Ölkəmizdə gənclərə ən yüksək diqqət və qayğı göstərilir, uğurlu dövlət gənclər siyasəti həyata keçirilir

Bakı:

10 °C

81 %

9 m/s

AZ RU EN

Ana səhifə / YAP xəbərləri / Ölkəmizdə gənclərə ən yüksək diqqət və qayğı göstərilir, uğurlu dövlət gənclər siyasəti həyata keçirilir

Ölkəmizdə gənclərə ən yüksək diqqət və qayğı göstərilir, uğurlu dövlət gənclər siyasəti həyata keçirilir

02.02.2026 [15:13]

Gənclik cəmiyyətin dinamik inkişafını təmin edən aparıcı sosial qüvvədir. Sağlam, bilikli və vətənpərvər gənc nəslin formalaşdırılması hər bir dövlətin uzunmüddətli inkişaf strategiyasının əsas hədəflərindən biridir. Bu baxımdan Azərbaycanda gənclər siyasəti dövlət siyasətinin prioritet istiqamətlərindən biri kimi müəyyən edilmiş və sistemli şəkildə həyata keçirilməkdədir.

Azərbaycan Respublikasında müasir gənclər siyasətinin əsası Ümummilli Lider Heydər Əliyev tərəfindən qoyulmuşdur. Bu siyasət Prezident İlham Əliyevin rəhbərliyi ilə dövrün tələblərinə uyğun şəkildə davam etdirilərək gənclərin hərtərəfli inkişafı üçün geniş imkanlar yaratmışdır. Dövlətin və cəmiyyətin gələcəyinin gənclərlə bilavasitə bağlı olması nəzərə alınaraq, onların intellektual, sosial və mənəvi potensialının reallaşdırılması dövlət səviyyəsində əsas vəzifələrdən biri kimi müəyyən edilmişdir. Gənclərin inkişafına yönəlmiş investisiyalar ölkənin sabit, firavan və dayanıqlı gələcəyinin təminatı kimi qiymətləndirilir.

Son 30 ilin ümumi mənzərəsi və əldə olunan mühüm nailiyyətlər göstərir ki, Azərbaycan dövləti sağlam və güclü gənc nəslin formalaşdırılması missiyasını uğurla həyata keçirmişdir. Bu müddət ərzində gənclər siyasəti və gənclərlə iş sahəsində mühüm institusional və normativ nəticələr əldə olunmuş, çoxsaylı dövlət proqramları qəbul edilmişdir. Hazırda ölkədə 200-dən artıq gənclər təşkilatının fəaliyyət göstərməsi gənclərin ictimai fəallığının və təşkilatlanma səviyyəsinin göstəricisidir.

Azərbaycan gəncləri beynəlxalq təşkilatlarda və Avropa miqyasında fəal şəkildə təmsil olunur, ölkəmizin haqq səsini müxtəlif beynəlxalq tribunalarda çatdırmaqla milli maraqların müdafiəsində mühüm rol oynayırlar. Eyni zamanda, düzgün müəyyənləşdirilmiş dövlət siyasətinin nəticəsi olaraq gənclərin dövlət idarəçiliyində və qərar qəbuletmə proseslərində iştirakı genişlənmiş, onlar məsul vəzifələrdə layiqincə təmsil olunmağa başlamışlar.

Prezident İlham Əliyevin rəhbərliyi ilə həyata keçirilən gənclər siyasəti gənclərin potensialının reallaşdırılmasına, onların savadlı, peşəkar və vətənpərvər kadrlar kimi yetişməsinə, eləcə də gənc ailələrin sosial müdafiəsinin gücləndirilməsinə istiqamətlənmişdir. Mütəmadi olaraq təkmilləşdirilən bu siyasət gənclərin ictimai-siyasi həyatda rolunun artmasına, onların ölkənin aparıcı qüvvəsinə çevrilməsinə və yaradıcı, innovativ gənc nəslin formalaşmasına şərait yaratmışdır.

Gənc nəslin milli mənlik şüurunun möhkəmləndirilməsi, vətənpərvərlik hisslərinin aşılanması və mənəvi dəyərlər əsasında tərbiyəsi dövlət təsisatlarının əsas prioritetlərindən biridir. Bu məqsədlə gənclər arasında vətənpərvərlik işinin gücləndirilməsi, onların ahəngdar inkişafının təmin edilməsi, asudə vaxtının səmərəli təşkili, psixoloji reabilitasiya, hüquqi və informasiya dəstəyinin göstərilməsi istiqamətində ardıcıl tədbirlər həyata keçirilir.

Qlobal miqyasda mürəkkəb geosiyasi proseslərin, münaqişələrin və böhranların hökm sürdüyü bir şəraitdə Azərbaycanın Prezident İlham Əliyevin rəhbərliyi ilə sabitlik və inkişaf məkanı kimi mövqeyini qoruyub saxlaması gənclər üçün geniş imkanlar açır. Bu imkanlardan səmərəli istifadə edən Azərbaycan gəncliyi cəmiyyətin müxtəlif sahələrində mühüm uğurlar qazanır. Bu baxımdan əminliklə qeyd etmək olar ki, dövlət başçısı Azərbaycan gənclərinin etibarlı dayağı və böyük hamisidir. Gənclər isə öz növbəsində həyata keçirilən siyasətin fəal dəstəkçiləri və davamçıları kimi çıxış edirlər.

Şamo Qasımov

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 234 dəfə