Yaşıl inkişafın yeni mərhələsi

Bakı:

31 °C

42 %

4 m/s

Əlaqə

AZ RU EN

Ana səhifə / YAP xəbərləri / Yaşıl inkişafın yeni mərhələsi

Yaşıl inkişafın yeni mərhələsi

12.01.2026 [21:19]

Bu gün ölkəmizin müxtəlif bölgələrində bərpaolunan enerji növlərinin inkişafı Azərbaycanın enerji siyasətinin əsas istiqamətlərindən biri kimi xüsusi önəm daşıyır. Son illər dövlət tərəfindən həyata keçirilən genişmiqyaslı islahatlar, qəbul olunan strateji proqramlar və beynəlxalq tərəfdaşlarla qurulan əməkdaşlıq bərpaolunan enerjinin sürətlə inkişafına güclü təkan verib. Azərbaycan həm iqtisadi, həm siyasi, həm də ekoloji baxımdan dayanıqlı inkişaf modelinə keçid etməklə öz enerji sistemini müasirləşdirir və klassik enerji asılılığını tədricən azaldır. Xızı-Abşeron və Qaradağda qurulan böyük külək və günəş elektrik stansiyaları, Naxçıvanda uzun illərdir uğurla tətbiq edilən alternativ enerji layihələri, Qarabağ və Şərqi Zəngəzurda formalaşdırılan yaşıl enerji zonası ölkəmizin bu sahədə nə qədər ciddi və məqsədyönlü siyasət apardığını göstərir. Bu stansiyaların fəaliyyətə başlaması enerji istehsalının həcmini artırmaqla yanaşı, ölkəmizin enerji təhlükəsizliyini möhkəmləndirir, enerji ixrac imkanlarını genişləndirir, Azərbaycanın beynəlxalq enerji bazarındakı mövqeyini daha da gücləndirir. Bərpaolunan enerji mənbələrinin inkişafı təkcə iqtisadi sahədə deyil, ekoloji mühitin qorunmasında da mühüm rol oynayır.

Karbon emissiyalarının azaldılması, atmosferin çirklənməsinin qarşısının alınması, təbiətə zərərin minimuma endirilməsi kimi məsələlər bu sahədə görülən işlərin əsas məqsədlərindən biridir. Xüsusilə işğaldan azad olunmuş torpaqlarda yaşıl enerji konsepsiyasının tətbiqi həmin ərazilərin müasir standartlarla bərpasına, ekoloji cəhətdən təmiz və ağıllı şəhər modelinin formalaşmasına böyük imkan yaradır. Bu layihələr həmçinin investisiya mühitinin yaxşılaşmasına, beynəlxalq şirkətlərin ölkəmizə marağının artmasına, yeni texnologiyaların tətbiqinə və minlərlə yeni iş yerinin açılmasına şərait yaradır. Bununla yanaşı, bərpaolunan enerji sahəsinin inkişafı elmi-tədqiqat işlərinin genişlənməsinə, yerli mütəxəssis hazırlığının güclənməsinə və ölkəmizin innovativ inkişaf yolunda irəliləməsinə mühüm töhfə verir. Azərbaycan dünyanın enerji gündəmində artıq təkcə neft və qaz ölkəsi kimi deyil, həm də bərpaolunan enerji potensialı yüksək olan, qlobal enerji keçidinə fəal qoşulan dövlət kimi tanınır. Dövlətin ardıcıl siyasəti, güclü iqtisadi baza, beynəlxalq əməkdaşlıq və həyata keçirilən iri enerji layihələri gələcək illərdə bərpaolunan enerjinin ölkəmizin enerji sistemində daha böyük paya sahib olacağını göstərir. Bərpaolunan enerji sahəsində görülən işlər Azərbaycanın dayanıqlı inkişaf strategiyasına xidmət edir, həm iqtisadi gücümüzü artırır, həm də ekologiyanın qorunmasına, gələcək nəsillər üçün daha təmiz, daha sağlam və daha təhlükəsiz mühitin yaradılmasına mühüm töhfə verir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 467 dəfə