Uğurlu təcrübə

Bakı:

27 °C

50 %

5 m/s

Əlaqə

AZ RU EN

Ana səhifə / YAP xəbərləri / Uğurlu təcrübə

Uğurlu təcrübə

28.10.2024 [16:05]

Nihad Pənahov,

YAP Tovuz rayon təşkilatının sədri

Dövlətimizin başçısı İlham Əliyevin oktyabrın 24-də Kazan şəhərində XVI BRICS Sammitinin “Outreach”/“BRICS+” formatının ilk plenar iclasındakı çıxışında səsləndirdiyi çağırışlar ölkə və dünya mətbuatında geniş müzakirə edilir. Qeyd edək ki, hazırda 10 üzvü olan BRICS 2006-cı ildə yaradılıb. Builki BRICS Sammitinə 36 ölkədən və 6 beynəlxalq təşkilatdan nümayəndə heyətləri, o cümlədən 22 dövlət başçısı və BMT-nin Baş katibi Antonio Quterreş qatılıblar. BRICS 2009-cu ildən bəri hər il rəsmi sammitlərdə toplaşan və çoxtərəfli siyasətləri əlaqələndirən vahid geosiyasi bloka, həmçinin dünya əhalisinin təxminən yarısını və qlobal iqtisadiyyatın dörddəbirindən çoxunu təşkil edən nəhəng iqtisadi güc mərkəzinə çevrilib. Tədbir çərçivəsində keçirilən görüşlərdə gündəmə gətirilən məsələlər, həmçinin cənab İlham Əliyevin XVI BRICS Sammitinin “Outreach”/“BRICS+” formatının ilk plenar iclasındakı çıxışı Azərbaycanın beynəlxalq münasibətlər sistemində yerini və rolunu açıqladı. Reallıq budur ki, Azərbaycanın xarici siyasətinin dəyişməz prinsipləri onun xarici siyasətdə mühüm uğurlar qazanmasını şərtləndirir. Ölkəmiz bütün dövlətlərlə bərabərhüquqlu, qarşılıqlı hörmət və maraq prinsipləri əsasında əlaqələr qurur, heç bir dövlətin daxili işinə müdaxilə etmir, öz daxili işinə müdaxiləni də yolverilməz qəbul edir.

Qarşılıqlı etimad mühitinin qorunması şəraitində qurulan və yeni istiqamətlər üzrə inkişaf etirilən əlaqələr Azərbaycanın xarici siyasətində prioritetdir. Əməkdaşlığın coğrafiyasının genişləndirilməsi istiqamətində atılan addımlar da ölkəmizin istər ikitərəfli, istərsə də çoxtərəfli çərçivədə münasibətlərin möhkəmləndirilməsində maraqlı olduğunu təsdiqləyir. Cənab İlham Əliyev XVI BRICS Sammitinin “Outreach”/“BRICS+” formatının ilk plenar iclasındakı çıxışında bildirdi ki, Azərbaycan beynəlxalq münasibətlərdə çoxtərəflilik prinsipinin fəal tərəfdarıdır. Bu, 2020-2023-cü illərdə Qoşulmama Hərəkatına sədrlik dövründə bizim tərəfimizdən əyani şəkildə nümayiş etdirilib. Dördillik sədrlik dövründə Qoşulmama Hərəkatı özünün institusional inkişafında böyük addım atıb, beynəlxalq münasibətlər sistemində öz yerini xeyli möhkəmləndirib. Hərəkata uğurlu sədrlik təcrübəsi bu gün bizə Asiyada Qarşılıqlı Fəaliyyət və Etimad Tədbirləri üzrə Müşavirənin hazırkı sədri qismində kömək edir. O da bildirildi ki, öz coğrafi mövqeyindən istifadə edən və müasir infrastruktur yaradan Azərbaycan Avrasiyanın mühüm nəqliyyat və logistika mərkəzlərindən birinə çevrilib. “Şərq-Qərb” və “Şimal-Cənub” nəqliyyat dəhlizləri bizim ərazimizdən keçir. Bu nəqliyyat yollarının Azərbaycan ərazisində olan bütün seqmentləri uğurla fəaliyyət göstərir.

Hazırki məqamda ərazimizdən yük axınının kəskin artmasını nəzərə alaraq, biz bu dəhlizlərin ötürücülük imkanlarının artırılmasına əlavə vəsaitlər yatırırıq. Rusiya Prezidenti Vladimir Putin bildirdi ki, Azərbaycanın logistika dəhlizlərinin inkişafında rolu çox mühümdür. Cənubi Qafqazın ən böyük və perspektivli dövləti, Şərqlə-Qərbin qovşağında unikal coğrafi geosiyasi şəraitə malik olan Azərbaycan bu gün regionda gedən əsas proseslərin və transmilli maraqların mərkəzində dayanmaqla geoiqtisadi cəhətdən dünyanın aparıcı dövlətləri, böyük şirkətləri üçün cəlbedici tərəfdaşa çevrilib. Prezident İlham Əliyevin həyata keçirdiyi yeni iqtisadi strategiya ölkənin bütövlükdə iqtisadiyyatının şaxələndirilməsinə və xüsusən də iqtisadiyyatın bütün digər sahələrinin inkişafına yönəldilib. Logistika və ticarət isə sürətlə qloballaşan dünyada iqtisadi artımın mühüm təkanverici qüvvəsinə çevrilməklə, əsas sektorlarda birbaşa xarici investisiya qoyuluşlarının həcmini artırmağa şərait yaradır. Hesablamalar göstərir ki, inkişaf etmiş nəqliyyat və logistika sistemi ümumi daxili məhsulda birbaşa artıma imkan verir. Görülmüş tədbirlər nəticəsində bu gün Azərbaycan nəqliyyat sahəsində dünyada lider dövlətlərdən biridir. Bunun təsdiqi olaraq qeyd edə bilərik ki, Azərbaycan beynəlxalq təşkilatların reytinqlərində daim yüksək yerləri tutur. Azərbaycan beynəlxalq əhəmiyyətli tədbirlərin keçirilməsində ideal məkan kimi tanınmaqla yanaşı, bu tədbirlərin yüksək səviyyədə təşkili ilə diqqətdə olur. Bu günədək ölkəmizin ev sahibliyi etdiyi tədbirlərin nəzərdən keçirilməsi fonunda belə bir əminlik ifadə edilir ki, COP29 da yüksək səviyyədə keçiriləcək, Azərbaycanın növbəti uğuru olacaq. “Növbəti ayda Bakı ən böyük beynəlxalq iqlim konfransının-COP29-un keçirilməsi məkanı olacaq. Təqribən 200 ölkənin COP29-un Azərbaycanda keçirilməsinə dair yekdil qərarı bizim siyasətimizə hörmətin və dəstəyin parlaq sübutudur” bildirən Prezident İlham Əliyev vurğuladı ki, biz artıq Qlobal Cənub və Qlobal Şimal arasında iqlim üzrə əməkdaşlığa töhfə veririk və istər iqlim dəyişikliyi ilə bağlı məsələlərdə, istərsə də qlobal təhlükəsizlik, beynəlxalq hüququn aliliyi, bir-birinin işlərinə qarışmamaq, qarşılıqlı hörmət məsələlərində qarşılıqlı anlaşmaya nail olunmasına səy göstərəcəyik.

Paylaş:

Baxılıb: 456 dəfə