Azərbaycan - İran əlaqələri səmimi münasibətlər əsasında qurulub

Bakı:

24 °C

88 %

2 m/s

Əlaqə

AZ RU EN

Ana səhifə / YAP xəbərləri / Azərbaycan - İran əlaqələri səmimi münasibətlər əsasında qurulub

Azərbaycan - İran əlaqələri səmimi münasibətlər əsasında qurulub

30.04.2025 [19:15]

Natiq Quluzadə

YAP Zəngilan rayon təşkilatının sədri

Azərbaycan və İran xalqları əsrlər boyu mehriban qonşuluq və qardaşlıq şəraitində yaşayıblar. Bu gün dövlətlərarası münasibətlər də məhz bu möhkəm təməl üzərində inkişaf edir. İran Prezidenti Məsud Pezeşkianın aprelin 28-də Azərbaycana rəsmi səfər etməsi də əlaqələrin yüksək səviyyədə olmasının mühüm göstəricisidir.

Səfər zamanı Azərbaycan və İran Prezidentlərinin apardıqları danışıqlar və fikir mübadiləsi əsnasında bir çox önəmli məsələlər müzakirə edilib, Azərbaycan-İran strateji münasibətləri bir daha təsdiqlənib. Ölkələrimiz beynəlxalq təşkilatlar çərçivəsində bir-birini ənənəvi olaraq dəstəkləyirlər. Cənab Prezident İlham Əliyevin mətbuata bəyanatında da qeyd olunduğu kimi, istər BMT olsun, istər İslam Əməkdaşlıq Təşkilatı, ECO, Qoşulmama Hərəkatı və digər təşkilatlar çərçivəsində daim ölkələrimizin nümayəndələri bir-birinin yanındadırlar. Ölkələrimiz bu gün geniş gündəlik əsasında fəaliyyət göstərirlər. Burada həm regional təhlükəsizlik məsələləri önəmli rol oynayır, eyni zamanda, çoxtərəfli əməkdaşlıq üçün gözəl şərait var. Əminliklə demək olar ki, qəbul edilmiş qərarlar Azərbaycan-İran əlaqələrini uzun illər bundan sonra da yüksələn xətlə aparacaq.

Təbii ki, Prezidentlərin keçirdikləri təkbətək və geniş tərkibdə görüşlər zamanı üçtərəfli əməkdaşlıq layihələri də ətraflı müzakirə olunub. Onların arasında təbii olaraq Şimal-Cənub nəqliyyat dəhlizi xüsusi yer tutur. Bu layihə onda iştirak edən bütün ölkələrə çox böyük səmərə gətirəcək. Azərbaycan öz ərazisində bu nəqliyyat dəhlizinin fəaliyyəti üçün bütün lazımi infrastruktur layihələrini həyata keçirib. Hazırda ölkəmiz, sadəcə olaraq, artacaq yükləri nəzərə alaraq öz nəqliyyat imkanlarını və infrastrukturunu genişləndirir. İstər dəniz limanı olsun, dəmir yolu olsun, avtomobil nəqliyyatı olsun - bütün bu istiqamətlər üzrə gözlənilən böyük yük həcmlərini qəbul etmək və ötürmək üçün böyük sərmayə qoyuluşu layihələrinə başlanılıb.

Qeyd edək ki, İran İslam Respublikası Azərbaycan Respublikasının müstəqilliyini 25 dekabr 1991-ci ildə tanımışdır. İki ölkə arasında diplomatik əlaqələr 12 mart 1992-ci ildə qurulmuşdur. Hər iki ölkənin səfirlikləri fəaliyyət göstərir. Azərbaycan öz cənub qonşusu ilə hər iki tərəfdən güclü siyasi iradənin mövcudluğu üzərində qurulan, mehriban qonşuluq, bərabərhüquqluluq, qarşılıqlı hörmət və faydaya əsaslanan əlaqələrin inkişafına önəm verir.

Bu faktı da qeyd edək ki, Azərbaycan ilə İran arasında ikitərəfli və müxtəlif beynəlxalq təşkilatlar çərçivəsində münasibətlərlə yanaşı həm də Azərbaycan-İran-Rusiya, Azərbaycan-İran-Türkiyə, Azərbaycan-İran-Gürcüstan-Türkiyə və 3+3 regional məşvərət mexanizmi çərçivəsində də əməkdaşlıq mövcuddur. Əminliklə demək olar ki, İran Prezidentinin Azərbaycana bu rəsmi dövlət səfəri də ölkələrimiz və xalqlarımız arasında münasibətlərin daha da dərinləşməsinə və möhkəmlənməsinə önəmli töhfə olacaq.

Paylaş:

Baxılıb: 542 dəfə