Laçının yeni həyatı: İnkişafın və sülhün simvolu

Bakı:

10 °C

93 %

1 m/s

Əlaqə

AZ RU EN

Ana səhifə / YAP xəbərləri / Laçının yeni həyatı: İnkişafın və sülhün simvolu

Laçının yeni həyatı: İnkişafın və sülhün simvolu

25.08.2025 [22:47]

Azərbaycanın strateji əhəmiyyətə malik Laçın rayonu 1992-ci ilin may ayında Ermənistan silahlı qüvvələri tərəfindən işğal edildi. Bu hadisə yalnız hərbi münaqişənin nəticəsi deyil, eyni zamanda uzun müddət planlaşdırılmış siyasi strategiyanın həyata keçirilməsi idi. Laçın dəhlizi vasitəsilə Ermənistanla Dağlıq Qarabağ arasında birbaşa bağlantı yaratmaq məqsədilə həyata keçirilən bu işğal beynəlxalq hüququn pozulması ilə yanaşı, bölgədə etnik təmizləmə və zəngin mədəni irsin məqsədli şəkildə məhv edilməsi ilə müşayiət olundu.

Laçının düşmənə təhvil verilməsi Azərbaycan xalqının yaddaşında qara ləkə kimi qaldı. Lakin bu ağrılı yaddaş, 2020-ci ildə Azərbaycanın şanlı Zəfəri ilə artıq qürur və fəxarətə çevrildi.

İşğal dövründə Ermənistan silahlı qüvvələrinin Laçın və ətraf ərazilərdə törətdikləri vandalizm aktları, bir çox beynəlxalq təşkilatların hesabatlarında əksini tapıb. Qəsdən dağıdılan yaşayış məntəqələri, mədəni və dini abidələr, təbiətə vurulan ciddi ziyan Laçının necə amansızcasına talan olunduğunu sübut edir. Bu cinayətlər təkcə hərbi deyil, mədəni soyqırımın bariz nümunəsidir.

Laçının azad olunması ilə Azərbaycan Prezidenti İlham Əliyev yeni bir dövrün başlandığını bəyan etdi: "Biz öz doğma torpaqlarımızı işğalçılardan azad edəndən sonra mən demişdim ki, Qarabağı və Şərqi Zəngəzuru cənnətə çevirəcəyik. Cənnətin əgər təsviri varsa, bu gün bax, budur...”

Doğrudan da, Laçın bu gün sadəcə torpaq deyil – həm tarix, həm gələcək, həm də Azərbaycanın qürur vitrinidir.

Laçının bərpası təkcə evlərin və binaların tikintisi ilə məhdudlaşmır. Rayonun əsas və kənd yolları müasir standartlara uyğun şəkildə yenilənir. Kəlbəcər–Laçın avtomobil yolu regionun iqtisadi, turizm və təhlükəsizlik baxımından əhəmiyyətini artırır. Bu nəqliyyat arteriyaları, bölgənin inkişafına dinamizm gətirir və yeni həyatın əsasını qoyur.

Laçının təbii gözəlliyi və turizm imkanları nəzərə alınaraq, müasir infrastruktur layihələri həyata keçirilir. 2025-ci ildə Zerti kəndində istifadəyə verilmiş “Laçın” İstirahət Kompleksi bunun bariz nümunəsidir. Bu məkanda 120 otaqlı hotel, 8 kottec, konfrans və ziyafət zalları yaradılıb. Burada 324 nəfər qonaq qəbul edilə bilər. Kompleks həm regionda iqtisadi canlanma yaradacaq, həm də yerli əhalinin məşğulluğuna töhfə verəcək – burada çalışan 174 nəfərin 122-si məhz azad olunmuş ərazilərin sakinləridir.

2023-cü ilin avqustunda açılan “Hoçazfilm” studiyası Qarabağda yaradıcı sənayenin inkişafının təməl daşlarından biridir. Laçının Hoçaz qayalıqlarından adlanan bu studiya, regionun tarixini, təbiətini və yenidənqurma prosesini dünyaya təqdim etmək üçün mühüm platformadır. Burada yerli və xarici film istehsalçıları üçün lokasiya xidmətləri, çəkiliş avadanlıqları və əməkdaşlıq imkanları yaradılıb. Studiya həm də Qarabağda audiovizual sənətlərin mərkəzi olmağa iddialıdır.

Laçın təkcə geri qaytarılan torpaq deyil – burası indi həm də həyatla dolu, turistlər üçün cazibədar bir məkandır. Yaşıllıqlarla əhatələnmiş parklar, mənzərəli terraslar, müasir istirahət zonaları yerli əhalinin rahatlığını təmin etməklə yanaşı, ölkə və xaricdən gələn qonaqlara da unudulmaz təəssüratlar yaşadır.

Prezident İlham Əliyevin Laçına ilk rəsmi səfəri 2021-ci ilin avqustunda olmuşdur. Həmin səfərdə Laçın Beynəlxalq Hava Limanının təməlqoyma mərasimi keçirildi. Bu strateji hava limanı gələcəkdə bölgənin logistik mərkəzinə çevriləcək.

Prezidentin 2023-cü ilin avqustundakı səfəri, Laçının dirçəlişinin genişmiqyaslı təsdiqi oldu. Bir neçə mühüm obyektin açılışı və təməlqoyma mərasimləri keçirildi:

“Mişni” və “Alxaslı” Su Elektrik Stansiyalarının istifadəyə verilməsi;

Laçın Beynəlxalq Hava Limanında tikinti işləri ilə tanışlıq;

Kəlbəcər–Laçın yolunda görülən işlər;

Mehmanxana kompleksinin təməli;

Mebel fabrikinin açılışı;

“Hoçazfilm” studiyasının təqdimatı;

Tam orta məktəbin əsaslı təmirdən sonra istifadəyə verilməsi;

“Həkəri Balıq Təsərrüfatı”nın açılışı;

Zabux kəndində görülmüş işlərlə tanışlıq;

“Laçın Şəhəri Günü” bayram şənliklərində iştirak.

Bu səfər, təkcə açılışlar silsiləsi deyildi – bu, həm də Azərbaycan dövlətinin Qarabağa qayıdış strategiyasının canlı nümunəsi idi.

26 avqust - Laçın Şəhəri Günü, sadəcə bir tarix deyil. Bu gün Laçın öz tarixini yenidən yazır – dağılmış, işğal edilmiş bir şəhərdən müasir, güclü və yaşanılacaq bir məkana çevrilir. Prezident İlham Əliyevin rəhbərliyi ilə həyata keçirilən strateji layihələr Laçını yenidən Azərbaycanın qürur simvollarından birinə çevirir.

Laçın artıq qayıtdı. Və bu qayıdış – qələbənin, quruculuğun və sülhün simvoludur.

Kənan Quliyev,
Yeni Azərbaycan Partiyası Laçın rayon təşkilatının məsləhətçisi

Paylaş:

Baxılıb: 294 dəfə