Kəlbəcərdə bərpa və quruculuq işləri: nailiyyətlər və perspektivlər

Bakı:

19°C

72%

7m/s

Əlaqə

AZ RU EN

Ana səhifə / YAP xəbərləri / Kəlbəcərdə bərpa və quruculuq işləri: nailiyyətlər və perspektivlər

Kəlbəcərdə bərpa və quruculuq işləri: nailiyyətlər və perspektivlər

28.08.2025 [21:42]

Meydanəli Yolçiyev

YAP Daşkəsən rayon təşkilatının sədri

Avqustun 21-də Prezident İlham Əliyevin Kəlbəcər şəhərinə səfəri rayonun bərpası prosesinin strateji və tarixi əhəmiyyətini bir daha göstərir. 32 illik fasilədən sonra doğma torpağa qayıdan kəlbəcərlilər üçün bu əlamətdar hadisə Azərbaycan xalqının qətiyyətini, dövlətin iradəsini və milli birliyin gücünü bütün dünyaya nümayiş etdirən tarixi an idi. Dövlətimizin başçısı çıxışında həm “Böyük Qayıdış” Proqramının prioritetlərini, həm də rayonun uzunmüddətli inkişaf strategiyasını ətraflı şəkildə izah edib.

Dövlət kəlbəcərlilər üçün yüksək səviyyəli həyat şəraiti yaratmaq üçün bütün imkanları səfərbər edib. Şəhər artıq dünyanın ən mənzərəli və müasir yaşayış məkanlarından birinə çevrilməkdədir. Kəlbəcərdə inşa olunan birinci yaşayış kompleksində sakinlər artıq evlərlə təmin olunublar. İlkin mərhələdə dörd yaşayış kompleksinin inşası nəzərdə tutulur və bu binalarda 10 mindən çox insan yaşayacaq. Bununla yanaşı, şəhərdə işıq, su, təbii qaz, yollar və digər infrastruktur tam şəkildə təmin edilib, minalardan təmizləmə işləri həyata keçirilib. Rayonda məktəb tikintisi davam edir və gələn il istifadəyə veriləcək. Bu infrastruktur layihələri bütün rayonun sosial-iqtisadi inkişafını təmin edəcək və Kəlbəcəri regionun nümunəvi yaşayış məkanına çevirəcək.

Prezident İlham Əliyev çıxışında Kəlbəcərin işğalının Azərbaycan üçün yaratdığı strateji problemlərə də diqqət çəkib. 1992–1993-cü illərdə həmin dövrün rəhbərliyinin xəyanətkar siyasəti və erməni işğalçı qüvvələrinə verilən dəstək nəticəsində yalnız Kəlbəcər deyil, digər ərazilərin də taleyi müəyyənləşib. İşğal dövründə beynəlxalq səviyyədə bu məsələnin həlli üçün kifayət qədər təzyiq göstərilməmiş, bəzi ölkələr işğalçı dövlətə silah və maliyyə dəstəyi verib. Buna baxmayaraq, Azərbaycan xalqı hər zaman dədə-baba torpağına bağlılığını qoruyub saxlayaraq haqqını tələb edib.

Dövlətimizin başçısı Vətən müharibəsinin tarixi əhəmiyyətini də vurğulayıb. 44 günlük müharibə nəticəsində Azərbaycan Silahlı Qüvvələri öz torpaqlarını işğalçılardan azad edib. Kəlbəcər, Laçın və Ağdam bir güllə atmadan, diplomatik yolla geri qaytarılıb. Ermənistanın 2020-ci il 10 noyabr tarixli Üçtərəfli Bəyanatına əsasən kapitulyasiya aktına imza atması Azərbaycanın strateji qələbəsi kimi qiymətləndirilib. 2023-cü ilin 19–20 sentyabr tarixində keçirilən antiterror əməliyyatları isə Azərbaycanın suverenliyinin tam bərpası və gələcək təhlükəsizlik siyasətinin təminatı üçün mühüm addım olub.

Çıxışında Prezident İlham Əliyev Ermənistanla sülh prosesinə də toxunub. Ermənistanla sülh müqaviləsinin müəllifi olaraq Azərbaycanın mövqeyi hər zaman əsas götürülüb. Zəngəzur dəhlizi Azərbaycanı quru yolla Naxçıvan Muxtar Respublikası ilə birləşdirəcək, eyni zamanda beynəlxalq nəqliyyat dəhlizlərinin inkişafına da xidmət edəcək. Bu, ölkəmizin regional və qlobal əhəmiyyətini artıran strateji layihələrdən biridir.

Prezident İlham Əliyev işğaldan azad olunmuş ərazilərdə aparılan genişmiqyaslı quruculuq işlərini də diqqətə çatdırıb. Kəlbəcər şəhəri və kəndləri tamamilə dağıdılmış vəziyyətdə idi, məscidlər, binalar və digər infrastruktur obyektləri məhv edilmişdi. Bu dağıntılar insanlığa sığmayan hərəkətlər kimi qiymətləndirilir. Dövlətimizin əsas məqsədi həmin əraziləri yenidən qurmaq, sakinlər üçün yüksək standartlı yaşayış şəraiti yaratmaqdır. Yeni binalar, məktəblər, yollar və digər sosial obyektlər sayəsində sakinlər həm rahat, həm də təhlükəsiz həyat şəraitinə qovuşur.

Azərbaycan öz torpaqlarında müharibə aparmaqla yanaşı, beynəlxalq arenada da haqlı mövqeyini qoruyub. Vətən müharibəsi və antiterror əməliyyatları nəticəsində yaradılan yeni reallıqlar dünya tərəfindən qəbul olunub və ölkəmizin gücünü, xalqın iradəsini bir daha nümayiş etdirib. Azərbaycan güclü xalq və müstəqil dövlət kimi, heç kimin təzyiqinə boyun əymədən öz maraqlarını qoruyur və qalib dövlət olaraq sülh şəraitində yaşayır.

Paylaş:

Baxılıb: 178 dəfə