Milli Qurtuluşdan Güclü Azərbaycana

Bakı:

26 °C

56 %

4 m/s

Əlaqə

AZ RU EN

Ana səhifə / YAP xəbərləri / Milli Qurtuluşdan Güclü Azərbaycana

Milli Qurtuluşdan Güclü Azərbaycana

10.06.2026 [10:28]

Azərbaycan tarixində xüsusi əhəmiyyətə malik olan 15 İyun – Milli Qurtuluş Günü xalqımızın taleyində dönüş nöqtəsi olmuşdur. Bu tarix yalnız siyasi hakimiyyət dəyişikliyi deyil, həm də müstəqilliyini itirmək təhlükəsi ilə üz-üzə qalan Azərbaycan dövlətinin xilası günü kimi yadda qalmışdır. Məhz bu gündən etibarən Ulu Öndər Heydər Əliyevin rəhbərliyi ilə ölkəmizdə sabitlik, dövlət quruculuğu və inkişaf mərhələsi başlanmışdır.

Ulu Öndər Heydər Əliyev hakimiyyətə qayıtdığı ilk günlərdə demişdi: “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır”. Bu sözlər onun həyat və fəaliyyətinin əsas məqsədini ifadə edirdi. Həqiqətən də, Heydər Əliyevin sonrakı fəaliyyəti göstərdi ki, o, bütün gücünü Azərbaycanın müstəqilliyinin qorunmasına və möhkəmləndirilməsinə yönəltmişdir.

1990-cı illərin əvvəllərində Azərbaycan çox ağır vəziyyət yaşayırdı. Ermənistanın hərbi təcavüzü nəticəsində torpaqlarımız işğal olunur, ölkə daxilində isə siyasi böhran və hakimiyyət çəkişmələri dərinləşirdi. Dövlət idarəçiliyində yaranan problemlər, iqtisadi tənəzzül və cəmiyyətdəki qeyri-sabitlik ölkəni parçalanmaq təhlükəsi ilə üz-üzə qoymuşdu. Hakimiyyətdə olan qüvvələr arasında birlik yox idi və müxtəlif qruplar arasında mübarizə dövlət maraqlarını arxa plana keçirmişdi.

Heydər Əliyev həmin dövrü xarakterizə edərək qeyd etmişdir ki, Azərbaycan böyük təhlükə qarşısında idi. Həm xarici təhdidlər, həm də daxildəki siyasi qarşıdurmalar dövlət müstəqilliyini ciddi təhlükə altına salmışdı. Ermənistanın təcavüzü davam edir, ölkədə isə vətəndaş qarşıdurması təhlükəsi yaranırdı. Belə bir şəraitdə xalq öz gələcəyini yalnız təcrübəli və qətiyyətli liderin rəhbərliyində görürdü.

1993-cü ilin iyununda xalqın tələbi ilə hakimiyyətə qayıdan Heydər Əliyev qısa müddətdə ölkədə sabitliyin bərpasına nail oldu. Ali Sovetin sədri seçilərkən etdiyi çıxışında o, Azərbaycanın dövlət müstəqilliyini qorumağı və inkişaf etdirməyi özünün ən müqəddəs vəzifəsi elan etdi. Bu çıxış əslində Azərbaycanın gələcək inkişaf strategiyasının əsasını təşkil edirdi.Heydər Əliyevin rəhbərliyi ilə ölkədə siyasi sabitlik yaradıldı, dövlət institutları möhkəmləndirildi, qanunçuluq təmin edildi. Azərbaycanın beynəlxalq əlaqələri genişləndi, iqtisadi islahatlara başlanıldı və ölkənin gələcək inkişafının təməli qoyuldu. Məhz həmin dövrdə formalaşdırılan dövlətçilik siyasəti sonrakı uğurların əsasını təşkil etdi.

Ulu Öndərin tarixi missiyasının uğurla həyata keçirilməsinin üç mühüm səbəbi var idi. Birincisi, xalqın ona olan böyük inamı və dəstəyi idi. Azərbaycan xalqı ən ağır günlərdə Heydər Əliyevin ətrafında birləşərək ona etimad göstərdi. İkincisi, onun zəngin siyasi təcrübəsi, güclü iradəsi və liderlik keyfiyyətləri idi. Üçüncüsü isə Vətənə və xalqa olan sonsuz sevgisi idi. Məhz bu amillər Heydər Əliyevin qarşısında duran mürəkkəb vəzifələrin öhdəsindən uğurla gəlməsinə imkan yaratdı. Bu xidmətlərinə görə xalqımız Heydər Əliyevi “Xilaskar” adlandırır. Çünki o, Azərbaycanı vətəndaş müharibəsi, siyasi böhran və dövlət müstəqilliyinin itirilməsi təhlükəsindən xilas etmişdir. Onun fəaliyyəti nəticəsində Azərbaycan dövlətçiliyi qorunmuş, inkişaf etmiş və möhkəmlənmişdir.

Bu gün Azərbaycan xalqı Ulu Öndər Heydər Əliyevin əziz xatirəsini böyük hörmət və ehtiramla yad edir. Onun müəyyən etdiyi siyasi kurs müasir Azərbaycanın inkişafının əsasını təşkil edir. Prezident İlham Əliyevin rəhbərliyi ilə bu siyasət uğurla davam etdirilir və yeni nailiyyətlərlə zənginləşdirilir.Müasir Azərbaycan Ulu Öndərin görmək istədiyi güclü və müstəqil dövlətdir. Bu gün ölkəmizin ərazi bütövlüyü və suverenliyi tam təmin olunmuşdur. Qarabağ və Şərqi Zəngəzur azaddır, Azərbaycan Bayrağı bütün ərazilərimizdə qürurla dalğalanır. Bu uğurlar Ulu Öndərin ən böyük arzularının həyata keçdiyini göstərir.

Prezident İlham Əliyevin qeyd etdiyi kimi, Milli Qurtuluş Günü Azərbaycan tarixində dönüş nöqtəsidir. Həqiqətən də, 15 İyun xalqımızın müstəqillik iradəsinin, dövlətçilik ənənələrinin və milli birliyinin təntənəsidir. Bu gün Azərbaycanın əldə etdiyi bütün uğurların əsasında Ulu Öndər Heydər Əliyevin xilaskarlıq missiyası və uzaqgörən dövlətçilik siyasəti dayanır. Milli Qurtuluş Günü yalnız keçmişə ehtiram deyil, həm də gələcəyə inam günüdür. Bu tarix bizə göstərir ki, xalqın birliyi, güclü liderlik və milli maraqlara sədaqət hər bir çətinliyin öhdəsindən gəlməyə imkan verir. Ulu Öndər Heydər Əliyevin siyasi irsi yaşayır və Azərbaycanı yeni uğurlara aparmağa davam edir.

Gündüz Bayramov

YAP Samux rayon təşkilatının sədri