Azərbaycan güləşçilərinin Avropa çempionatındakı tarixi qələbəsi və Prezident İlham Əliyevin yüksək qiymətləndirməsi

Bakı:

25 °C

65 %

8 m/s

AZ RU EN

Ana səhifə / YAP xəbərləri / Azərbaycan güləşçilərinin Avropa çempionatındakı tarixi qələbəsi və Prezident İlham Əliyevin yüksək qiymətləndirməsi

Azərbaycan güləşçilərinin Avropa çempionatındakı tarixi qələbəsi və Prezident İlham Əliyevin yüksək qiymətləndirməsi

04.05.2026 [12:49]

Aprelin 30-da Azərbaycan Respublikasının Prezidenti İlham Əliyev Albaniyanın paytaxtı Tirana şəhərində keçirilmiş Avropa çempionatında böyük uğur qazanan Azərbaycan güləşçiləri ilə görüş keçirdi. Bu görüş həm idman sahəsində əldə olunan nailiyyətlərin qiymətləndirilməsi, həm də gələcək uğurlar üçün mühüm motivasiya baxımından xüsusi əhəmiyyət daşıyırdı.

Prezident çıxışında milli komandamızı səmimi qəlbdən təbrik edərək vurğuladı ki, Avropa çempionatında komanda hesabında birinci olmaq böyük zəhmətin və peşəkarlığın nəticəsidir. Bu uğur bir daha sübut edir ki, Azərbaycan güləşi Avropada lider mövqedədir. Dövlət başçısı qeyd etdi ki, müasir dövrdə güləş üzrə rəqabət xeyli güclənib və belə bir şəraitdə qalib gəlmək xüsusi dəyərə malikdir. O, bəzi yarışları şəxsən izlədiyini və idmançılarımızın yüksək səviyyəli çıxışlarını qürur hissi ilə müşahidə etdiyini bildirdi.

Çıxışda güləşin Azərbaycanda qədim və zəngin ənənələrə malik olduğu xüsusi vurğulandı. Prezident bildirdi ki, bu ənənələr bu gün də uğurla davam etdirilir və sevindirici haldır ki, təcrübəli idmançılarla yanaşı, gənc güləşçilər də yüksək nəticələr göstərirlər. Bu isə ölkədə seleksiya və məşq sisteminin düzgün qurulduğunu göstərir. Dövlət başçısı federasiyanın, məşqçilərin və xüsusilə idmançıların əməyini yüksək qiymətləndirdi.

Görüş zamanı idmanın cəmiyyət üçün əhəmiyyətinə də toxunuldu. Prezident qeyd etdi ki, beynəlxalq yarışlarda Azərbaycan bayrağının yüksəlməsi xalqımızda böyük qürur hissi yaradır və bu, gənc nəslin vətənpərvərlik ruhunda formalaşmasına müsbət təsir göstərir. İdmanın inkişafının dövlət siyasətinin prioritet istiqamətlərindən biri olduğu bir daha diqqətə çatdırıldı.

Prezident həmçinin federasiyaların fəaliyyətinə də toxunaraq bildirdi ki, bu gün bir çox tanınmış idmançılar federasiya rəhbərliyində və məşqçi kimi fəaliyyət göstərirlər. Bu, nəsillər arasında təcrübə ötürülməsinin uğurla həyata keçirildiyini göstərir. Onun sözlərinə görə, nəsillər dəyişsə də, Azərbaycan idmanının uğurları dəyişməz olaraq qalır və daim inkişaf edir.

Dövlət başçısı regionlarda idmanın inkişafına xüsusi diqqət yetirildiyini də vurğuladı. Bildirdi ki, ölkənin müxtəlif bölgələrində müasir Olimpiya İdman kompleksləri və güləş zalları fəaliyyət göstərir. Bu da gənc istedadların üzə çıxarılması və gələcək uğurların təmin olunması üçün geniş imkanlar yaradır.

Görüşdə çıxış edən idmançılar da əldə etdikləri nailiyyətlərdə dövlət qayğısının böyük rol oynadığını qeyd etdilər. Sərbəst güləşçi Turan Bayramov Prezidentə təşəkkür edərək bildirdi ki, bu cür görüşlər onların məsuliyyətini artırır və gələcək qələbələr üçün əlavə stimul verir. Yunan-Roma güləşçisi Həsrət Cəfərov isə Avropa çempionatında qazandığı qızıl medalın onun üçün böyük əhəmiyyət daşıdığını və əldə etdiyi nəticə ilə tarixə düşdüyünü vurğuladı. Qadın güləşçi Jalə Əliyeva da çıxış edərək göstərilən diqqət və qayğıya görə minnətdarlığını bildirdi.

Sonda Prezident bir daha idmançıları təbrik edərək onların yalnız yarış meydanında deyil, gündəlik həyatda da nümunəvi davranış sərgiləmələrinin vacibliyini qeyd etdi. O vurğuladı ki, idmançılar cəmiyyət üçün örnəkdirlər və onların yüksək mənəvi keyfiyyətlərə sahib olması ən az idman uğurları qədər önəmlidir.

Beləliklə, bu görüş Azərbaycan idmanının yüksək inkişaf səviyyəsini və dövlət tərəfindən bu sahəyə göstərilən diqqət və qayğını bir daha nümayiş etdirdi. Qazanılan uğurların davamlı olması üçün möhkəm təməl formalaşdırıldığı açıq şəkildə hiss olunur. Azərbaycan güləşçilərinin beynəlxalq arenadakı qələbələri ölkəmizin nüfuzunu daha da artırır və gələcək nəsillərə böyük motivasiya verir.

Ayaz Novruzov

YAP Culfa rayon Camaldın kənd ərazi partiya təşkilatının sədri

Paylaş:

Baxılıb: 510 dəfə