Uğurlarımızın davamı naminə...

Bakı:

27 °C

39 %

5 m/s

Əlaqə

AZ RU EN

Ana səhifə / YAP xəbərləri / Uğurlarımızın davamı naminə...

Uğurlarımızın davamı naminə...

12.08.2024 [21:53]

2024-cü il sentyabrın 1-də Azərbaycan Respublikası Milli Məclisinə keçiriləcək növbədənkənar seçkilərin təşviqat mərhələsi çərçivəsində Yeni Azərbaycan Partiyası (YAP) tərəfindən 114 saylı Şəki şəhər seçki dairəsindən deputatlığa namizədliyi irəli sürülmüş Vüqar İskəndərovun Şəki rayonu, Baltalı kənd tam orta məktəbinin akt zalında seçicilərlə görüşü keçirilib.

İlk növbədə Azərbaycan Respublikasının Dövlət Himni səsləndirilib, daha sonra Ümummilli Lider Heydər Əliyevin və torpaqlarımızın ərazi bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edilib.

Görüşdə giriş sözü ilə çıxış edən YAP Şəki rayon təşkilatının sədri Daşqın Mikayılov parlament seçkilərinin ölkəmizin ictimai-siyasi həyatında mühüm rol oynadığını diqqətə çatdırıb. Bildirib ki, Azərbaycanın düşmən üzərindəki tarixi Zəfərindən sonra yeni dövr başlayıb. Vurğulanıb ki, bu gün Azərbaycan xalqı formalaşmış yeni reallıqlar mühitində inamla və qürurla öz inkişafının növbəti mərhələsinə qədəm qoyub.

Çıxış edən deputatlığa namizəd Vüqar İskəndərov Yeni Azərbaycan Partiyasının Azərbaycan cəmiyyətinin aparıcı siyasi qüvvəsi olduğu kimi, regionda və onun hüdudlarından kənarda da böyük nüfuza malik bir siyasi təşkilat olduğunu vurğulayıb. O, YAP-ın seçki platforması haqqında ətraflı məlumat verib. Qeyd edib ki, həyata keçirilən məqsədyönlü siyasət sayəsində ölkəmiz sosial-iqtisadi infrastruktur quruculuğunda, özəl sektorun inkişafında, sənayeləşmədə, aqrar sektorun istehsal və ixrac imkanlarının genişləndirilməsində, makroiqtisadi sabitliyin təmin olunmasında, əhalinin rifah halının yaxşılaşmasında diqqətə layiq uğurlara imza atıb.

Vüqar İskəndərov çıxışında seçiciləri parlament seçkilərində fəal iştirak etməyə və ən layiqli namizədə səs verməyə çağırıb. O, deputat seçiləcəyi təqdirdə ona göstərilən inam və etimadı doğrultmağa çalışacağına söz verib.

Tədbirdə təşviqat qrupunun üzvləri Sədrəddin Bədiyev, Tofiq Abdulxalıqov və digərləri çıxış ediblər. Qeyd olunub ki, YAP-ın ideologiyasının və fəaliyyətinin əsas istiqamətini məhz dövlətimizin, cəmiyyətimizin inkişafı, onun qüdrətinin daha da artması, beynəlxalq münasibətlər sistemində ölkəmizin layiqli təbliğatı təşkil edir.

Çıxış edənlər uğurlarımızın davamı naminə seçiciləri parlament seçkilərində YAP-ın namizədinə səs verməyə çağırıblar.

Bundan başqa çıxış edən seçicilər Sima İbrahimzadə, Əhməd Qaffarov, Nazilə Məmmədova, Fikrət Cəlilov, Anar Hüseynov, İradə Azaqova, Zakir Əhmədov və Bəyaz Lətifova da 1 sentyabr seçkilərində YAP-ın namizədinə səs verəcəklərini bildiriblər.

Tədbirin sonunda Yeni Azərbaycan Partiyasının Himni səsləndirilib.

Paylaş:

Baxılıb: 688 dəfə