Zəfər - yaddaşımızın ən gur işığı

Bakı:

15 °C

67 %

5 m/s

Əlaqə

AZ RU EN

Ana səhifə / YAP xəbərləri / Zəfər - yaddaşımızın ən gur işığı

Zəfər - yaddaşımızın ən gur işığı

07.11.2025 [16:02]

Bəzən bir xalqın taleyində elə bir gün doğur ki, o gün təkcə tarixdə yox, ürəklərdə yazılır. Bizim üçün o gün Zəfər Günüdür. Bu gün təkcə bir qələbənin deyil, əsrlərlə sıxılmış qürurun azad nəfəsi, Vətən adlı bir ruhun dirilişi günüdür. Biz bu gün təkcə torpaqlarımızın azadlığını yox, özümüzü, kimliyimizi, ləyaqətimizi, milli heysiyyətimizi azad etdik. Hər qarış torpaq bir ananın göz yaşı, bir əsgərin nəfəsi, bir millətin duasıdır. Şuşada, Füzulidə, Cəbrayılda, Zəngilanda addımbaşı bu torpağın şəhid qoxusu gəlir. Hər daşa, hər budağa sanki “Qarabağ Azərbaycandır!” sözləri hopub. Bu torpaq bizdən çox danışır, bizdən çox susur, amma hər susqunluğunda bir fərəh var – “Mən azadam” deyən torpaq fərəhi. Zəfər Günü bizə təkcə qələbə gətirmədi – məsuliyyət gətirdi. İndi biz bu azadlığı yaşatmaq, onu qorumaq, onu dəyərli saxlamaq borcundayıq. Qalib olmaq çətindir, amma qələbəni daşımaq daha böyük sınaqdır.
Bu Zəfər bizim hamımızındır – döyüş meydanında vuruşan igidlərimizindir, arxada dua edən analarımızındır, alnı açıq, ürəyi Vətənlə döyünən hər bir azərbaycanlınındır. Bəziləri bu günü bayraqla, bəziləri şəkillərlə, bəziləri isə susqunluqla qeyd edir, çünki bəzən qürurun səsi sözlərə sığmır. Bu gün səma daha aydın görünür, çünki artıq azad nəfəs alır. Bu gün torpaq daha səssiz deyil, çünki onun altında yatanlar bizə Zəfəri miras qoyub. Bizim vəzifəmiz bu mirası yaşatmaq, o müqəddəs adın – Azərbaycanın qarşısında başı uca dayanmaqdır.
Bu böyük Qələbənin memarı, Azərbaycan xalqını Zəfərə aparan Ali Baş Komandan, cənab İlham Əliyevdir. Onun dəmir iradəsi, uzaqgörən siyasəti və qətiyyətli rəhbərliyi sayəsində xalqımız bir amal ətrafında birləşdi, dövlət və ordu gücünü bir yumruğa çevirdi. Cənab Prezidentin diplomatik məharəti, milli birliyə verdiyi dəyər və ordumuzun modernləşməsi istiqamətində həyata keçirdiyi islahatlar bu tarixi qələbənin əsas dayağı oldu. Bu gün Qarabağda dalğalanan üçrəngli bayraq, dövlət başçımızın sabit, müdrik və milli maraqlara söykənən siyasətinin ən böyük nəticəsidir. Mən bu müqəddəs gündə bütün xalqımızı Zəfər Günü münasibətilə ürəkdən təbrik edirəm. Şəhidlərimizin ruhu qarşısında ehtiramla baş əyir, qazilərimizin iradəsinə, səbir və mərdliyinə sonsuz təşəkkürümü bildirirəm. Qoy bu torpaqda bir daha savaş deyil, sülhün, birliyin və azadlığın səsi ucalsın. Qoy Zəfər Günü hər ilin yaddaşına millətimizin əbədi qürur günü kimi yazılsın.
Zəfər Günümüz mübarək!

Səfa Ağayev
YAP İmişli rayon təşkilatının sədri

Paylaş:

Baxılıb: 279 dəfə