Prezident İlham Əliyevin AMEA-nın 80 illiyində strateji baxışı

Bakı:

10 °C

81 %

6 m/s

Əlaqə

AZ RU EN

Ana səhifə / YAP xəbərləri / Prezident İlham Əliyevin AMEA-nın 80 illiyində strateji baxışı

Prezident İlham Əliyevin AMEA-nın 80 illiyində strateji baxışı

05.11.2025 [17:32]

Cari ilin 3 noyabr tarixində Azərbaycan Milli Elmlər Akademiyasının 80 illik yubileyinə həsr olunmuş təntənəli yığıncaq keçirildi. Tədbirdə ölkə Prezidenti İlham Əliyev geniş məzmunlu çıxış edərək Azərbaycan elminin tarixi inkişaf yolu, bu sahədə dövlət siyasətinin prioritet istiqamətləri və qarşıdakı illər üçün müəyyənləşdirilən vəzifələr barədə fikirlərini bölüşdü.

Prezident İlham Əliyev çıxışına yubiley münasibətilə alimləri, elmi ictimaiyyətin nümayəndələrini və qonaqları təbrik etməklə başladı. Dövlət başçısı qeyd etdi ki, Azərbaycan Milli Elmlər Akademiyası ölkəmizin elmi və intellektual tarixində mühüm yer tutur, müxtəlif ictimai-siyasi mərhələlərdən keçərək bu gün milli elmin aparıcı mərkəzinə çevrilib.

Cənab Prezident son illərdə elmin inkişafına göstərilən dövlət qayğısını xüsusi qeyd edərək bildirdi ki, son on ildə elmi tədqiqatların maliyyələşməsi əhəmiyyətli dərəcədə artmış, elmə ayrılan vəsait iki dəfədən çox yüksəlmişdir. Bu, dövlətin elmə verdiyi strateji önəmin bariz göstəricisidir. Prezident İlham Əliyev həmçinin vurğuladı ki, elmin inkişafı yalnız nəzəri istiqamətdə deyil, praktiki nəticələr baxımından da prioritet olmalıdır. Elm iqtisadiyyatın modernləşməsinə, yeni texnologiyaların tətbiqinə və milli innovasiya sisteminin formalaşmasına xidmət etməlidir.

Dövlət başçısı çıxışında Akademiyanın maddi-texniki bazasının gücləndirilməsi istiqamətində görülən işlərdən də danışdı. Son illərdə elmi-tədqiqat institutlarının binalarının yenilənməsi, yeni kitabxanaların və elmi mərkəzlərin yaradılması, gənc alimlər üçün müasir şəraitin təmin olunması kimi layihələr həyata keçirilmişdir. Bu təşəbbüslərin məqsədi elmin müasir tələblərə uyğun inkişafını təmin etmək, gənclərin bu sahəyə marağını artırmaqdır.

Prezident İlham Əliyev qeyd etdi ki, Azərbaycanın azad edilmiş torpaqlarında həyata keçirilən bərpa və quruculuq işlərində də elmin və texnologiyanın rolu mühüm olmalıdır. Qarabağ və Şərqi Zəngəzur iqtisadi rayonlarında yaradılan yeni yaşayış məntəqələrinin planlaşdırılması, ekoloji tarazlığın bərpası və kənd təsərrüfatı texnologiyalarının tətbiqi sahəsində elmi yanaşma əsas şərtlərdəndir.

Dövlət başçısı həmçinin vurğuladı ki, elmi fəaliyyətin əsas məqsədi yalnız nəticə əldə etmək deyil, həm də elm adını şərəflə daşımaq, yeni elmi məktəblər yaratmaq və gənc nəslin elmə marağını stimullaşdırmaqdır. Cənab Prezident, gənc tədqiqatçılara müraciət edərək bildirdi ki, müasir Azərbaycan elminin gələcəyi onların əzmindən, fədakarlığından və yaradıcılıq potensialından asılıdır.

Çıxışının sonunda Prezident İlham Əliyev Ümummilli Lider Heydər Əliyevin elmin inkişafına verdiyi tarixi töhfələri xatırladaraq qeyd etdi ki, bu siyasət bu gün də ardıcıl şəkildə davam etdirilir. Azərbaycan elmi milli maraqlara, müstəqil dövlət quruculuğuna və innovasiyaya əsaslanan yeni dövrə qədəm qoyur.

Cənab Prezidentin çıxışı təkcə yubiley münasibətilə deyil, həm də Azərbaycan elminin gələcək inkişaf strategiyasının təqdimatı xarakteri daşıdı. Tədbir ölkənin elmi ictimaiyyəti üçün mühüm tarixi hadisə kimi yadda qaldı bu çıxışda həm elmi ənənələrə dərin hörmət, həm də gələcəyə yönəlmiş baxış aydın şəkildə ifadə olundu.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 423 dəfə