Azərbaycanın su təhlükəsizliyi strategiyası

Bakı:

25 °C

54 %

1 m/s

Əlaqə

AZ RU EN

Ana səhifə / YAP xəbərləri / Azərbaycanın su təhlükəsizliyi strategiyası

Azərbaycanın su təhlükəsizliyi strategiyası

15.01.2026 [19:11]

Cənab Prezident İlham Əliyevin sədrliyi ilə keçirilmiş müşavirədə qəbul olunan “Bakı şəhərində və Abşeron yarımadasında su təchizatı, yağış və tullantı suları sistemlərinin təkmilləşdirilməsinə dair 2026–2035-ci illər üçün Dövlət Proqramı” paytaxt regionunun inkişafında keyfiyyətcə yeni mərhələnin başlanğıcı kimi dəyərləndirilə bilər. Uzun illər ərzində Bakı və Abşeron yarımadası əhalinin sürətli artımı, urbanizasiya və sənayeləşmə fonunda su və kanalizasiya baxımından ciddi çətinliklərlə üzləşmişdir. Bu problemlərin mərhələli deyil, kompleks şəkildə həll edilməsi artıq tarixi zərurətə çevrilmişdi.

Proqramın əsas üstünlüklərindən biri onun uzunmüddətli və sistemli xarakter daşımasıdır. 2035-ci ilə qədər nəzərdə tutulan tədbirlər təkcə cari çatışmazlıqları aradan qaldırmağa deyil, gələcək onilliklər üçün dayanıqlı model yaratmağa hesablanıb. Proqram çərçivəsində Bakı, Sumqayıt şəhərləri, Abşeron rayonu və 64 yaşayış məntəqəsinin su təminatının əhəmiyyətli dərəcədə yaxşılaşdırılması planlaşdırılır. Fasiləsiz içməli su ilə təmin olunan əhalinin payının 70 faizdən 95 faizə çatdırılması şəhər mühitində gündəlik həyat keyfiyyətinə birbaşa təsir edəcək amildir. Xüsusi diqqət yetirilən məsələlərdən biri su itkilərinin azaldılmasıdır. Hazırda 40–45 faiz səviyyəsində olan itkilər faktiki olaraq mövcud ehtiyatların yarısına yaxınının səmərəsiz istifadəsi deməkdir. Sayğaclaşdırmanın 100 faizə çatdırılması, magistral və paylayıcı şəbəkələrin yenilənməsi bu problemi köklü şəkildə həll etməyə yönəlib. Bu yanaşma göstərir ki, proqram yalnız yeni mənbələr yaratmaqla kifayətlənmir, eyni zamanda mövcud resursların rasional idarə olunmasını əsas prioritet kimi müəyyən edir.

Şəhər sakinlərinin gündəlik həyatında ən çox narahatlıq yaradan məsələlərdən biri də leysan yağışları zamanı yaranan problemlərdir. Kanalizasiya sisteminin zəifliyi səbəbindən nəqliyyatın iflic olması, küçə və həyətlərin su altında qalması artıq Bakının xroniki problemlərindən birinə çevrilmişdi. Dövlət Proqramı çərçivəsində Bakının 30 əsas küçəsində yeni yağış suları kollektor şəbəkəsinin qurulması bu sahədə dönüş nöqtəsi ola bilər. Kanalizasiya xidməti ilə əhatə olunan əhalinin payının 50 faizdən 95 faizə çatdırılması isə şəhər infrastrukturu üçün fundamental dəyişiklik deməkdir.

Cənab Prezident İlham Əliyevin çıxışında qeyd olunduğu kimi, Dövlət Proqramının mühüm komponentlərindən biri də ekoloji balansın qorunmasıdır. Dənizə buraxılan suların 100 faiz təmizlənməsi tələbi Xəzər dənizinin mühafizəsi baxımından strateji əhəmiyyət daşıyır. Hövsan sutəmizləyici stansiyasının modernləşdirilməsi və gücünün artırılması ekoloji risklərin azaldılmasına real töhfə verəcək. Bu, şəhər təsərrüfatı ilə ətraf mühit arasında balansın qorunmasına yönəlmiş məsuliyyətli yanaşmanın göstəricisidir. Nəticə etibarilə, bu proqram paytaxt regionunda yaşayış şəraitini köklü şəkildə dəyişəcək, şəhəri daha dayanıqlı, təhlükəsiz və yaşamaq üçün daha rahat məkana çevirəcək.

Natiq Quluzadə

YAP Zəngilan rayon təşkilatını sədri

Paylaş:

Baxılıb: 570 dəfə