Jurnalistlərin sosial müdafiəsi üçün görülən işlərin davamlılığı təmin edilib

Bakı:

16 °C

72 %

4 m/s

Əlaqə

AZ RU EN

Ana səhifə / YAP xəbərləri / Jurnalistlərin sosial müdafiəsi üçün görülən işlərin davamlılığı təmin edilib

Jurnalistlərin sosial müdafiəsi üçün görülən işlərin davamlılığı təmin edilib

22.07.2025 [14:36]

Toğrul Zeynalov,

YAP Ağdam rayon təşkilatının əməkdaşı

Azərbaycanda informasiya resurslarının iqtisadi müstəqilliyinin gücləndirilməsi və jurnalistlərin sosial müdafiəsinin yaxşılaşdırılması dövlətin həyata keçirdiyi media islahatlarının əsas prioritetlərindəndir. Son illərdə bu sahədə atılan mühüm addımlar medianın inkişafı, onun dayanıqlığının təmin olunması və peşəkar jurnalistikanın formalaşması baxımından mühüm əhəmiyyət kəsb edir. Medianın iqtisadi cəhətdən müstəqil fəaliyyət göstərə bilməsi üçün dövlət tərəfindən çoxşaxəli dəstək mexanizmləri formalaşdırılmış, xüsusilə Medianın İnkişafı Agentliyinin yaradılması bu istiqamətdə yeni mərhələnin başlanğıcı olmuşdur. Agentlik vasitəsilə media subyektlərinə göstərilən maliyyə yardımları, texniki təchizatın gücləndirilməsi, innovativ layihələrin dəstəklənməsi, rəqəmsal transformasiyanın təşviqi və jurnalistlərin peşəkarlığının artırılması üçün keçirilən təlim proqramları informasiya resurslarının iqtisadi sabitliyinə mühüm töhfə verir.

Bununla yanaşı, jurnalistlərin sosial müdafiəsinin gücləndirilməsi istiqamətində də sistemli tədbirlər həyata keçirilir. Prezident İlham Əliyevin təşəbbüsü və tapşırığı ilə çoxsaylı jurnalistlər mənzillə təmin olunmuş, media nümayəndələrinin yaşayış və iş şəraitinin yaxşılaşdırılması məqsədilə müasir infrastruktur qurulmuşdur. Bu addımlar, yalnız jurnalistlərin sosial rifahını artırmaqla kifayətlənmir, eyni zamanda onların peşəkar fəaliyyətlərini daha azad və məsuliyyətli şəkildə həyata keçirmələrinə şərait yaradır. Dövlət səviyyəsində jurnalistlərin hüquqlarının qorunması, etik prinsiplərə əməl edilməsinin təşviqi və peşəkar medianın formalaşdırılması üçün mühüm hüquqi və təşkilati islahatlar həyata keçirilmişdir. Bütün bu tədbirlər nəticəsində Azərbaycan mediası tədricən daha müstəqil, daha çevik və rəqabətqabiliyyətli informasiya mühiti formalaşdırmaqdadır.

Prezident İlham Əliyev Şuşada keçirilən Qlobal Media Forumunda bu məsələyə toxunaraq bildirmişdir: “Biz informasiya resurslarının iqtisadi müstəqilliyinin möhkəmləndirilməsi və jurnalistlərin sosial müdafiəsinin gücləndirilməsi üçün ardıcıl siyasət həyata keçiririk. Media azad və müstəqil olmalıdır ki, cəmiyyətin maraqlarını düzgün şəkildə ifadə edə bilsin.” Bu fikirlər Azərbaycanın informasiya siyasətinin əsas məzmununu və dövlətin medianın inkişafına verdiyi önəmi açıq şəkildə ifadə edir.

Paylaş:

Baxılıb: 295 dəfə