Biz insan kapitalına və təhsilə ciddi maliyyə vəsaitləri yatırdıq

Bakı:

24 °C

61 %

2 m/s

Əlaqə

AZ RU EN

Ana səhifə / YAP xəbərləri / Biz insan kapitalına və təhsilə ciddi maliyyə vəsaitləri yatırdıq

Biz insan kapitalına və təhsilə ciddi maliyyə vəsaitləri yatırdıq

10.06.2025 [23:09]

Azərbaycan Respublikasının Prezidenti İlham Əliyev iyunun 2-də Bakı Ekspo Mərkəzində keçirilən Bakı Enerji Həftəsinin rəsmi açılış mərasimində çıxışında vurğuladı ki, ölkənin dayanıqlı inkişafında əsas rol oynayan amillərdən biri məhz insan kapitalının gücləndirilməsidir. Dövlət başçısı bildirdi ki, neft-qaz sektorundan əldə olunan gəlirlərin sosial və iqtisadi istiqamətlərə yönəldilməsində təhsil, eləcə də insan potensialının inkişafı xüsusi yer tutur. Bu, Azərbaycanın gələcəyini təmin edən əsas strateji istiqamətlərdən biri kimi müəyyən edilib. Prezident qeyd etdi ki, son 20 il ərzində ölkədə təhsil sahəsinə milyardlarla manat vəsait yatırılıb. Bu sərmayələr yalnız fiziki infrastrukturun yenilənməsi ilə məhdudlaşmır. Məktəblərin və ali təhsil müəssisələrinin müasirləşdirilməsi, müəllim heyətinin ixtisaslaşdırılması, təhsilin məzmununun yenilənməsi və beynəlxalq standartlara uyğunlaşdırılması istiqamətində ardıcıl tədbirlər görülüb. Hazırda Azərbaycanın müxtəlif bölgələrində minlərlə yeni məktəb binası inşa olunub və mövcud təhsil müəssisələri əsaslı şəkildə təmir edilib. Təhsil sistemində aparılan islahatlar nəticəsində ölkədə yeni düşüncəli, yaradıcı və qlobal rəqabətə davamlı gənc nəslin yetişdirilməsi mümkün olub. Bu gün ölkə iqtisadiyyatının bütün sahələrində çalışan yüksək ixtisaslı mütəxəssislərin böyük hissəsi məhz Azərbaycanın müstəqillik dövründə formalaşmış təhsil sisteminin yetirmələridir. Prezidentin çıxışında vurğulandı ki, məhz bu strategiya Azərbaycanı neft gəlirlərindən asılılıqdan çıxarıb, qeyri-neft sektorunun inkişafında əsas aparıcı qüvvəyə – insan kapitalına – çevrilməkdədir. Dövlət başçısı əlavə etdi ki, insan kapitalına sərmayə yalnız daxili ehtiyacları deyil, həm də Azərbaycanın beynəlxalq enerji və iqtisadi layihələrdəki rolunu genişləndirmək məqsədi daşıyır. Xüsusilə energetika, mühəndislik və ətraf mühit sahələrində yerli mütəxəssislərin yetişdirilməsi və onların qabaqcıl texnologiyalara yiyələnməsi vacib strateji məqsəd kimi irəli sürülür. Bu istiqamətdə ölkə daxilində və xaricdə təqaüd proqramları həyata keçirilir, tələbələrin beynəlxalq universitetlərdə təhsil almasına dəstək verilir. Təhsilə yönələn bu strategiya eyni zamanda Azərbaycanın sosial rifahını da əhəmiyyətli dərəcədə yaxşılaşdırıb. Regionlarda yaradılan Peşə Təhsili Mərkəzləri, texniki məktəblər və startap inkubatorları yeni imkanlar açır, xüsusilə gənclər üçün innovasiya və sahibkarlıq sahələrində inkişaf yollarını genişləndirir. Bu da öz növbəsində həm işsizlik səviyyəsinin azalmasına, həm də iqtisadiyyatın daha balanslı şəkildə inkişafına səbəb olur. İlham Əliyev bildirdi ki, 4-cü Sənaye İnqilabı dövründə ölkələrin gücü təbii resursların həcmi ilə deyil, intellektual potensialı ilə ölçülür. Bu baxımdan Azərbaycan öz gələcəyini elm, təhsil və texnologiya üzərində qurur. 2022-ci ildə təsis olunmuş “4-cü Sənaye İnqilabı üzrə Mərkəz” və ölkədə həyata keçirilən “Rəqəmsal Azərbaycan” strategiyası da bu istiqamətdə atılmış mühüm addımlardandır. Prezident çıxışının sonunda qeyd etdi ki, insan kapitalına və təhsilə yatırımlar davam etdiriləcək. Bu sahəyə ayrılan vəsaitin artması təkcə iqtisadi göstəricilərə deyil, cəmiyyətin rifahına və Azərbaycanın beynəlxalq nüfuzuna da müsbət təsir göstərir. Azərbaycanın enerji siyasəti, qlobal layihələrdə iştirakı və tranzit imkanlarının genişlənməsi ilə yanaşı, bu sahədə yetişən mütəxəssislər də ölkəmizin qlobal miqyasda tanınmasına xidmət edir. Prezident İlham Əliyevin vurğuladığı kimi, insan kapitalına qoyulan sərmayə yalnız bu gün üçün deyil, həm də gələcək nəsillər üçün strateji dəyər daşıyır. Azərbaycanın inkişafı və mövqeyinin güclənməsi, məhz bu uzunmüddətli və sistemli siyasətin nəticəsidir.

Şəbnəm Uğurlu,

YAP Laçın rayon təşkilatının 54 saylı ƏPT-nin sədri

Paylaş:

Baxılıb: 493 dəfə