Qürur Günü

Bakı:

23 °C

55 %

4 m/s

Əlaqə

AZ RU EN

Ana səhifə / YAP xəbərləri / Qürur Günü

Qürur Günü

08.11.2025 [22:37]

Azərbaycanın tarixi və mədəni irsinin incisı sayılan Şuşa şəhərinin azad edilməsi ölkəmizin dövlətçilik salnaməsində xüsusi yer tutur. 2020-ci il noyabrın 8-də Müzəffər Azərbaycan Ordusunun şanlı Zəfəri nəticəsində Şuşanın işğaldan azad olunması tariximizin qızıl səhifəsi kimi qeyd edilir. Prezident İlham Əliyevin Sərəncamına əsasən, bu əlamətdar gün hər il “Şuşa Şəhəri Günü” kimi qeyd olunur.

Şuşanın azad edilməsi təkcə Vətən müharibəsinin gedişində deyil, bütövlükdə regionun siyasi və geostrateji reallığında dönüş nöqtəsi oldu. Şəhərin strateji əhəmiyyəti, onun mədəni və mənəvi mirası, Qarabağın simvolu kimi rolu bu qələbənin dəyərini daha da artırdı.

Prezident İlham Əliyevin rəhbərliyi ilə həyata keçirilən hərbi-siyasi strategiya nəticəsində Azərbaycan tarixi ədaləti bərpa etdi və Şuşa öz sahiblərinə qayıtdı. Dövlət başçısı son çıxışlarında Şuşanın Azərbaycan xalqı üçün milli-mənəvi rəmz olduğunu, şəhərin işğaldan azad edilməsi ilə xalqın qürurunun və tarixi yaddaşının yenidən dirçəldiyini xüsusi vurğulayıb.

“Şuşa Şəhəri Günü” ölkəmizdə geniş şəkildə qeyd olunur, bu münasibətlə respublikanın müxtəlif bölgələrində tədbirlər, sərgilər, konfranslar və mədəni proqramlar təşkil edilir. Qeyd olunan gün Şuşanın Azərbaycanın mədəniyyət paytaxtı statusunu, onun tarixi əhəmiyyətini və müasir inkişafını bir daha önə çıxarır.

Azadlıqdan sonra Şuşada genişmiqyaslı bərpa-quruculuq işləri həyata keçirilir. Prezident İlham Əliyev və Birinci vitse-prezident Mehriban Əliyevanın iştirakı ilə şəhərdə bir sıra mühüm layihələrin icrası sürətlə davam edir. İnfrastrukturun bərpası, tarixi abidələrin yenidən dirçəldilməsi, yol-nəqliyyat layihələri, yaşayış və sosial obyektlərin inşası Şuşanın əvvəlki şöhrətinə qaytarılmasına xidmət edir.

Ənənəvi “Xarıbülbül” festivalının bərpası, Vaqif Poeziya Günlərinin yenidən keçirilməsi şəhərin mədəni həyatına yeni nəfəs verib.

Azərbaycan Prezidentinin 2020-ci il noyabrın 20-də imzaladığı Sərəncama əsasən, “Şuşanın azad olunmasına görə” medalı təsis edilib. Bu medal Şuşanın azad edilməsində xüsusi şücaət və qəhrəmanlıq göstərmiş hərbi qulluqçulara təqdim olunur. Minlərlə əsgər və zabitimiz bu yüksək təltifə layiq görülərək tarixə adlarını yazdırıb.

Şuşa Şəhəri Günü Azərbaycanın ərazi bütövlüyünün bərpa edilməsinin, milli qürur və həmrəyliyin, dövlətçilik iradəsinin rəmzidir. Bu gün təkcə bir şəhərin qurtuluşu deyil, həm də Azərbaycan xalqının zəfər, əzmkarlıq və birlik günüdür.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 380 dəfə