Bu gün biz azad edilmiş ərazilərdə içməli su və suvarma layihələrini icra edirik

Bakı:

25 °C

73 %

4 m/s

Əlaqə

AZ RU EN

Ana səhifə / YAP xəbərləri / Bu gün biz azad edilmiş ərazilərdə içməli su və suvarma layihələrini icra edirik

Bu gün biz azad edilmiş ərazilərdə içməli su və suvarma layihələrini icra edirik

14.01.2026 [16:51]

Yanvarın 12-də Azərbaycan Respublikasının Prezidenti İlham Əliyevin sədrliyi ilə Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026-2035-ci illər üzrə Dövlət Proqramına həsr olunan müşavirə keçirilib.

Müşavirədə ölkəmizin başçısı bu istiqamətdə görülən işlərdən, qarşıda duran vəzifələrdən bəhs edib.

Regionların sosial-iqtisadi inkişafı ilə bağlı dövlət proqramlarının həyata keçirilməsindən sonra diqqət yetirilən əsas məsələlərdən biri də ölkə təsərrüfatının yenilənməsi olub. Bu məsələ demək olar ki, kompleks xarakter daşıyıb. Yəni həyata keçirilən tədbirlərdə məqsəd həm əhalinin içməli su ilə təminatını, torpaqların suvarılması üçün meliorasiya infrastrukturunun təzələnməsini, su ehtiyatlarının yaradılmasından ibarət olub.

Ölkəmizdə əhalinin keyfiyyətli içməli su ilə təmin edilməsi və suvarma suyu ilə təminat sosial siyasətin əsas hədəflərindəndir. Ölkə başçısının rəhbərliyi ilə bununla bağlı son illərdə ciddi layihələr reallaşdırılmış və qarşıya hədəflər qoyulmuşdur. Cənab Prezidentin hər bir yaşayış məntəqəsinin keyfiyyətli içməli su ilə təmin olunması barədə tapşırıqlarına uyğun olaraq son illər regionlarda, eləcə də Bakı şəhəri və Abşeron yarımadasında genişmiqyaslı layihələr həyata keçirilmiş və bu sahədə əhəmiyyətli işlər görülmüşdür. Ümumilikdə götürsək, son illər regionlarda yaradılmış yeni su mənbələri əhalinin içməli su təminatını xeyli yaxşılaşdırmışdır.

İşğaldan azad edilmiş ərazilərdə su təsərrüfatının yenidən qurulması, bu istiqamətdə görüləcək işlər də müşavirədə əsas diqqət mərkəzində olan məsələ idi. Düzdür, ötən 5 il ərzində Qarabağ və Şərqi Zəngəzurda qeyd edilən istiqamətlərdə bir çox işlər görülüb, “Böyük Qayıdış” proqram çərçivəsində öz ata-baba yurdlarına qayıdan vətəndaşlarımızın su ilə təminatının təşkil eedilməsi məqsədilə infrastruktur layihələri həyata keçirilib. Ancaq qayıdış prosesinin sürətli xarakter alması və azad olunmuş ərazilərə köç edən vətəndaşlarımızın sayının çoxalması əlavə tədbirlərin görülməsini zərurətə çevirir. Bu mənada Cənab Prezident qeyd edilən istiqamətə diqqət çəkərək bildirdi ki, “Bu gün biz azad edilmiş ərazilərdə içməli su və suvarma layihələrini icra edirik. Son beş il ərzində bir neçə önəmli layihə başa çatıb. Vaxtilə Ermənistan tərəfindən dağıdılmış və yararsız vəziyyətə salınmış su anbarları əsaslı təmir edilib. Onların arasında, ilk növbədə “Sərsəng” su anbarını qeyd etməliyəm. Bu, nəinki azad edilmiş ərazilərdə, bütövlükdə ölkəmizdə ən böyük su anbarlarından biridir. Vaxtilə torpaqlarımız işğal altında olanda Ermənistan dövləti bizə qarşı su terroru da həyata keçirirdi. “Sərsəng” və “Suqovuşan” su anbarlarının sularının bağlanması və sudan bir silah kimi istifadə edilməsi bizə böyük problemlər yaradırdı. Su lazım olan aylarda kəsilirdi, ondan sonra buraxılırdı və bu, böyük daşqınlara səbəb olurdu. Yəni, əslində, Ermənistan dövləti su terroru həyata keçirirdi. Bu gün isə “Suqovuşan” su anbarı, “Sərsəng” su anbarı tamamilə yenidən qurulub. Azad edilmiş digər torpaqlarda - Füzuli rayonunda “Köndələnçay” - üç su anbarı yenidən qurulub, Ağdam rayonunda “Xaçınçay” su anbarı yenidən qurulub. Laçın rayonunda tamamilə yenidən qurulmuş “Zabuxçay” su anbarı bu gün artıq istismardadır. Azad edilmiş ərazilərdə daha iki böyük su anbarının - “Həkəriçay”, “Bərgüşadçay” su anbarlarının tikintisi də nəzərdə tutulur və artıq hazırlıq işləri gedir. Yəqin ki, biz bu il artıq praktik işlərə başlayacağıq”.

Su təchizatı sahəsində həyata keçirilən genişmiqyaslı və sistemli tədbirlər ölkə əhalisinin 95 faizinin keyfiyyətli içməli su ilə təmin olunmasını strateji hədəf kimi müəyyənləşdirir. Bu məqsədlə son illərdə su mənbələrinin qorunması, müasir infrastrukturun qurulması, magistral və paylayıcı xətlərin yenilənməsi, eləcə də regionlarda modul tipli sutəmizləyici qurğuların quraşdırılması istiqamətində ardıcıl işlər görülmüşdür. Aparılan islahatlar əhalinin sağlamlığının qorunmasına, sosial rifahın yüksəldilməsinə və dayanıqlı inkişafın təmin edilməsinə mühüm töhfə verməklə yanaşı, dövlətin sosialyönümlü siyasətinin real nəticələrini əks etdirir.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 502 dəfə