Sosial rifahın yüksəldilməsinə xidmət edən strateji sənəd

Bakı:

26 °C

62 %

2 m/s

Əlaqə

AZ RU EN

Ana səhifə / YAP xəbərləri / Sosial rifahın yüksəldilməsinə xidmət edən strateji sənəd

Sosial rifahın yüksəldilməsinə xidmət edən strateji sənəd

14.01.2026 [17:04]

Yanvarın 12-də Azərbaycan Respublikasının Prezidenti İlham Əliyevin sədrliyi ilə Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026–2035-ci illəri əhatə edən Dövlət Proqramına həsr olunmuş müşavirə keçirilib. Müşavirədə çıxış edən dövlət başçısı proqramın ölkə üçün strateji əhəmiyyət daşıdığını vurğulayaraq, bu sahədə mövcud problemlərin kompleks və mərhələli şəkildə həll ediləcəyini bildirib.

Prezident İlham Əliyev qeyd edib ki, Bakı və Abşeron yarımadasında su təsərrüfatı sahəsində problemlər uzun illər ərzində yığılıb qalıb və bu məsələlər artıq yalnız lokal deyil, ümumi şəhər və ətraf mühit təhlükəsizliyi baxımından ciddi çağırışa çevrilib. Yeni Dövlət Proqramının əsas məqsədi əhalinin fasiləsiz və keyfiyyətli içməli su ilə təmin olunması, kanalizasiya və tullantı suların idarə olunmasının müasir standartlara uyğun qurulması, eyni zamanda yağış sularının yaratdığı fəsadların aradan qaldırılmasıdır.

Dövlət başçısı bildirib ki, hazırda Bakı və Abşeron üzrə əhalinin təxminən 70 faizi fasiləsiz içməli su ilə təmin olunur. Proqramın icrası nəticəsində bu göstəricinin 2035-ci ilə qədər 95 faizə çatdırılması planlaşdırılır. Bunun üçün yeni su mənbələrinin yaradılması, mövcud magistral xətlərin və paylayıcı şəbəkələrin yenilənməsi, su itkilərinin azaldılması əsas vəzifələr sırasında yer alır. Prezident su itkilərinin bəzi ərazilərdə 40–45 faizə çatmasının yolverilməz olduğunu qeyd edərək, bu sahədə müasir ölçmə və rəqəmsal idarəetmə sistemlərinin tətbiq ediləcəyini bildirib.

Çıxışda kanalizasiya sistemlərinin vəziyyətinə də xüsusi diqqət yetirilib. Prezident İlham Əliyev vurğulayıb ki, hazırda əhalinin yalnız təxminən yarısının mərkəzləşdirilmiş kanalizasiya sisteminə çıxışı var. Dövlət Proqramının icrası ilə bu sahədə ciddi irəliləyiş əldə olunacaq və göstərici 95 faizə yüksəldiləcək. Tullantı suların tam təmizlənməsi Xəzər dənizinin qorunması və ekoloji tarazlığın təmin edilməsi baxımından əsas prioritetlərdən biri kimi müəyyən edilib.

Son illər Bakı şəhərində intensiv yağışlar zamanı yaranan problemlərə toxunan dövlət başçısı bildirib ki, mövcud yağış suları sistemi şəhərin müasir tələblərinə cavab vermir. Bu səbəbdən paytaxtın əsas küçə və prospektlərində yeni yağış suyu kollektorlarının inşası nəzərdə tutulur. Görüləcək tədbirlər leysan yağışları zamanı nəqliyyatın iflic olması, küçə və yolların su altında qalması kimi halların qarşısını almağa yönəlib.

Prezident İlham Əliyev çıxışında Azərbaycanda ilk dəfə olaraq dəniz suyunun duzsuzlaşdırılması layihəsinin həyata keçiriləcəyini də açıqlayıb. Bu layihə gələcəkdə əlavə və alternativ içməli su mənbəyi yaradacaq və su təhlükəsizliyinin təmin olunmasında mühüm rol oynayacaq. Eyni zamanda su təsərrüfatı sahəsində rəqəmsallaşma, avtomatlaşdırılmış idarəetmə və qabaqcıl beynəlxalq təcrübənin tətbiqi proqramın əsas istiqamətləri kimi qeyd edilib.

Dövlət başçısı vurğulayıb ki, 2026–2035-ci illəri əhatə edən bu Dövlət Proqramı təkcə texniki infrastruktur layihəsi deyil, sosial rifahın yüksəldilməsinə, ətraf mühitin qorunmasına və Bakının müasir dünya şəhərləri səviyyəsində inkişafına xidmət edən strateji sənəddir. Proqramın icrası dövlət nəzarətində olacaq və mərhələli şəkildə həyata keçiriləcək.

Prezident İlham Əliyev əminliklə bildirib ki, bu proqramın icrası nəticəsində Bakı şəhəri və Abşeron yarımadasında su təchizatı, tullantı və yağış suları sistemində uzun illərdir mövcud olan problemlər aradan qaldırılacaq, əhalinin həyat keyfiyyəti əhəmiyyətli dərəcədə yüksələcək.

Sahib Şükürov

YAP Göyçay rayon təşkilatının sədri

Paylaş:

Baxılıb: 452 dəfə