Çoxvektorlu xarici siyasət dost ölkələrlə münasibətlərin dərinləşməsinə dəlalət edir

Bakı:

11 °C

93 %

5 m/s

Əlaqə

AZ RU EN

Ana səhifə / YAP xəbərləri / Çoxvektorlu xarici siyasət dost ölkələrlə münasibətlərin dərinləşməsinə dəlalət edir

Çoxvektorlu xarici siyasət dost ölkələrlə münasibətlərin dərinləşməsinə dəlalət edir

21.04.2025 [18:49]

Fidan Hüseynova,
YAP Quba rayon təşkilatının sədri

Müasir müstəqil Azərbaycanın memarı və qurucusu olan Ümummilli Lider Heydər Əliyev tərəfindən əsası qoyulmuş xarici siyasət strategiyası Prezident İlham Əliyev tərəfindən uğurla davam etdirilir. Hazırda müstəqil dövlətimizin beynəlxalq aləmdəki mövqeləri xeyli möhkəmlənmiş, əlaqələri genişlənmişdir. Dövlət başçımızın dünya səviyyəsində həyata keçirdiyi balanslaşdırılmış xarici siyasəti dostlarımızın sayını artırmış, Azərbaycanın beynəlxalq nüfuzunu daha da gücləndirmişdir.

Bu siyasətin parlaq nümunələrindən biri də Azərbaycan ilə Gürcüstan arasında mövcud olan dostluq və strateji tərəfdaşlıq münasibətləridir. Tarixi, mədəni və coğrafi yaxınlıqla yanaşı, siyasi dialoq, iqtisadi əməkdaşlıq və regional layihələrdə birgə iştirak ölkələrimiz arasında əlaqələrin möhkəm əsaslar üzərində qurulduğunu göstərir.

Sovetlər birliyi dağılandan sonra bu ölkələrdə baş verən proseslər, daxili və xarici vəziyyətin oxşarlığı, geosiyasi maraqların üst-üstə düşməsi və digər amillər iki dövlət arasında müttəfiqlik münasibətlərinin yaranmasına səbəb olub. Azərbaycan-Gürcüstan diplomatik münasibətləri 1992-ci il noyabrın 18-də qurulsa da, bu əlaqələrin yüksək səviyyəyə çatdırılması Ulu Öndər Heydər Əliyevin adı ilə bağlıdır. Gürcüstanın Prezidenti Mixeil Kavelaşvilinin 16 aprel 2025-ci il tarixində ölkəmizə səfəri iki respublika arasında mövcud olan mehriban qonşuluq və dostluq münasibətlərinin təzahürüdür.

Prezident İlham Əliyev və Gürcüstanın Prezidenti Mixeil Kavelaşvili mətbuata bəyanatlarla çıxış etmişdir. Dövlətimizin başçısı bəyanatında bildirmişdir ki, əsrlər boyu bizim xalqlarımız sülh, mehribanlıq, qardaşlıq şəraitində yaşamışlar. Bu gün də bu, belədir. Dövlətlərarası münasibətlər də yüksək səviyyədədir. Gürcüstan və Azərbaycan birgə bir çox önəmli layihələri icra ediblər və bu layihələr həm ölkələrimiz üçün, xalqlarımız üçün, həm də daha geniş coğrafiya üçün böyük önəm daşıyır. Təbii olaraq siyasi əlaqələr inkişaf edir. Yüksəksəviyyəli təmaslar müntəzəm xarakter daşıyır, siyasi dialoq fəaldır. Yəni, iki dost, qardaş ölkə, sözün əsl mənasında, bir-birinə çox bağlıdır və beynəlxalq təşkilatlarda da daim bir-birini dəstəkləyir.

Prezident İlham Əliyev qeyd etmişdir ki, Azərbaycanın və Gürcüstanın birgə həyata keçirdiyi neft-qaz layihələri, neft-qaz kəmərləri, nəqliyyat, kommunikasiya layihələri, sözün əsl mənasında, böyük əhəmiyyət daşıyan layihələrdir və nəinki Cənubi Qafqazın, Avrasiya regionunun nəqliyyat və enerji xəritəsini yenidən tərtib edən layihələrdir. Əgər biz bu gün Avropanın enerji təhlükəsizliyi haqqında danışırıqsa, bunu Azərbaycansız, Gürcüstansız təsəvvür etmək mümkün deyil. Hazırda Gürcüstan daxil olmaqla Azərbaycan 12 ölkəyə təbii qaz ixrac edir və bu ixrac Gürcüstan vasitəsilə həyata keçirilir.

Cənab İlham Əliyev qeyd edib ki, Cənubi Qafqazda sülhün, əmin-amanlığın bərqərar edilməsi də bizim birgə maraqlarımızda olan məsələdir və burada həm Gürcüstan, həm Azərbaycan öz töhfəsini verir. Əfsuslar olsun ki, uzun illər ərzində Cənubi Qafqaz münaqişə, müharibə arenasına çevrilmişdir. Ümid edirəm ki, bundan sonra Cənubi Qafqazın qara səhifələri bağlanacaq və tarixdə qalacaq.

Gürcüstanın Prezidenti Mixeil Kavelaşvilinin bu səfəri dövlətlərarası münasibətlərin inkişafı üçün yeni səhifə açdı. Müzakirə olunan məsələlərə, eləcə də verilən bəyanatlara əsasən vurğulamaq lazımdır ki, dövlətlərarası dostluq, qardaşlıq əlaqələri yeni mərhələyə qədəm qoyub. Bundan sonra da Azərbaycan-Gürcüstan arasındakı münasibətlər inkişaf edəcək və ümumilikdə regionun inkişafına töhfə vermiş olacaq.

Paylaş:

Baxılıb: 519 dəfə