Yeni Azərbaycan Partiyası ilə Koreyanın Seanuri Partiyasının əlaqələri inkişaf edir

Bakı:

29 °C

55 %

4 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası ilə Koreyanın Seanuri Partiyasının əlaqələri inkişaf edir

Yeni Azərbaycan Partiyası ilə Koreyanın Seanuri Partiyasının əlaqələri inkişaf edir

25.06.2013 [01:49]

YAP Sədrinin müavini-İcra katibi Əli Əhmədov Koreya Respublikasının Seanuri Partiyasının nümayəndə heyətinin üzvləri ilə görüşüb
Dünən Yeni Azərbaycan Partiyasının (YAP) Sədr müavini-İcra katibi, Milli Məclisin deputatı Əli Əhmədov partiyanın qərargahında ölkəmizdə səfərdə olan Koreya Respublikasının hakim Seanuri Partiyasının nümayəndə heyətinin üzvlərini qəbul edib.
Qonaqları salamlayan Əli Əhmədov bu səfərin Yeni Azərbaycan Partiyası ilə Koreyanın Seanuri Partiyası arasında əlaqələrin inkişafına töhfə verəcəyini bildirib. 2010-cu ildə YAP nümayəndə heyətinin Seula səfər etdiyini xatırladan Əli Əhmədov bu səfər zamanı partiyalar arasında qarşılıqlı əməkdaşlığın inkişafına dair Anlaşma Memorandumunun imzalandığını xatırladıb. “Bu sənəd çərçivəsində, həmçinin, bizim partiyalar arasında əməkdaşlığın daha da genişləndirilməsi ilə bağlı geniş fikir mübadiləsi aparılır. Eyni zamanda, hesab edirəm ki, partiyalarımızın əməkdaşlığı Azərbaycanla Koreya Respublikası arasında əlaqələrin inkişafına da öz töhfələrini verməkdədir” - deyə, YAP Sədrinin müavini vurğulayıb.
Azərbaycana səfər etmələrindən məmnunluq ifadə edən Koreya Milli Assambleyasının üzvü, Məhkəmə Sistemində Xüsusi İslahatlar üzrə Xüsusi Komitənin sədri Yu Ki Cun hər iki partiya arasında əlaqələrin inkişafı üçün böyük potensialın olduğunu bildirib. 2010-cu ildə YAP nümayəndə heyətinin Seula səfərinin uğurlu olduğunu deyən qonağın sözlərinə görə, Seanuri Partiyasının rəhbəri də həmin səfərdən məmnunluq duyur.
Yu Ki Cun Yeni Azərbaycan Partiyasının V Qurultayının uğurla keçirilməsi münasibətilə öz təbriklərini çatdırıb: “YAP-ın son Qurultayında cənab İlham Əliyevin prezidentliyə namizədliyinin irəli sürülməsini səmimi qarşıladıq. Düşünürük ki, cənab İlham Əliyev yenidən dövlət başçısı seçiləcək və Azərbaycanın inkişafı naminə fəaliyyətini davam etdirəcək”.
O, ötən illər ərzində Azərbaycanın sürətlə inkişaf etdiyini deyib və Bakı şəhərinin gözəlliyini Seul ilə müqayisə edib.
Hər iki ölkənin münasibətlərinin təxminən 20 illik tarixinin olduğunu deyən qonaq bu müddət ərzində Azərbaycanla Koreya arasında yüksək əlaqələrin qurulduğunu vurğulayıb. “Hazırda bir sıra Koreya şirkətləri Azərbaycanda fəaliyyət göstərirlər. Eyni zamanda, Azərbaycan Xəzər hövzəsində vacib ölkədir və onun neft sənayesi sahəsində böyük təcrübəsi var. Həmçinin, Koreyanın da bu sahədə təcrübəsi mövcuddur. Ona görə də, hesab edirik ki, bu sahədə hər iki ölkə arasında təcrübə mübadiləsinin aparılması əhəmiyyətlidir” - deyə, Seanuri Partiyasının nümayəndəsi qeyd edib.
Görüşdə qarşılıqlı maraq doğuran məsələlərlə bağlı geniş fikir mübadiləsi aparılıb. Görüşdə YAP İcra katibinin müavinləri Mübariz Qurbanlı və Siyavuş Novruzov, partiyanın beynəlxalq əlaqələr şöbəsinin müdiri Asəf Hacıyev iştirak edib.
Nardar BAYRAMLI

Paylaş:

Baxılıb: 1463 dəfə