Ordumuzla qürur duyuruq

Bakı:

11 °C

93 %

6 m/s

Əlaqə

AZ RU EN

Ana səhifə / YAP xəbərləri / Ordumuzla qürur duyuruq

Ordumuzla qürur duyuruq

25.06.2025 [20:29]

YAP Samux rayon təşkilatında “Konstitusiya və Suverenlik İli” çərçivəsində 26 İyun –Azərbaycan Silahlı Qüvvələri Günü münasibətilə “Ordumuzla qürur duyuruq” adlı dəyirmi masa keçirilib. Dəyirmi masada 44 günlük Vətən Müharibəsi iştirakçıları, qazilər, şəhid ataları, rayonun ictimai- siyasi həyatında fəal olan partiya üzvləri iştirak edirdilər.

Əvvəlcə Ümummilli lider Heydər Əliyevin və torpaqlarımızın bütövlüyü uğrunda canlarından keçən şəhidlərimizin əziz xatirəsi bir dəqiqəlik sükutla yad edilib.

Dəyirmi masada YAP Samux rayon təşkilatının sədri Gündüz Bayramov çıxış edərək Azərbaycan Ordusunun Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsi ilə hərb tarixinin yeni və şanlı salnaməsini yazdığını bildirib. O, rəşadətli Ordumuzun şücaəti, Vətən torpaqları uğrunda apardığı ölüm-dirim savaşı sayəsində ərazi bütövlüyümüz bərpa olunduğunu, haqq, ədalətin yerini tapdığını vurğulayıb. Qeyd edib ki, bu qələbəni xalqımıza bəxş edən Vətən övladları daim hər cür diqqət və qayğı ilə əhatə olunmalıdır.

G.Bayramov həmçinin bildirib ki, belə tədbirlərin təşkilində əsas məqsəd gənc nəslin vətənpərvərlik tərbiyəsinin gücləndirilməsi, Vətən müharibəsi qəhrəmanlarının ölkəmizin ərazi bütövlüyü uğrunda hərbi əməliyyatlarda keçdikləri şərəfli döyüş yolunu böyüməkdə olan nəslə örnək kimi təqdim etməkdir.

Daha sonra dəyirmi masada iştirak edən Azərbaycan Milli Qəhrəmanı Eltun İsgəndərovun atası Xaləddin İsgəndərov, 44 günlük Vətən müharibəsi iştirakçısı ölümündən sonra “Azərbaycan Bayrağı” ordeni ilə təltif edilmiş şəhid leytenant Elvin Məmmədzadənin atası İlham Məmmədov, Sərkar ərazi partiya təşkilatının sədri Şəmistan Yusibov, Azərbaycan Qarabağ Müharibəsi əlilləri, veteranları və şəhid ailələri ictimai birliyinin Samux rayonu üzrə sədri Mirzəmməd Orucov, 44 günlük Vətən müharibəsi iştirakçısı ehtiyatda olan polkovnik-leytenant Aydın Şıxəliyev çıxış edərək xalqımızın Azərbaycan Silahlı Qüvvələrinin yaranma gününü xüsusi ovqat, böyük məmnuniyyət və qürur hissi ilə qeyd etdiyini bildiriblər. Qeyd ediblər ki, 44 günlük Vətən müharibəsi sübut edib ki, Azərbaycan hərbçisi nəinki Qafqaz regionunun ən güclüsüdür, eyni zamanda dünyanın ən peşəkar, ən qətiyyətli döyüşçüsüdür. Azərbaycan Silahlı Qüvvələri dünyanın ən güclü orduları sırasındadır.

Sonda şəhid ataları Xaləddin İsgəndərov, İlham Məmmədov, 44 günlük Vətən Müharibəsi iştirakçısı Vətən Müharibəsi Qəhrəmanı Əli Hüseynov YAP Samux rayon təşkilatı tərəfindən fəxri fərmanla təltif olunublar.

Paylaş:

Baxılıb: 226 dəfə