlarımızın xatirəsi də yad edilib, “Əbədi məşəl” abidəsinin önünə əklil qoyulub.
Sonra milli təhlükəsizlik naziri Eldar Mahmudov həmkarı Valeri Vakulçiklə görüşüb.
Görüşdə tərəflər arasında transmilli mütəşəkkil cinayətkarlığın müxtəlif təzahürləri, xüsusən də getdikcə daha geniş miqyas və təhlükəli xarakter almaqda olan terrorçuluq, ekstremizm, narkotiklərin qanunsuz dövriyyəsi, miqrasiya prosesləri, bundan irəli gələn problemlərlə bağlı fikir mübadiləsi aparılmış, ölkələrimizin xüsusi xidmət orqanları arasında əməkdaşlığın yeni reallıqlara uyğun inkişaf perspektivləri müzakirə olunub.
Nazir Eldar Mahmudov mövcud əməliyyat şəraiti və ona təsir göstərən amillər, ümumən təhlükəsizlik problemləri ilə əlaqədar ölkəmizin həyata keçirdiyi tədbirlər, həmçinin Ermənistan-Azərbaycan, Dağlıq Qarabağ münaqişəsi və onun doğurduğu fəsadlar barədə qonağa ətraflı məlumat verib.
Göstərilən qonaqpərvərliyə və hər iki ölkənin təhlükəsizlik maraqlarının təmin olunması sahəsində aktuallıq kəsb edən məsələlər ətrafında aparılan müzakirələr üçün yaradılmış şəraitə görə təşəkkürünü bildirən Valeri Vakulçik, respublikamıza səfərindən xoş təəssüratlar aldığını söyləyib.
Qonaq Belarus və Azərbaycan, eləcə də müvafiq strukturlar arasında münasibətlərin inkişafından məmnun qaldığını və keçirilmiş görüşlərin ölkələrimizin əlaqələrinin daha da möhkəmlənməsi üçün faydalı olacağına əminliyini ifadə qeyd edib.
Səmimi və qarşılıqlı anlaşma şəraitində keçən görüşdə maraq doğuran bir sıra digər məsələlər üzrə də fikir mübadiləsi aparılıb.

Paylaş:

Baxılıb: 2559 dəfə