15 İyun – Milli Qurtuluş Günü: Heydər Əliyev liderliyinin Azərbaycanı xilas etdiyi tarix

Bakı:

30 °C

51 %

5 m/s

Əlaqə

AZ RU EN

Ana səhifə / YAP xəbərləri / 15 İyun – Milli Qurtuluş Günü: Heydər Əliyev liderliyinin Azərbaycanı xilas etdiyi tarix

15 İyun – Milli Qurtuluş Günü: Heydər Əliyev liderliyinin Azərbaycanı xilas etdiyi tarix

12.06.2025 [13:11]

Azərbaycan xalqının müasir tarixində elə bir gün var ki, həmin gün təkcə bir siyasi qayıdışın deyil, bütöv bir xalqın milli dirçəlişinin, dövlətinin xilası, sabitliyin, inkişafın, güvənin bərpası kimi dəyərlərin başlanğıcıdır. Bu gün 15 İyun Milli Qurtuluş Günü xalqın yaddaşına həm də ümidlərin yenidən doğulduğu gün kimi həkk olunub.Bu günün qəhrəmanı isə şübhəsiz ki, Azərbaycanın müstəqillik tarixində ən böyük şəxsiyyət Ulu Öndər Heydər Əliyevdir.

Heydər Əliyev sadəcə bir siyasətçi deyildi. O, bütün tarixi çətinliklərə, daxili və xarici təzyiqlərə rəğmən xalqını xilas etməyi bacaran, müdrikliyi ilə zamanını qabaqlayan siyasi lider, xalqı ilə dövləti arasında körpü quran xilaskar, millətinə inanan və onu dövlətçilik məktəbindən keçirən fenomenal şəxsiyyət idi.

1991-ci ildə formal olaraq müstəqilliyini bərpa edən Azərbaycan Respublikası, təəssüf ki, dövlət quruculuğu prosesinə hazırlıqsız şəkildə daxil oldu. O dövrdə idarəetmə təcrübəsizliyi, siyasi ambisiyalar və daxili çəkişmələr ölkəni vətəndaş müharibəsi astanasına gətirib çıxardı. Bu çətin və gərgin şəraitdə xalqın nicat yolu bir nəfərdə cəmləşirdi – Heydər Əliyev şəxsiyyətində. Xalq öz xilaskarına üz tutdu. 15 iyun 1993-cü il tarixində Ulu Öndərin Azərbaycan Ali Sovetinin sədri seçilməsi və siyasi hakimiyyətə qayıdışı ölkəni dağılmaq təhlükəsindən xilas etdi. Məhz bu səbəbdən bu gün Azərbaycan xalqı tərəfindən Milli Qurtuluş Günü kimi tarixləşdirildi və milli yaddaşa həkk olundu.

Heydər Əliyev qayıtdıqdan sonra ilk növbədə ölkədə ictimai-siyasi sabitliyin təmin olunması, qanunsuz silahlı dəstələrin zərərsizləşdirilməsi, dövlət idarəetməsində intizamın bərpası və xarici siyasətdə balanslaşdırılmış kursun qurulması istiqamətində qətiyyətli addımlar atdı.

1994-cü ildə imzalanan “Əsrin müqaviləsi” Azərbaycanın neft strategiyasını dünya iqtisadiyyatına bağladı və iqtisadi inkişaf üçün real zəmin yaratdı. Paralel olaraq hüquqi dövlət quruculuğu istiqamətində mütərəqqi islahatlar başladı. 1995-ci ildə ilk Konstitusiyanın qəbul olunması ilə Azərbaycanın hüquqi çərçivəsi formalaşdı və dövlətçiliyimizin təməli möhkəmləndi.

Biz gənclər üçün 15 İyun sadəcə keçmişin mühüm tarixi deyil – bu gün milli kimliyimizi formalaşdıran, dövlətçilik təfəkkürümüzü yönəldən bir məktəbdir. Gənc nəslin siyasi savadlı, milli maraqlara sadiq, dövlətə bağlı yetişməsi üçün Heydər Əliyevin müəyyən etdiyi yol xəritəsi bu gün də aktuallığını qoruyur.Prezident İlham Əliyev Ulu Öndərin siyasi kursunu uğurla davam etdirərək Azərbaycanı beynəlxalq arenada nüfuzlu və söz sahibi olan bir dövlətə çevirib. Ən önəmlisi isə – bu siyasi kursun zirvəsi 2020-ci ildə 44 günlük Vətən müharibəsində əldə etdiyimiz Zəfərdir. Qələbə ilə bitən bu savaş əslində 1993-cü ildə başlanan milli qurtuluş yolunun qələbəsidir.

Bir gənc olaraq əminliklə deyə bilərəm ki, Milli Qurtuluş Günü – dövlətçilik dərsimizin başlanğıcı, sabitliyin təminatçısı və gələcəyə olan inamın təməlidir. Bu gün bizə bir vəzifə qoyur: keçmişi düzgün dərk edib, gələcəyə daha inamla addımlamaq.Tarixi dəyərlərinə sahib çıxan, siyasi şüuru yüksək olan, Heydər Əliyev ideyaları ilə yaşayan gənclik – Azərbaycanın sabahıdır. Biz bu sabahı milli qurtuluş fəlsəfəsi üzərində qurmaq üçün var gücümüzlə çalışmalı, vətənə, dövlətə, liderə sadiq olmalıyıq.

Aysel Tahirova,

YAP Nərimanov rayon təşkilatının fəal gənci

Paylaş:

Baxılıb: 625 dəfə