Qlobal sülh proseslərinə töhfə

Bakı:

25 °C

65 %

5 m/s

Əlaqə

AZ RU EN

Ana səhifə / YAP xəbərləri / Qlobal sülh proseslərinə töhfə

Qlobal sülh proseslərinə töhfə

11.04.2025 [19:39]

Natiq Quluzadə,

YAP Zəngilan rayon təşkilatının sədri

Bu gün yeni dünya nizamının formalaşması yalnız qlobal siyasi platformalarda müzakirə olunan məsələ statusundan çıxaraq, bütün beynəlxalq ictimaiyyəti, bəşəriyyəti düşündürən və narahat edən problemə çevrilib. Bu prosesin planetin müxtəlif bölgələrində silahlı münaqişələrlə müşayiət olunması, regional gərginliklərə rəvac verməsi ağır problemlərə yol açır. Aprelin 9-da ADA Universitetində ölkə Prezidenti cənab İlham Əliyevin iştirakı ilə keçirilmiş “Yeni dünya nizamına doğru” mövzusunda beynəlxalq forumda müzakirə olunan məsələlər də məhz bu problemlərə və onların həlli yollarının araşdırılmasına həsr olunub. Azərbaycan son bir neçə ildə qlobal sülhə mühüm töhfələr verən ölkələrdən biri kimi çıxış edir ki, bu da beynəlxalq ictimaiyyətin diqqətindən yayınmır. Eyni zamanda da bu gün Şərqlə Qərbin, Şimalla Cənubun qovuşduğu məkanda yerləşən ölkəmizin qlobal miqyasda rolu getdikcə artır.

Qeyd olunmalıdır ki, hazırda Cənubi Qafqazda sülh və sabitliyin əldə olunması artıq çoxdan regional əhəmiyyətli məsələ olmaqdan çıxıb. İndi bu göstərici həm Avropanın enerji təhlükəsizliyi üçün, həm də Şərq-Qərb iqtisadi-ticari əlaqələrinin inkişafı üçün mühüm amilə çevrilib. Bu baxımdan da Azərbaycan-Ermənistan münasibətləri, sülh prosesinin hazırkı durumu Forumda müzakirə edilən məsələlərdən biri kimi tədbir iştirakçılarını ən çox maraqlandıran mövzulardan olub. Azərbaycan öz ərazi bütövlüyünü və suverenliyini bərpa etdi, separatçılığın kökünü kəsdi, sərhədlərinin toxunulmazlığını təmin etdi və bu gün ilk növbədə məhz öz regionumuzda davamlı sülhə və inkişafa nail olmaq üçün ciddi şəkildə çalışır. Bununla belə, hadisələrin bundan sonra hansı məcrada inkişaf edəcəyi məhz Ermənistanın da yanaşmasından çox asılı olacaq. Ölkəmizin Ermənistandan ərazi bütövlüyümüz və onların Konstitusiyası ilə bağlı gözləntiləri məlumdur. Əgər Ermənistan da sabitlik və inkişafda maraqlıdırsa, bunu Azərbaycanın irəli sürdüyü haqlı tələbləri qəbul edərək sülh sazişini imzalamaqla nümayiş etdirəcək.

Forumda müzakirə edilən mühüm məsələlərdən biri də Azərbaycanın qlobal miqyasda Yaxın Şərq bölgəsində də sülhün əldə olunmasına mühüm töhfələr verə biləcəyi ilə bağlı olub. Aydındır ki, Yaxın və Orta Şərq regionunda gərginliyin getdikcə artması qlobal miqyasda sülhü təhdid edən amillərdən biri kimi dünya ictimaiyyətini ciddi şəkildə narahat edir. O cümlədən Türkiyə ilə İsrail arasında yaşanan gərginliklər bu regionda sabitliyin əldə olunmasına əngəl törədən amil kimi çıxış edir. Bu baxımdan Azərbaycan həm Türkiyə, həm də İsraillə möhkəm dostluq əlqələri olan bir ölkə kimi bu gərginliyin aradan qaldırmasında önəmli rol oynaya bilər. Öz çıxışında bu məsələyə toxunan cənab Prezident xatırlatdı ki, Türkiyə ilə İsrailin ilk dəfə barışmasında məhz Azərbaycan vasitəçilik edib, bu ölkələrin mövqe yaxınlaşmalarında fəal rol oynayıb. Bu gün də Azərbaycan Türkiyə-İsrail münasibətlərinin normalaşmasında rol oynamaqla bütün Yaxın Şərqdə sülhün və sabitliyin əldə olunmasına əvəzsiz töhfə verə bilər.

Paylaş:

Baxılıb: 681 dəfə