Xüsusi məna daşıyan Zirvə görüşü

Bakı:

13 °C

82 %

5 m/s

Əlaqə

AZ RU EN

Ana səhifə / YAP xəbərləri / Xüsusi məna daşıyan Zirvə görüşü

Xüsusi məna daşıyan Zirvə görüşü

08.07.2025 [15:10]

İyulun 4-də Xankəndi şəhərində İqtisadi Əməkdaşlıq Təşkilatının (ECO) 17-ci Zirvə görüşü keçirilib.

Prezident İlham Əliyev tədbirdə çıxış edərək Azərbaycanın artıq üçüncü dəfədir ki, ECO-nun Zirvə görüşünə ev sahibliyi etdiyini bildirib. Əvvəlki iki Zirvə görüşünün 2006-cı və 2012-ci illərdə paytaxt Bakıda keçirildiyini diqqətə çatdırıb.

Dövlətimizin başçısı keçirilən Zirvə görüşünün Qarabağda, Xankəndidə təşkil edilməsinin xüsusi mənası olduğunu, işğaldan azad edilmiş torpaqlarımızda artıq bir neçə mühüm beynəlxalq tədbirin keçirildiyini vurğulayıb. Şuşada 2023-cü ildə ECO-nun Nazirlər Şurasının, 2024-cü ildə Türk Dövlətləri Təşkilatının ilk qeyri-rəsmi və bu ilin may ayında Laçında Azərbaycan, Türkiyə və Pakistan rəhbərlərinin üçtərəfli Zirvə görüşünün keçirildiyini bildirib.

Prezident İlham Əliyev çıxışında erməni vandalızmindən, ermənilərin xalqımıza qarşı həyata keçirdiyi düşmənçilik siyasətindən bəhs edərək mövcud reallıqları bir daha görüş iştirakçılarının diqqətinə çatdırıb.

“İşğaldan azad edilmiş bütün Qarabağ və Şərqi Zəngəzurda hazırda genişmiqyaslı bərpa-quruculuq işləri aparılır” - deyən Prezident İlham Əliyev Ermənistan Azərbaycan ərazilərinin təxminən 20 faizini 30 ilə yaxın işğal altında saxladığını, etnik təmizləmə həyata keçirdiyini, bir milyondan artıq soydaşımızı öz dədə - baba torpağından didərgin saldığını qeyd edib.

Dövlətimizin başçısı işğal dövründə Ermənistan şəhər və kəndlərimizi, mədəni və dini abidələrimizi yer üzündən sildiklərini bildirib. 67 məsciddən 65-inin Ermənistan tərəfindən yerlə-yeksan edildiyini, qalan ikisinin isə ciddi zərər gördüyünü, donuz və inək tövləsi kimi istifadə olunduğunu vurğulayıb. Bunun, İslam dininə və dünya müsəlmanlarına qarşı hörmətsizlik və təhqir olduğunu söyləyib.

Ölkə başçısı əlavə edib ki, Qəbiristanlıqlar da vandalizmə məruz qalıb, dağıdılıb, qəbir daşları talanaraq Ermənistana aparılıb. Dövlət qurumlarından ibarət komissiya öz işinə xarici ekspertləri cəlb edərək, beynəlxalq təcrübədən yararlanmaqla işğal nəticəsində Azərbaycana vurulmuş zərəri təxminən 150 milyard ABŞ dolları məbləğində qiymətləndirmişdir.

Prezident İlham Əliyev Ermənistanın torpaqlarımızda bir milyondan çox mina basdırdığını, Vətən müharibəsindən bu günə qədər 400-ə yaxın soydaşımızın mina partlaması nəticəsində həlak olduğunu və ya ağır yaralandığını diqqətə çatdırıb.

Dövlətimizin başçısı çıxışında işgaldan azad edilmiş ərazilərimizdə aparılan genişmiqyaslı quruculuq işlərindən də bəhs edib. Ermənistanın xarabazara çevirdiyi torpaqlarda yeni şəhərlər və kəndlərin inşa edildiyini qeyd edib. “Böyük Qayıdış” Proqramının icra edildiyini bildirib. Prezident İlham Əliyev bu günə qədər 16 şəhər və kəndə keçmiş məcburi köçkünlərin qayıdışının təmin edildiyini, hazırda azad edilmiş ərazilərdə 50 mindən çox insanın yaşayıb, çalışdığını və təhsil aldığını söyləyib.

Çıxışında Ermənistandan deportasiya olunmuş Qərbi azərbaycanlıların hüquqlarına toxunan Ölkə başçısı onların hüquqlarının təmin olunmasının da böyük əhəmiyyət kəsb etdiyini vurğulayıb. “Keçən ay İslam Əməkdaşlıq Təşkilatının İstanbulda keçirilmiş Nazirlər Şurasında Ermənistandan zorla didərgin salınmış azərbaycanlıların qayıdış hüququna dəstək ifadə edən qətnamənin bütün 57 üzv ölkənin yekdil qərarı ilə qəbul olunmasını yüksək qiymətləndiririk. Bu qətnamə ilə yanaşı, Nazirlər Şurasının yekunlarına dair “İstanbul Bəyannaməsi”ndə indiki Ermənistan ərazisindən zorla qovulmuş azərbaycanlıların geri qayıdış hüququ təsdiqlənir və Ermənistanın Qərbi Azərbaycan İcması ilə dialoqu rədd etməsi qınanılır”- deyə Prezident İlham Əliyev bildirib.

Dövlətimizin başçısı Qərbi azərbaycanlıların Ermənistandakı öz dədə-baba torpağına sülh yolu ilə qayıdışının təmin edilməsi sahəsində səylərin bundan sonra da davam etdiriləcəyini söyləyib.

Sahib Şükürov,

YAP Göyçay rayon təşkilatının sədri

Paylaş:

Baxılıb: 245 dəfə