Türkiyə yox deyəcəkmi?

Bakı:

15 °C

63 %

7 m/s

Əlaqə

AZ RU EN

Ana səhifə / Xarici siyasət / Türkiyə yox deyəcəkmi?

Türkiyə yox deyəcəkmi?

23.07.2022 [10:21]

İsveç Türkiyə ilə razılaşmanı pozur, Finlandiya isə...

Günel ABBASOVA

Aprel ayından İsveç və Finlandiya NATO-ya üzv olmaq üçün quruma müraciət edib. Terror təşkilatı PKK-ya və fərqli adlar altında fəaliyyət göstərən digər təşkilatlara dəstək verdiyi bilinən iki ölkə Türkiyənin “yox” səsi ilə birliyə girməkdə çətinlik çəkib. Daha sonra Madriddə keçirilən NATO Liderlər Zirvə toplantısında Türkiyə ilə bir araya gələn İsveç və Finlandiya terror təşkilatlarına dəstək verilməməsi ilə bağlı şərtləri qəbul edərək üçtərəfli müqavilə imzalayıb.

İsveçdə yenidən terror təbliğatı aparılıb

Türkiyənin terror təşkilatı PKK/YPG-ni dəstəklədiyi üçün NATO-ya üzvlüyünə qarşı çıxdığı İsveçdə terror təşkilatı YPG/PKK tərəfdarları çərşənbə günü pirat nümayiş keçirib. Göteborq şəhərinin mərkəzində bəzi dirəklərə terror təşkilatını simvolizə edən parçalar çəkilib. Daha sonra səlahiyyətlilərin müdaxiləsi ilə terror təşkilatının “bayraqları” dirəklərdən endirilib.

Türkiyənin Ədliyyə Nazirliyi Y.Aytanı “silahlı terror təşkilatı yaratmaq və ona rəhbərlik etməkdə” ittiham edərək İsveçə ekstradisiya sorğusu göndərib. İsveç Ali Məhkəməsi FETÖ lideri Fətullah Gülən tərəfdarı, hətta təşkilatın rəhbərliyində yer aldığı deyilən Yılmaz Aytanın Türkiyəyə ekstradisiyasını rədd edib. Məhkəmə Yılmaz Aytanın əməllərində cinayət tərkibi olmadığını bildirərək vəsatəti təmin etməyib.

Türkiyə NATO-ya üzvlüklə bağlı İsveç və Finlandiyaya xəbərdarlıq edib

Türkiyə Prezidenti Rəcəb Tayyib Ərdoğan bildirib ki, İsveç və Finlandiyanın NATO üzvlüyü ilə bağlı alyansa üzv olan bütün ölkələr məlumatlandırılıb. Onun sözlərinə görə, əgər bu ölkələr şərtləri yerinə yetirmək üçün lazımi addımları atmasalar, Türkiyə prosesi donduracaq. Türkiyə lideri, xüsusən İsveçin razılaşmanın şərtlərini yerinə yetirmədiyini vurğulayıb.

Üç dövlətin görüşü olacaq

Türkiyənin xarici işlər naziri Mövlud Çavuşoğlu açıqlamasında Türkiyə, Finlandiya və İsveç nümayəndə heyətlərindən ibarət daimi komitənin görüşü olacağını xəbər verib. Bildirib ki, görüş gələn ay baş tutacaq. XİN rəhbərinin sözlərinə görə, görüş zamanı tərəflər arasında imzalanmış sənədin icra səviyyəsi yoxlanılacaq.

Görüşün vəd etdiyi yenilikləri və İsveç və Finlandiyanın NATO üzvlüyünü Türkiyənin ratifikasiya edəcəyi ilə bağlı suallarımızı politoloq İlqar Vəlizadə və Elşad Mirbəşir cavablandırdı. İ.Vəlizadə bildirib ki, görüş terrorçuların təhvil verilməsi və PKK-nın dəstəklənməməsi ilə bağlı olacaq: “İsveç və Finlandiya bir daha terror təşkilatlarına dəstək verməyəcəklərini öhdələrinə götürməlidirlər. Danışıqlar olduqca həssas bir məqamda baş tutur. Təəssüf ki, bu ölkələrin siyasi dairələrinin təmsilçiləri bir neçə ay öncə üzərinə götürdüyü öhdəlikləri yerinə yetirməkdən boyun qaçırır və bunu müxtəlif arqumentlərlə şərtləndirirlər. Bu da yolverilməz bir haldır. Bu baxımdan danışıqların məhz bu istiqamətdə aparılması gözlənilir”.

Deputat Elşad Mirbəşirin sözlərinə görə, Türkiyənin ilk günlərdəki mövqeyində hər hansı bir dəyişiklik baş verməyib: “Görünən də odur ki, İsveç və Finlandiya da Türkiyənin şərtlərinə uyğun mövqe sərgiləməyib, müsbət addım atmayıb. Bununla yanaşı Ərdoğanın mövqeyinə rəsmi səviyyədə hansısa münasibət bildirilməyib. Bildiyimiz kimi, Tehranda baş tutan görüş zamanı Ərdoğan onun üçün əsas prioritetin Suriyanın şimalındakı terror təşkilatlarının zərərsizləşdirilməsi olduğunu bildirmişdi. Eyni zamanda Ərdoğan həmin təşkilatları kimlərin dəstəklədiyi məsələsinə də diqqət yetirmək lazım olduğunu qeyd etmişdi. O, çıxışında ad çəkməsə də, sözügedən ölkələri və ABŞ-ı nəzərdə tuturdu. Bu işarələrin kimə ünvanlandığı aydın görünürdü. Hesab edirəm ki, bu gün Suriyanın şimalında terrorçular təhdid yaradır və bu təhdid aradan qaldırılmırsa, terrorçu qruplaşmalar Avropanın bəlli ölkələrindən dəstək almağa davam edirsə, Ərdoğan İsveç və Finlandiyanın NATO-ya üzvlüyünə qarşı çıxacaq”.

Paylaş:

Baxılıb: 996 dəfə