Siyasi Dialoqdan İqtisadi Əməkdaşlığa

Bakı:

30 °C

33 %

2 m/s

Əlaqə

AZ RU EN

Ana səhifə / YAP xəbərləri / Siyasi Dialoqdan İqtisadi Əməkdaşlığa

Siyasi Dialoqdan İqtisadi Əməkdaşlığa

16.07.2026 [12:23]

Hüseyn Süleymanov

YAP Kəngərli rayon təşkilatının sədr müavini

2026-cı il iyulun 14-də Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində Şuşa şəhərində Azərbaycan Respublikasının Prezidenti İlham Əliyevlə mətbuata bəyanatla çıxış etməsi iki ölkə arasında münasibətlərin yüksək inkişaf səviyyəsini bir daha nümayiş etdirdi. Qarabağın mədəniyyət paytaxtı Şuşada keçirilən bu görüş həm siyasi, həm iqtisadi, həm də humanitar əməkdaşlığın gələcək istiqamətlərinin müəyyənləşdirilməsi baxımından xüsusi əhəmiyyət daşıyır. Prezident İlham Əliyevin bəyanatında səsləndirdiyi fikirlər göstərdi ki, Slovakiya ilə Azərbaycan arasında əməkdaşlıq qarşılıqlı hörmətə, etimada və ortaq maraqlara əsaslanaraq uğurla inkişaf edir.

Dövlətimizin başçısı vurğuladı ki, Slovakiya–Azərbaycan əlaqələrinin inkişafı ardıcıl xarakter daşıyır və son illər ərzində siyasi dialoq daha da intensivləşib. Qarşılıqlı səfərlər, yüksək səviyyəli görüşlər və davamlı təmaslar münasibətlərin strateji məzmununu daha da zənginləşdirir. Bu əlaqələr təkcə ikitərəfli əməkdaşlıq üçün deyil, həm də Avropa ilə Cənubi Qafqaz arasında qarşılıqlı faydalı tərəfdaşlığın möhkəmlənməsi baxımından mühüm rol oynayır.

Prezident İlham Əliyev çıxışında Slovakiyanın Azərbaycanın ərazi bütövlüyünə və suverenliyinə göstərdiyi dəstəyi yüksək qiymətləndirdi. Bu mövqe beynəlxalq hüququn norma və prinsiplərinə hörmətin ifadəsi olmaqla yanaşı, iki ölkə arasında qarşılıqlı etimadın güclənməsinə də mühüm töhfə verir. Azərbaycanın beynəlxalq münasibətlər sistemində etibarlı tərəfdaş kimi mövqeyinin möhkəmlənməsi dost ölkələrlə əməkdaşlığın daha da genişlənməsinə şərait yaradır.

Bəyanatda xüsusi diqqət çəkən məqamlardan biri Slovakiyanın Qarabağ və Şərqi Zəngəzurda aparılan genişmiqyaslı bərpa və yenidənqurma prosesində fəal iştirak etməsi oldu. İşğaldan azad edilmiş ərazilərdə həyata keçirilən layihələrə Slovakiya şirkətlərinin maraq göstərməsi və bu istiqamətdə əməkdaşlığın genişlənməsi Azərbaycanın həyata keçirdiyi bərpa siyasətinə beynəlxalq dəstəyin göstəricisidir. Bu proses regionda iqtisadi canlanmanın sürətlənməsinə və yeni əməkdaşlıq imkanlarının yaranmasına xidmət edir.

Qarabağın yenidən qurulması yalnız infrastruktur layihələrinin icrası ilə məhdudlaşmır. Burada müasir şəhərsalma prinsipləri tətbiq edilir, "ağıllı şəhər" və "ağıllı kənd" konsepsiyaları həyata keçirilir, dayanıqlı inkişaf modeli formalaşdırılır. Slovakiyanın bu prosesdə iştirakı qabaqcıl texnologiyaların tətbiqinə, yeni investisiyaların cəlb edilməsinə və iqtisadi əlaqələrin daha da genişlənməsinə şərait yaradır.

Prezident İlham Əliyev enerji sahəsində əməkdaşlıq perspektivlərinə də toxunaraq Azərbaycanın Avropanın enerji təhlükəsizliyinin təmin edilməsində etibarlı tərəfdaş olduğunu qeyd etdi. Bu gün Azərbaycan təbii qaz ixracını genişləndirir və Avropa ölkələri ilə enerji sahəsində əməkdaşlığını davamlı şəkildə inkişaf etdirir. Slovakiya ilə bu istiqamətdə əməkdaşlığın genişləndirilməsi hər iki ölkənin iqtisadi maraqlarına cavab verir.

Nəqliyyat, logistika, ticarət, sənaye, investisiya və humanitar sahələr də ikitərəfli münasibətlərin mühüm istiqamətləri kimi qiymətləndirildi. Orta Dəhlizin əhəmiyyətinin artdığı müasir dövrdə Azərbaycan Avropa ilə Asiyanı birləşdirən etibarlı nəqliyyat qovşağı kimi çıxış edir. Slovakiyanın bu layihələrdə iştirakı regionlararası iqtisadi əməkdaşlığın inkişafına əlavə imkanlar yaradır.

Şuşada səsləndirilən bəyanatlar bir daha göstərdi ki, Azərbaycan işğaldan azad olunmuş əraziləri beynəlxalq əməkdaşlıq məkanına çevirir. Dost və tərəfdaş ölkələrin Qarabağın bərpasında iştirakı bölgədə uzunmüddətli sabitliyin, iqtisadi inkişafın və qarşılıqlı etimadın möhkəmlənməsinə xidmət edir. Bu baxımdan Slovakiyanın fəal mövqeyi xüsusi əhəmiyyət daşıyır.

Prezident İlham Əliyevin Şuşada verdiyi bəyanat Slovakiya–Azərbaycan münasibətlərinin gələcək inkişaf istiqamətlərini aydın şəkildə ortaya qoydu. Siyasi dialoqun dərinləşməsi, iqtisadi əlaqələrin genişlənməsi, enerji və nəqliyyat sahələrində əməkdaşlığın gücləndirilməsi, eləcə də Slovakiyanın Qarabağın bərpasında fəal iştirakı iki ölkə arasında tərəfdaşlığın yeni mərhələyə yüksəldiyini göstərir. Bu münasibətlər qarşılıqlı etimada əsaslanan, regional sabitliyə və davamlı inkişafa xidmət edən uğurlu əməkdaşlıq nümunəsi kimi bundan sonra da inkişaf edəcəkdir

Paylaş:

Baxılıb: 163 dəfə