Diplomatik uğurdan regional sabitliyə

Bakı:

25 °C

61 %

4 m/s

Əlaqə

AZ RU EN

Ana səhifə / YAP xəbərləri / Diplomatik uğurdan regional sabitliyə

Diplomatik uğurdan regional sabitliyə

07.05.2026 [11:13]

Azərbaycanın son dövrlərdə apardığı xarici siyasət kursu regionda sabitliyin möhkəmləndirilməsi və beynəlxalq əməkdaşlığın dərinləşdirilməsi baxımından yeni reallıqlar formalaşdırır. Prezident İlham Əliyevin “Avropa Siyasi Birliyi”nin Zirvə toplantısında videobağlantı vasitəsilə çıxışı bu reallıqların həm siyasi, həm də praktiki müstəvidə təsdiqidir. Xüsusilə diqqət çəkən məqamlardan biri Ermənistanın 2028-ci ildə Zirvə görüşünün Azərbaycanda keçirilməsinə dəstək verməsidir. Bu fakt təkcə diplomatik jest deyil, həm də iki ölkə arasında formalaşmaqda olan etimad mühitinin göstəricisidir. Azərbaycanın təşəbbüsü ilə irəli sürülən və qəbul edilən bu qərar regionda balanslı yanaşmanın təmin olunmasına xidmət edir. Bu, eyni zamanda Azərbaycanın beynəlxalq platformalarda artan nüfuzunun və təşəbbüskarlıq imkanlarının göstəricisidir.

Cənab Prezidentin vurğuladığı kimi, cəmi doqquz ay ərzində sülh şəraitində yaşamağa doğru atılan addımlar artıq konkret nəticələr verir. Bu müddət ərzində formalaşan yeni münasibətlər sistemi regionda uzun illər davam edən qarşıdurma mühitinin aradan qalxması istiqamətində mühüm mərhələ hesab oluna bilər. Ermənistanın Azərbaycanın təşəbbüslərini dəstəkləməsi isə sülhün real və davamlı olacağına dair ümidləri gücləndirir.

Sülh prosesinin ən mühüm göstəricilərindən biri də iqtisadi və logistika sahəsində əldə olunan nəticələrdir. Azərbaycanın uzun illər tətbiq etdiyi tranzit məhdudiyyətlərini birtərəfli qaydada aradan qaldırması regionda yeni iqtisadi əməkdaşlıq mühitinin formalaşmasına şərait yaradıb. Artıq Ermənistanın Azərbaycan ərazisi vasitəsilə minlərlə ton yük daşıması tərəflər arasında qarşılıqlı etimadın praktik müstəvidə təzahürüdür. Eyni zamanda, enerji sahəsində əməkdaşlığın başlanması xüsusi əhəmiyyət kəsb edir. Azərbaycanın ilk dəfə olaraq Ermənistana neft məhsulları ixrac etməsi iqtisadi münasibətlərin yeni mərhələyə qədəm qoyduğunu göstərir. Bu addım yalnız iqtisadi deyil, həm də siyasi baxımdan mühüm mesajdır: regionda qarşılıqlı faydaya əsaslanan əməkdaşlıq modeli formalaşır. Bu kontekstdə Vaşinqtonda əldə olunmuş razılaşmaların rolu da diqqətdən kənarda qalmır. ABŞ paytaxtında imzalanan birgə sənədlər və əldə edilən razılaşmalar sülh prosesinə beynəlxalq legitimlik qazandırmaqla yanaşı, tərəflər arasında dialoqun davamlılığını təmin edir. Bu isə regionda sabitliyin uzunmüddətli əsaslar üzərində qurulmasına xidmət edir.

Ümumilikdə, Azərbaycanın nümayiş etdirdiyi konstruktiv yanaşma və təşəbbüskarlıq regionda yeni əməkdaşlıq mühitinin formalaşmasına təkan verir. Siyasi iradə ilə praktiki addımların vəhdəti göstərir ki, sülh artıq yalnız bəyanatlarda deyil, real həyatda öz əksini tapmağa başlayır. Bu isə həm Azərbaycan, həm də bütövlükdə region üçün yeni inkişaf mərhələsinin əsasını qoyur.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 361 dəfə