Yeni Azərbaycan Partiyası Gənclər Birliyi “Qış məktəbi”nə start verdi

Bakı:

15°C

88%

1m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası Gənclər Birliyi “Qış məktəbi”nə start verdi

Yeni Azərbaycan Partiyası Gənclər Birliyi “Qış məktəbi”nə start verdi

11.02.2014 [09:01]

Ölkəmizin ən güclü siyasi qüvvəsi olan Yeni Azərbaycan Partiyasının (YAP) sıralarında birləşən 600 mindən artıq üzvün 40 faizini gənclər təşkil edir. Gənclərin partiyaya axını onların Ulu öndər Heydər Əliyevin ideyalarına sədaqətlərini, Prezident İlham Əliyevin siyasətinə inamlarını ifadə etməklə yanaşı, bir daha bu reallığı da təsdiqləyir ki, gənc nəslin nümayəndələri YAP-ın sıralarına qoşulmaqla öz potensiallarından səmərəli istifadə etmək, dövlətə, dövlətçiliyə xidmət etmək üçün böyük imkanlar qazanırlar. YAP rəhbərliyi gənclərin siyasi fəallığının artırılması, asudə vaxtlarının səmərəli təşkili, beynəlxalq əlaqələrin genişlənməsi, ümumiyyətlə, ayrı-ayrı sahələr üzrə müxtəlif layihələrin həyata keçirilməsinə xüsusi diqqət yetirir. Bu layihələr sırasında 2007-ci ildən başlayaraq hər il keçirilən “Yay” və “Qış” məktəbləri xüsusi qeyd olunmalıdır. Bu layihələrin əsas məqsədi gənclərimizin bir-birini daha yaxından tanımasını, onların arasında səmimi münasibətlərin yaradılmasını, ölkədə ictimai həyatın istənilən sahəsində dinamik inkişaf haqqında onlara dolğun məlumatların çatdırılmasını, siyasətçilərlə, hökumət nümayəndələri ilə görüşlərinin təşkil edilməsini, gələcəkdə müxtəlif sahələrdə çalışacaq gənclərdə liderlik kimi mühüm xüsusiyyətlərin formalaşdırılmasını təmin etməkdir.
Artıq fevralın 10-dan YAP Gənclər Birliyinin təşkil etdiyi “Gənc liderlər” gənc siyasətçilər üçün “Qış məktəbi”nə start verilib. Fevralın 10-dan 14-dək Oğuz rayonunda yerləşən “Afra” oteldə davam edəcək “Qış məktəbi”ndə YAP-ın Bakı şəhəri üzrə rayon təşkilatlarının 100-ə yaxın fəal gəncləri iştirak edirlər. Fevralın 10-da “Qış məktəbi”nin açılışı olub. Layihənin ilk günündə iştirakçılar komandalara bölünüblər, gənclərlə görüşdə müxtəlif mövzular ətrafında fikir mübadiləsi aparılıb.
Qrup rəhbərləri, YAP Siyasi Şurasının üzvləri- “İki sahil” qəzetinin baş redaktoru Vüqar Rəhimzadə və YAP Gənclər Birliyinin sədr müavini Samirə Quliyeva Azərbaycan dövlətinin, Yeni Azərbaycan Partiyasının gənclərə diqqət və qayğısından, onların öz potensiallarından səmərəli istifadə etmələri üçün yaradılan şəraitdən bəhs ediblər. Bu fikir xüsusi qeyd olunub ki, gənclərimiz onlara yaradılan bu şəraitdən səmərəli istifadə etməli, günbəgün qüdrətlənən, güclənən Azərbaycana öz töhfələrini verməlidirlər. Bunun üçün gənclər elmin sirlərinə dərindən yiyələnməli, ölkənin ictimai-siyasi həyatında fəal iştirak etməli, ən əsası Azərbaycan reallıqlarının təbliğində fəal olmalıdırlar. V.Rəhimzadə gənclərə yaradılan bu şəraitə görə ölkə Prezidenti İlham Əliyevə, YAP Sədrinin müavini-İcra katibi, Baş nazirin müavini Əli Əhmədova, YAP İcra katibinin müavinləri Mübariz Qurbanlı və Siyavuş Novruzova minnətdarlığını ifadə edib. O, bildirib ki, gənclərimiz onlara olan etimadı əməli fəaliyyətləri ilə doğrultmağa çalışırlar. “Qış məktəbi”nin əhəmiyyətindən, gənclərin intellektual səviyyəsinin artırılmasına, gənclər arasında əlaqələrin inkişafına öz müsbət təsirini göstərməsindən geniş bəhs edən V.Rəhimzadə eyni zamanda, layihənin əsas məqsədlərindən olan gənclərin istirahətinin lazımi səviyyədə təşkilini də yüksək dəyərləndirib.
YAP Siyasi Şurasının üzvü, YAP Gənclər Birliyinin sədr müavini Samirə Quliyeva partiyanın gənclərin ictimai-siyasi fəallığının, eyni zamanda istirahətlərinin yüksək səviyyədə təşkili istiqamətində atdığı addımlardan danışıb. Bildirib ki, məqsəd gələcəyimiz olan gənclərin hərtərəfli inkişafını təmin etmək, gənc siyasətçi kimi yetişmələrinə dəstək olmaqdır.
“Qış məktəbi” çərçivəsində keçirilən debatlarda müxtəlif mövzularda müzakirələr aparılır, gənclərin biliklərinin artırılmasına xidmət edən tədbirlər təşkil edilir. Layihə çərçivəsində gənclərin Milli Məclisin deputatları, həmçinin, siyasətçilərlə görüşləri də nəzərdə tutulub.
“Qış məktəbi”nin birinci günü “Nikah müqavilələrinin bağlanması və ailə məcəlləsi” mövzusunda seminar keçirilib. Seminarın moderatoru Zaur Quliyev olub. Seminarda ötən illərdə ailənin möhkəmləndirilməsi, qadın və uşaq hüquqlarının müdafiəsi istiqamətində bir sıra hüquqi islahatların aparıldığnı bildirilib. Qeyd edilib ki, hər bir dövlətin və millətin inkişafı, gücü onun ailə institutlarının möhkəmləndirilməsi ilə ölçülür.
Keçirilən görüşlərdə çıxış edən gənclər dövlətin, YAP-ın onlara diqqət və qayğısından razılıqlarını ifadə edərək, bir fikri dəfələrlə vurğulayıblar ki, Yeni Azərbaycan Partiyasının Sədri, ölkə Prezidenti İlham Əliyevin ətrafında sıx birləşərək gələcəyə böyük inamla addımlayırlar.
“Qış məktəbi” çərçivəsində müxtəlif növ idman yarışları da təşkil olunur. Təbii ki, bu oyunların keçirilməsində də əsas məqsəd gənclərin hərtərəfli inkişafını təmin etməkdir. Azərbaycan gənclərinin sağlam böyüməsi hər zaman diqqət göstərilən məsələlərdəndir.
Fevralın 10-dan 14-dək davam edəcək “Qış məktəbi”nin proqramına diqqət yetirdikdə, hər günün gənclərin həyatında özəlliyi ilə seçiləcəyini demək mümkündür. Təşkil olunan müxtəlif mövzularda seminarlarda, debatlarda gənclər həm öz biliklərini artıracaq, həm də bir-birlərini daha yaxından tanımaqla, əlaqələrin qurulmasına və inkişafına nail olacaqlar. Bir sözlə, bu kimi layihələr həm təcrübə, həm də bilik qazanmaq üçün geniş imkandır. Qrup rəhbərləri gəncləri bu imkandan səmərəli istifadə etməyə çağırıblar.

Paylaş:

Baxılıb: 996 dəfə