Akademik Zərifə Əliyeva – Elm, Vətən və İnsanlıq Nümunəsi

Bakı:

14°C

77%

2m/s

Əlaqə

AZ RU EN

Ana səhifə / YAP xəbərləri / Akademik Zərifə Əliyeva – Elm, Vətən və İnsanlıq Nümunəsi

Akademik Zərifə Əliyeva – Elm, Vətən və İnsanlıq Nümunəsi

14.04.2025 [17:21]

Azər Süleymanov,

YAP Nəsimi rayon təşkilatının sədri

2025-ci il aprelin 15-də Azərbaycan tibb elminin parlaq siması, görkəmli oftalmoloq-alim, akademik Zərifə xanım Əliyevanın əbədiyyətə qovuşmasından 40 il ötür. Bu gün biz yalnız böyük bir alimin yox, həm də müdrik bir ziyalının, vətəninə sədaqətli bir övladın, əsl Azərbaycan qadınının parlaq xatirəsini ehtiramla yad edirik.

Zərifə xanım Əliyeva mənalı və zəngin ömür yolu keçmiş, elmi nailiyyətləri, pedaqoji fəaliyyəti, ictimai mövqeyi ilə daim örnək olmuşdur. Onun xarakterinə xas olan səmimilik, alicənablıq, tələbkarlıq, xalqına və vətəninə sonsuz məhəbbət kimi keyfiyyətlər onu təkcə görkəmli bir alim deyil, həm də yüksək mənəviyyat sahibi kimi tanıtmışdır.

Görkəmli dövlət xadimi və səhiyyə təşkilatçısı Əziz Əliyevin ailəsində dünyaya gələn Zərifə xanım, artıq gənc yaşlarından elmə və insanlara xidməti həyatının başlıca məqsədinə çevirmişdir. 1942-ci ildə orta məktəbi bitirdikdən sonra Azərbaycan Dövlət Tibb İnstitutuna daxil olmuş, 1947-ci ildə oranı fərqlənmə ilə başa vurmuşdur. Təhsilini Moskva şəhərində davam etdirərək oftalmologiya sahəsində ixtisaslaşmış, 1953-cü ildə aspirantura təhsilini uğurla tamamlamışdır.

Elmi fəaliyyətinin əsas mərhələləri Azərbaycan Elmi-Tədqiqat Oftalmologiya İnstitutu və Əziz Əliyev adına Həkimləri Təkmilləşdirmə İnstitutu ilə bağlı olmuşdur. Burada o, elmi işçidən kafedra müdirliyinə qədər yüksəlmiş, ölkəmizdə oftalmologiya elminin inkişafına əvəzsiz töhfələr vermişdir. Peşə xəstəliklərinin, xüsusilə sənaye sahələrində yaranan göz patologiyalarının profilaktikası və müalicəsi üzrə apardığı araşdırmalar tibb sahəsində mühüm yeniliklərə yol açmışdır.

Zərifə xanım Əliyeva "Terapevtik oftalmologiya", "İridodiaqnostikanın əsasları" kimi dəyərli əsərlərin, 12 monoqrafiya və 150-dən çox elmi məqalənin müəllifi olmuş, bir ixtira və 12 səmərələşdirici təklifə imza atmışdır. Elmi araşdırmaları və oftalmologiya sahəsində verdiyi töhfələr 1981-ci ildə onu SSRİ Tibb Elmləri Akademiyasının akademik M.İ. Averbax adına mükafatına layiq görmüşdür. 1983-cü ildə isə o, Azərbaycan SSR EA-nın akademiki seçilmişdir.

Görkəmli alim həm də ictimai fəaliyyəti ilə seçilmiş, bir sıra nüfuzlu qurumların üzvü olmuş, Azərbaycan və beynəlxalq tibb ictimaiyyətində yüksək nüfuz qazanmışdır. Onun elmi irsi bu gün də Azərbaycan tibb elminin parlaq səhifələrində öz layiqli yerini qoruyub saxlayır.

Zərifə xanım Əliyeva, bütün bu elmi uğurlarla yanaşı, qayğıkeş ana, vəfalı ömür-gün yoldaşı kimi də yaddaşlara həkk olunub. O, həyatını xalqına və dövlətinə həsr etmiş Ümummilli lider Heydər Əliyevin ən yaxın silahdaşı kimi, bütün fəaliyyətində yüksək mənəvi dəstək göstərmişdir.

Bu gün akademik Zərifə Əliyevanın adını daşıyan Elmi-Tədqiqat Göz Xəstəlikləri İnstitutu onun zəngin elmi irsini yaşadır. Prezident İlham Əliyevin rəhbərliyi ilə ölkədə həyata keçirilən sosial yönümlü siyasət, xüsusilə səhiyyəyə göstərilən diqqət və qayğı da Zərifə xanımın davamçısı olduğu humanist dəyərlərin dövlət səviyyəsində yaşadılmasının bariz nümunəsidir.

Görkəmli alim, vətənpərvər ziyalı, əziz insan Zərifə xanım Əliyevanın əziz xatirəsi daim qəlblərdə yaşayacaq, onun elmi və mənəvi irsi gələcək nəsillər üçün örnək olaraq qalacaqdır.

Paylaş:

Baxılıb: 342 dəfə