Xocalı Soyqırımı Memorialı – Tarixi Ədalətin Bərpası

Bakı:

25 °C

56 %

1 m/s

Əlaqə

AZ RU EN

Ana səhifə / YAP xəbərləri / Xocalı Soyqırımı Memorialı – Tarixi Ədalətin Bərpası

Xocalı Soyqırımı Memorialı – Tarixi Ədalətin Bərpası

02.03.2026 [10:06]

Cənab Prezident İlham Əliyevin Xocalı Soyqırımı Memorialının açılış mərasimində səsləndirdiyi fikirlər dərin tarixi məzmunu və siyasi qətiyyəti ilə seçildi. Dövlət başçısının müraciəti yalnız anım xarakteri daşımırdı, eyni zamanda xalqımızın milli yaddaşına, ədalətə və Böyük Qayıdış prosesinə verilən mühüm qiymət idi.

Cənab Prezident öz çıxışında Xocalı faciəsinin Azərbaycan xalqının taleyində ən ağır və ağrılı səhifələrdən biri olduğunu vurğulayaraq bildirmişdir ki, 1992-ci ilin fevralında dinc əhaliyə qarşı törədilmiş qətliam insanlığa qarşı yönəlmiş cinayətdir. Qadınların, uşaqların və qocaların xüsusi amansızlıqla qətlə yetirilməsi tarixə qara hərflərlə yazılmışdır və bu həqiqətlər heç vaxt unudulmayacaqdır. Dövlət başçısı qeyd etmişdir ki, şəhidlərin əziz xatirəsi daim uca tutulur və Azərbaycan dövləti onların ruhuna dərin ehtiramla yanaşır.

Mərasimdə səsləndirilən fikirlərdə xüsusi olaraq vurğulanmışdır ki, Xocalı həqiqətlərinin beynəlxalq ictimaiyyətə çatdırılması istiqamətində ardıcıl və məqsədyönlü fəaliyyət davam etdirilir. Bu faciəyə siyasi-hüquqi qiymətin verilməsi, onun dünya miqyasında tanınması Azərbaycan dövlətinin prinsipial mövqeyidir və bu istiqamətdə mübarizə bundan sonra da davam edəcəkdir.

Cənab Prezident həmçinin azad olunmuş ərazilərdə həyata keçirilən genişmiqyaslı bərpa və quruculuq işlərinə toxunaraq bildirmişdir ki, artıq doğma torpaqlara həyat qayıdır. Xocalı sakinlərinin öz yurdlarına qayıdışı, yeni yaşayış məntəqələrinin salınması, infrastrukturun yenidən qurulması Böyük Qayıdış proqramının real nəticəsidir. Bu qayıdış təkcə fiziki məkanın bərpası deyil, həm də ədalətin və tarixi haqqın bərpasıdır.

Dövlət başçısı vurğulamışdır ki, bu memorial gələcək nəsillər üçün bir yaddaş məktəbi olacaq, Xocalı faciəsinin həqiqətlərini yaşadacaq və milli birliyimizi daha da möhkəmləndirəcəkdir. Bu abidə xalqımızın əyilməz ruhunun, şəhidlərimizin müqəddəs xatirəsinə sədaqətin və dövlətimizin gücünün rəmzidir.

Ümumilikdə, memorialın açılış mərasimində səsləndirilən fikirlər keçmişə hörmətin, bu günə qürurun və gələcəyə inamın ifadəsi kimi dəyərləndirilə bilər. Bu müraciət bir daha təsdiq etdi ki, Xocalı faciəsi unudulmayacaq, şəhidlərimizin xatirəsi daim yaşayacaq və Azərbaycan dövləti tarixi ədalətin qorunması və doğma torpaqlarda həyatın tam bərpası istiqamətində qətiyyətli siyasətini davam etdirəcəkdir.

Cəmilə Hüseynova

YAP Naxçıvan şəhər təşkilatının fəalı

Paylaş:

Baxılıb: 475 dəfə