Ulu Öndərin qurduğu Yeni Azərbaycan Partiyası Prezident İlham Əliyevin rəhbərliyi ilə yeni uğurlara imza atır

Bakı:

30 °C

43 %

8 m/s

AZ RU EN

Ana səhifə / YAP xəbərləri / Ulu Öndərin qurduğu Yeni Azərbaycan Partiyası Prezident İlham Əliyevin rəhbərliyi ilə yeni uğurlara imza atır

Ulu Öndərin qurduğu Yeni Azərbaycan Partiyası Prezident İlham Əliyevin rəhbərliyi ilə yeni uğurlara imza atır

03.02.2025 [16:54]

Zamir HÜSEYNOV,

Yeni Azərbaycan Partiyası Göygöl rayon təşkilatının sədr müavini

Yanvarın 29-da ölkədə keçirilən sonuncu bələdiyyə seçkilərində çoxsaylı namizədlərlə iştirak edərək, qalib gələn Yeni Azərbaycan Partiyası (YAP) Azərbaycan Respublikasının ağır, çətin günlərində ciddi sınaqlara məruz qaldığı dövrdə ziyalılarımızın təşəbbüsü ilə yaradılan siyasi qurumdur. YAP-ın təsis olunması ötən əsrin sonlarında ciddi təlatümlərlə müşahidə edilən müstəqilliyin əldə edilməsi dövrünə təsadüf edirdi.

Məlum olduğu kimi, respublikada siyasi qurumların formalaşması prosesi 1988-ci ildən başlanan xalq hərəkatının gedişində nəzərə çarpırdı. Sovet rejiminin süqutundan sonra müstəqillik əldə etmiş respublikalarda olduğu kimi, Azərbaycanda da müxtəlif siyasi partiyalar və digər qurumlar təşəkkül tapmağa başlamışdı. Lakin bu partiyalar ölkəni ağır sosial, iqtisadi, siyasi böhrandan xilas edə bilmədi, əksinə hakimiyyətdə olan və iqtidar uğrunda mübarizə aparan siyasi qüvvələr Azərbaycanda vəziyyəti olduqca gərginləşdirmişdi. Bu zaman ölkəni taleyini düşünən və onu gözlənilən uçurumdan qorumaq istəyən insanlar yeni siyasi partiya yaratmağı vəziyyətdən çıxış üçün mühüm yol hesab etdilər və bu məqsədlə Ümummilli Lider Heydər Əliyevin ətrafında birləşdilər. 91 nəfərin imzası ilə Azərbaycan ziyalıları Naxçıvanda respublika Ali Məclisinin Sədri kimi fəaliyyət göstərən Ulu Öndərə yeni yaradılacaq siyasi partiyaya rəhbərlik etmək xahişi ilə müraciət etdilər. Həmin təşəbbüsü Ümummilli Liderin qəbul etməsi, eyni zamanda xalqın arzu və istəyinin müsbət cavablandırılması idi. Qısa müddətdə partiyanın təsis konfransının keçirilməsi də bunu sübut etdi. Belə ki, məlum səbəblərdən Bakıda keçirilməsi mümkün olmayan təsis konfransını Naxçıvanda keçirmək üçün təşəbbüs qrupunun ölkənin hər guşəsindən olan 550 nəfər üzvünün muxtar respublikaya getməsi və partiyanın orada yaradılması xalqın qətiyyətli iradəsinin nəticəsi idi.

Yuxarıda vurğulandığı kimi, Azərbaycanın bütün regionlarından nümayəndələrin iştrakı ilə 21 noyabr 1992-ci ildə Ümummilli Lider Heydər Əliyevin sədrliyi ilə keçirilən təsis konfransında Yeni Azərbaycan Partiyasının yaradılması haqqında qərar, partiyanın Proqram və Nizamnaməsi qəbul olundu. Ulu Öndərin yekdilliklə partiyanın Sədri seçildiyi konfransada partiyanın Siyasi Şurası, İdarə Heyəti və sədr müavinləri də müəyyənləşdi. Beləliklə, müstəqil Azərbaycanın ictimai-siyasi tarixində mühüm hadisə kimi qiymətləndirilən Yeni Azərbaycan Partiyasının əsası qoyuldu. Yeni Azərbaycan Partiyası 1992-ci il dekabrın 18-də Ədliyyə Nazirliyində qeydiyyata alındı və respublikamızın bütün bölgələrində qısa müddətdə rayon təşkilatları və özəkləri yaradıldı.

Partiyanın Proqramına əsasən, YAP-ın əsas vəzifələri dövlət müstəqilliyinin möhkəmləndirilməsi, demokratik, hüquqi, dünyəvi dövlətin qurulması, vətəndaşların dinc və firavan həyatının təmin edilməsidir. Müstəqil dövlətçilik, qanunçuluq, azərbaycançılıq, vətəndaş həmrəyliyi və sosial ədalət prinsipləri YAP-ın qarşısında duran əsas vəzifələr olaraq mahiyyətcə Azərbaycanın siyasi gələcəyinin ideya bazasını şərtləndirdi.

3 oktyabr 1993-cü ildə YAP-ın sədri Heydər Əliyevin ümumxalq səsverməsi yolu ilə yekdilliklə prezident seçilməsi ölkəmizdə yeni dövrün əsasını qoydu. 1999-cu ilin dekabrında keçirilən YAP-ın I Qurultayı ümumilikdə Azərbaycan cəmiyyətinin həyatında mühüm rol oynadı. Qurultayda YAP-ın təsis konfransında qəbul olunmuş Proqram və Nizamnamə geniş şəkildə müzakirə edildi, müəyyən əlavə və dəyişikliklər həyata keçirildi. YAP-ın strateji fəaliyyət istiqamətləri, Azərbaycanın dövlət müstəqilliyinin qorunması və möhkəmləndirilməsi, beynəlxalq münasibətlər sistemində respublikamızın layiqli yer tutması, ölkəmizdə dövlət quruculuğu yönündə başlıca məqsəd və vəzifələr müəyyənləşdirildi.

Bu gün YAP Azərbaycan Respublikasının Konstitusiyası və qanunvericiliyi çərçivəsində özünün Nizamnaməsi və Proqramı əsasında fəaliyyət göstərən, öz sıralarında hüquqi dövlət, sabit və sosialyönümlü iqtisadiyyat, vətəndaş cəmiyyəti qurmaq ideyalarını qəbul edən siyasi partiyadır.

Şərəfli inkişaf yolu keçmiş Yeni Azərbaycan Partiyası Ümummilli Lider layilqi davamçısı Prezident İlham Əliyevin rəhbərliyi altında daha da inkişaf etdir və müasirləşir, onun fəaliyyəti təkmilləşdirilir, beynəlxalq əlaqələri genişləndirilir. Son illərdə Prezident İlham Əliyevin rəhbərliyi ilə Yeni Azərbaycan Partiyasında aparılan geniş islahatlar ölkəmizdə partiya quruculuğu sahəsində əldə edilmiş mühüm uğurlara nümunədir. Üstəlik, partiya Azərbaycan ictimai-siyasi mühitinin mütəşəkkil, aparıcı qüvvəsi kimi çıxış edir, daim yeniləşən, inkişaf edən siyasi partiya olaraq nüfuzunu getdikcə daha da artırır.

Müstəqil Azərbaycan Respublikasında bütün sahələr üzrə qazanılmış nailiyyətlərdə Yeni Azərbaycan Partiyasının böyük rolu və xidmətləri danılmazdır. Xüsusi olaraq qeyd edək ki, Birinci vitse-prezident Mehriban Əliyevanın partiya sədrinin birinci müavini kimi səmərəli fəaliyyəti respublikamızda bütün sahələr üzrə inkişafa, o cümlədən partiyanın siyasi fəaliyyətinin daha da genişləndirilməsinə mühüm töhfələr verir. Ən nəhayət, Ulu Öndərin qurduğu Yeni Azərbaycan Partiyası Qarabağ Zəfərindən sonra yaranmış yeni reallıqlar fonunda Prezident İlham Əliyevin rəhbərliyi ilə yeni uğurlara imza atır.

Paylaş:

Baxılıb: 653 dəfə