Hərb tariximizin ən parlaq səhifələrindən olan antiterror əməliyyatı

Bakı:

15 °C

72 %

10 m/s

Əlaqə

AZ RU EN

Ana səhifə / YAP xəbərləri / Hərb tariximizin ən parlaq səhifələrindən olan antiterror əməliyyatı

Hərb tariximizin ən parlaq səhifələrindən olan antiterror əməliyyatı

18.09.2025 [18:06]

2023-cü ilin 19-20 sentyabr tarixlərində Azərbaycanın Qarabağ iqtisadi rayonunda həyata keçirilən antiterror əməliyyatı xalqımızın tarixində yeni bir qızıl səhifə açdı. Bu Zəfər, Azərbaycan Prezidenti İlham Əliyev cənablarının 19 sentyabr 2024-cü il tarixli sərəncamı ilə Dövlət Suverenliyi Günü kimi rəsmiləşdirildi və üçrəngli bayrağımız suverenliyimizin bərqərar olduğu bütün ərazilərdə əzəmətlə dalğalanır.

Azərbaycan Ordusu antiterror əməliyyatını yüksək peşəkarlıqla və beynəlxalq humanitar hüquq normalarına uyğun həyata keçirdi. Hərbi əməliyyatlar başlamazdan əvvəl bütün hərbi hissələrə ciddi tapşırıq verilərək, Qarabağda yaşayan erməni əhalisinin təhlükəsizliyinin təmin olunması, mülki obyektlərə zərər vurulmaması təmin edildi. Azərbaycan Müdafiə Nazirliyi mobil SMS xidməti və səsgücləndiricilər vasitəsilə mülki əhalini hərbi obyektlərdən uzaq durmağa çağırdı. Qadınlara, uşaqlara, qocalara və xəstələrə tibbi və digər lazımi yardımlar göstərilməsi Azərbaycanın humanist siyasətinin bariz nümunəsi oldu.

Azərbaycan ərazilərinin 30 il davam edən işğalı dövründə həmin Qərb dairələri qərəzli mövqelərdə durmasaydılar, xalqımızı işğal və öz dədə-baba torpaqlarının itirilməs faktı ilə barışdırmaq üçün səylər göstərməsəydilər, erməni faşistlərinin xalqımıza qarşı törətdikləri hərbi cinayətlərə, qətliamlara göz yummasaydılar, qəsbkarları yeni ərazilərin işğalına təhrik etməsəydilər və ən nəhayət, Ermənistanı BMT qətnamələrinin icrasına məcbur etsəydilər bu zaman əlbəttə ki, hərbi əməliyyatlara da heç bir ehtiyac qalmazdı. Lakin bütün bunlar baş vermədi. Buna görə də münaqişənin sülh yolu həlli imkanlarının artıq tam tükəndiyinə əmin olduqdan sonra Azərbaycan Vətən müharibəsinə başladı və cəmi 44 günə parlaq tarixi Qələbə qazanaraq, onilliklər boyunca uzanan problemi həll etdi. Lakin Ermənistan bu acı məğlubiyyətindən lazım olan dərsi almadı. Yenə də məlum Qərb dairələrinin təhrikilə Ermənistan növbəti üç il ərzində özünün silahlı qüvvələrinə aid hərbi birləşmələri Azərbaycanın Qarabağ bölgəsində saxlamaqla gərginliyin artmasına zəmin yaradırdı.

Bu birləşmələrin ölkəmizə qarşı ard-arda törətdikləri silahlı diversiya aktları Azərbaycan tərəfində həm hərbçilər, həm də mülki vətəndaşlar arasında itkilərlə müşayiət olunurdu. Xarici havadarlarının dəstəyi ilə Ermənistan Azərbaycan ərazilərindəki hərbi birləşmələrini insan qüvvəsi və müxtəlif silahlarla daha da gücləndirməyə çalışırdı.Məhz bütün bunlara görə, Azərbaycanın keçən il sentyabr ayının 19-da başladığı anti-terror tədbirləri Ermənistanın ölkəmizə qarşı apardığı məqsədyönlü və planlı terror siyasətinin cavabı kimi gözlənilən idi.

Cəmi 23 saat davam edən antiterror əməliyyatı dövlətimizin və ordumuzun gücünü bir daha göstərdi və yenə də düşmən ağ bayraq qaldıraraq təslim oldu.

Azərbaycan Ordusu 406 kvadrat kilometr ərazini azad etdi, düşmənin yüzlərlə texnikasını məhv etdi və ya ələ keçirdi. Bir günlük əməliyyatdan sonra, uzun müddət Azərbaycan nümayəndələri ilə görüşdən imtina edən Qarabağ erməni icmasının nümayəndələri Yevlax şəhərində görüşə gəlməyə məcbur oldular. Bu görüşdə Qarabağ ermənilərinin reinteqrasiyası müzakirə edildi və onlara Azərbaycan vətəndaşı kimi yeni həyata başlamaq imkanı yaradıldı. Bütün bu proseslər yekun olaraq, 15 oktyabr 2023-cü ildə Prezident, Silahlı Qüvvələrin Ali Baş Komandanı İlham Əliyevin Xankəndi, Xocalı, Xocavənd və Ağdərə şəhərlərində Azərbaycanın Dövlət Bayrağını ucaltması ilə başa çatdı. Bu gün isə, bir vaxtlar torpaqlarımızda yaratdıqları qondarma rejimin marionet liderləri Bakıda təcridxanada oturub öz aqibətlərinin necə olacağı barədə düşünürlər. Onların paytaxtımıza qədər sürüb gələcəklərilə xalqımızı təhdid etdikləri tankları isə, artıq neçə müddətdir ki, Hərbi Qənimətlər Parkının ekspozisiyasında öz layiqli yerlərini tutublar.Bütün bunlara görə də biz hamımız, Ali Baş Komandan cənab İlham Əliyevin dediyi kimi, haqlı olaraq Silahlı Qüvvələrimizlə fəxr edirik.

Bəhruz Ramazanov,

YAP Qusar rayon təşkilatının məsləhətçisi

Paylaş:

Baxılıb: 309 dəfə