Azərbaycan-Slovakiya əlaqələrinin strateji tərəfdaşlıq zirvəsi

Bakı:

13 °C

71 %

7 m/s

Əlaqə

AZ RU EN

Ana səhifə / YAP xəbərləri / Azərbaycan-Slovakiya əlaqələrinin strateji tərəfdaşlıq zirvəsi

Azərbaycan-Slovakiya əlaqələrinin strateji tərəfdaşlıq zirvəsi

10.12.2025 [15:14]

Dekabrın 8-də Bratislavada cənab Prezident İlham Əliyevin səsləndirdiyi bəyanat Azərbaycan dövlətçiliyinin müasir dövrdə gəldiyi ən ali siyasi mərhələnin ifadəsi kimi tarixə yazıldı. Bu bəyanat təkcə regional təhlükəsizlik məsələlərinə münasibət deyil, həm də Azərbaycan Respublikasının qlobal siyasi nizam içində öz yerini necə müəyyənləşdirdiyinin, hansı prinsiplərlə hərəkət etdiyinin və gələcəyin diplomatik xəritəsini hansı konturlarla formalaşdırdığının manifestidir. Bratislava çıxışı göstərdi ki, Azərbaycan artıq təkcə müstəqil dövlət deyil, həm də regionun siyasi arxitekturasını müəyyən edən strateji mərkəzdir. Bratislava bəyanatının ən böyük üstünlüyü ondadır ki, o, Azərbaycanın 30 illik tarixi ədalətsizliyə verilən qəti cavabını, beynəlxalq münasibətlər sistemində yeni mövqeyini və son dörd il ərzində formalaşdırılmış geosiyasi reallıqları ardıcıllıqla, məntiqi siyasi konstruksiya şəklində təqdim edir. Cənab Prezident İlham Əliyev açıq şəkildə göstərdi ki, Cənubi Qafqazda yeni dövrün başlanğıc nöqtəsi artıq Azərbaycanın qələbəsidir. Bu qələbə diplomatik bəyanatların yox, ordunun gücünün, xalqın birliyinin və dövlət iradəsinin nəticəsidir.

Cənab Prezidentin Bratislava çıxışında bəyan etdiyi mövqelər Cənubi Qafqazda güc balansının tamamilə dəyişdiyini təsdiqləyir. Azərbaycan 2020-ci ildən bəri yalnız öz torpaqlarını azad etmədi, həm də illərlə dondurulmuş və dünya birliyinin məsuliyyətsiz münasibəti səbəbindən həll olunmayan münaqişəni kökündən aradan qaldırdı. Bununla Azərbaycan yeni siyasi düzənin qurulması prosesində aparıcı aktora çevrildi. Bratislavada cənab Prezident İlham Əliyev açıq şəkildə mesaj verdi ki, artıq bölgədə hadisələrin axarını başqaları deyil, Azərbaycan müəyyən edir. Suverenlik, ərazi bütövlüyü və milli maraqlar Bakının qırmızı xəttidir və heç bir beynəlxalq təşkilat, heç bir dövlət bu xətti keçə bilməz. Azərbaycanın siyasi iradəsi yalnız beynəlxalq hüquqa deyil, həm də tarixi haqqın gücünə söykənir. Bu isə onu regionun ən etibarlı siyasi dayağına çevirir. Cənab Prezident İlham Əliyevin bəyanatında beynəlxalq təşkilatlarla bağlı səsləndirilən fikirlər xüsusi diqqətə layiqdir. O, çox aydın bildirdi ki, 30 il ərzində bu qurumlar Azərbaycan xalqının səsinə, işğal gerçəklərinə və milyonlarla insanın hüquqlarının pozulmasına biganə qaldılar. Nə BMT qətnamələri yerinə yetirildi, nə də ATƏT-in vasitəçilik mexanizmi real nəticə verdi. Ədalət yalnız Azərbaycanın öz gücü ilə bərpa olundu. Bu fikir beynəlxalq aləmə çox mühüm mesajdır: Azərbaycan artıq başqalarının ədalətinə ümid bəsləməyən, öz haqqını özü təmin edən, suverenlik prinsiplərini isə kiminsə təzyiqinə qurban verməyən dövlətdir. Bratislava bəyanatı göstərdi ki, Azərbaycan beynəlxalq hüququn mahiyyətini qoruyan, lakin onu manipulyasiya edən qurumların diktəsinə boyun əyməyən müstəqil gücdür. Bratislava bəyanatının siyasi ağırlıq mərkəzlərindən biri Ermənistanla münasibətlərə dair cənab Prezidentin strateji yanaşmasıdır. Dövlət başçısı aydın şəkildə bildirdi ki, bu gün bölgədə sülhün əldə olunması yalnız bir şərtlə mümkündür. Ermənistan revanşizm və manipulyasiya siyasətindən tam və qətiyyətlə imtina etməlidir. Azərbaycanın suverenliyinə qarşı istənilən iddia, tarixi saxtalaşdırmaq cəhdləri və yeni gərginlik yaratmaq təşəbbüsləri artıq əvvəlki kimi cavabsız qalmayacaq. Cənab Prezident İlham Əliyevin bu mövqeyi bölgə üçün çox ciddi siqnaldır. Artıq keçmişin köhnə oyunları bitib, Cənubi Qafqazda yeni siyasi düzən var və bu düzənin mərkəzində Azərbaycan dayanır. Ermənistanın bu reallığı qəbul etməsi, tarixi səhvlərdən nəticə çıxarması və gələcəyə rasional baxması sülhün əsas şərtidir. Bratislava çıxışı enerji təhlükəsizliyi, nəqliyyat dəhlizləri, iqtisadi əməkdaşlıq və strateji tərəfdaşlıq məsələlərində də çox mühüm siqnallar ehtiva edir. Azərbaycan bu gün Avrasiyanın enerji xəritəsini müəyyən edən aparıcı mərkəzlərdən biridir. Transxəzər marşrutları, Cənub Qaz Dəhlizi, Bakı–Tbilisi–Qars xətti və digər qlobal layihələr dövlətimizin geostrateji mövqeyini gücləndirir. Cənab Prezidentin çıxışında səsləndirilən fikirlər göstərdi ki, Azərbaycanın tərəfdaşlığı şərtsiz, mütləq hörmət üzərində qurulmalıdır. Hər bir dövlət və təşkilat bilməlidir ki, Azərbaycanla münasibətlər yalnız bərabər statusda mümkündür. Bu, artıq beynəlxalq siyasətdə Azərbaycanın öz çəkisini nə qədər artırdığını sübut edir. Azərbaycan bu gün təkcə regionda deyil, bütövlükdə Avrasiya məkanında siyasi dinamikanı yönləndirən dövlət kimi çıxış edir. Cənab Prezident İlham Əliyevin Bratislavada səsləndirdiyi bəyanat bu rolun ideoloji çərçivəsini, siyasi mahiyyətini və gələcək inkişaf meyarlarını müəyyənləşdirir.

Bratislava Bəyanatı Azərbaycanın Yeni Dövrünün Siyasi Bəyannaməsidir. Bratislava bəyanatı sadəcə çıxış deyil, Azərbaycan dövlətçiliyinin yeni mərhələsinin siyasi manifestidir. Bu bəyanat göstərir ki, Azərbaycan artıq tarixin müşahidəçisi deyil, tarixi yazan və onu yönləndirən dövlətdir. Suverenliyini öz gücü ilə bərpa etmiş Azərbaycan bu gün siyasi sabitlik, regional liderlik və qlobal tərəfdaşlıq modelinin nümunəsidir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 269 dəfə