Berlin görüşü: Azərbaycan–Almaniya strateji tərəfdaşlığında yeni mərhələnin siyasi və iqtisadi konturları

Bakı:

22 °C

60 %

5 m/s

AZ RU EN

Ana səhifə / YAP xəbərləri / Berlin görüşü: Azərbaycan–Almaniya strateji tərəfdaşlığında yeni mərhələnin siyasi və iqtisadi konturları

Berlin görüşü: Azərbaycan–Almaniya strateji tərəfdaşlığında yeni mərhələnin siyasi və iqtisadi konturları

23.07.2026 [12:09]

Azərbaycan Respublikasının Prezidenti İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri iki ölkə arasında münasibətlərin inkişafında mühüm siyasi hadisə olmaqla yanaşı, Azərbaycanın Avropa ilə strateji tərəfdaşlıq siyasətinin ardıcıl şəkildə həyata keçirildiyini bir daha nümayiş etdirdi. Berlin şəhərində keçirilən yüksək səviyyəli görüşlər, aparılan geniş müzakirələr və imzalanan sənədlər Azərbaycan–Almaniya əməkdaşlığının keyfiyyətcə yeni mərhələyə qədəm qoyduğunu göstərdi.

Prezident İlham Əliyevin Almaniya Federativ Respublikasının Federal Kansleri Fridrix Mertslə keçirdiyi görüşdən sonra mətbuata verdiyi bəyanatda səsləndirilən fikirlər iki ölkə arasında siyasi dialoqun daha da dərinləşdirilməsi, iqtisadi əməkdaşlığın genişləndirilməsi və qarşılıqlı etimada əsaslanan uzunmüddətli tərəfdaşlığın formalaşdırılması baxımından xüsusi əhəmiyyət daşıyır. Dövlət başçısının qeyd etdiyi kimi, imzalanmış sənədlər Azərbaycan–Almaniya münasibətlərini yeni mərhələyə yüksəldəcək və strateji dialoqun inkişafına möhkəm zəmin yaradacaq.

Səfər çərçivəsində imzalanmış “Azərbaycan Respublikası və Almaniya Federativ Respublikası arasında ikitərəfli tərəfdaşlıq üçün strateji gündəliyə dair Birgə Bəyannamə” iki ölkə arasında əməkdaşlığın gələcək istiqamətlərini müəyyən edən mühüm siyasi sənəddir. Bununla yanaşı, Azərbaycan–Almaniya Biznes Şurasının yaradılması iqtisadi əlaqələrin daha da genişlənməsinə, yeni investisiya layihələrinin reallaşmasına və işgüzar dairələr arasında əməkdaşlığın güclənməsinə xidmət edəcək.

Prezident İlham Əliyev bəyanatında vurğuladı ki, hazırda 200-dən artıq Almaniya şirkəti Azərbaycanda uğurla fəaliyyət göstərir və bu göstəricinin yaxın illərdə daha da artacağı gözlənilir. Alman şirkətlərinin sənaye, yüksək texnologiyalar, logistika, infrastruktur, rəqəmsal iqtisadiyyat və bərpaolunan enerji sahələrində daha fəal iştirakı üçün geniş imkanlar mövcuddur. Bu isə Azərbaycanın əlverişli investisiya mühitinin və həyata keçirilən iqtisadi islahatların beynəlxalq səviyyədə yüksək qiymətləndirildiyini göstərir.

Enerji əməkdaşlığı Prezident İlham Əliyevin bəyanatında xüsusi yer tutan istiqamətlərdən biri oldu. Dövlət başçısının qeyd etdiyi kimi, bu ildən etibarən Azərbaycan təbii qazının Almaniyaya ixracına başlanılması enerji sahəsində əməkdaşlığın yeni mərhələsini açmışdır. Hazırda Azərbaycan qazı Avropa İttifaqına üzv on ölkəyə çatdırılır və ölkəmiz Avropanın enerji təhlükəsizliyinin təmin olunmasında etibarlı tərəfdaş kimi mühüm rol oynayır. Eyni zamanda, Azərbaycanın yaşıl enerji potensialının Avropa bazarlarına çıxarılması istiqamətində həyata keçirilən layihələr gələcək əməkdaşlığın perspektivlərini daha da genişləndirir.

Prezident İlham Əliyevin bəyanatında nəqliyyat və logistika sahəsində əməkdaşlıq da xüsusi yer tutdu. Dövlət başçısı vurğuladı ki, Azərbaycan son illərdə müasir nəqliyyat infrastrukturunun yaradılması istiqamətində mühüm layihələr həyata keçirərək Avropa ilə Asiyanı birləşdirən əsas tranzit mərkəzlərindən birinə çevrilmişdir. Orta Dəhlizin inkişafı, Bakı–Tbilisi–Qars dəmir yolu, beynəlxalq dəniz limanı və müasir logistika imkanları ölkəmizin qlobal yükdaşımalarında rolunu əhəmiyyətli dərəcədə artırmışdır. Almaniyanın sənaye, nəqliyyat və logistika sahəsində zəngin təcrübəsi bu istiqamətdə əməkdaşlığın daha da genişlənməsi üçün əlverişli imkanlar yaradır.

Dövlət başçısı bildirdi ki, imzalanmış Birgə Bəyannamənin icrasını təmin etmək məqsədilə bir neçə işçi qrupunun yaradılması nəzərdə tutulur. Bu mexanizm qəbul edilmiş qərarların qısa müddətdə praktik nəticələr verməsinə, iqtisadi əlaqələrin genişlənməsinə və strateji tərəfdaşlığın konkret layihələrlə zənginləşdirilməsinə xidmət edəcək. Bu yanaşma iki ölkənin əməkdaşlığına sistemli və uzunmüddətli xarakter qazandırır.

Prezident İlham Əliyev çıxışında Cənubi Qafqazda formalaşan yeni geosiyasi reallıqlara da toxunaraq vurğuladı ki, Azərbaycan ərazi bütövlüyünü və dövlət suverenliyini tam bərpa etdikdən sonra regionda davamlı sülhün təmin olunması istiqamətində ardıcıl təşəbbüslərlə çıxış edir. Ermənistanla münasibətlərin normallaşdırılması, sülh sazişinin paraflanması və qarşılıqlı əməkdaşlığın inkişafı bölgədə uzunmüddətli sabitlik üçün mühüm zəmin yaradır. Prezident Almaniyanın bu prosesə verdiyi siyasi dəstəyi yüksək qiymətləndirərək, iki ölkə arasında etimada əsaslanan dialoqun gələcəkdə də davam etdiriləcəyinə əminliyini ifadə etdi.

Bəyanatda Avropa İttifaqı ilə münasibətlərin inkişafı da mühüm istiqamətlərdən biri kimi qiymətləndirildi. Almaniyanın Avropa İttifaqının aparıcı üzv dövlətlərindən biri olması Azərbaycan–Avropa İttifaqı əməkdaşlığının genişlənməsi baxımından xüsusi əhəmiyyət daşıyır. Enerji təhlükəsizliyi, yaşıl enerji, rəqəmsal transformasiya, innovasiya və nəqliyyat sahələrində həyata keçirilən birgə təşəbbüslər gələcək əməkdaşlığın əsas prioritetlərini təşkil edir.

Prezident İlham Əliyevin Almaniyaya rəsmi səfəri bir daha göstərdi ki, Azərbaycan milli maraqlara əsaslanan müstəqil xarici siyasət kursunu inamla davam etdirir. İmzalanmış sənədlər və aparılmış müzakirələr yalnız ikitərəfli münasibətlərin deyil, həm də Avropa ilə əməkdaşlığın inkişafı baxımından yeni imkanlar açır. Bu səfər Azərbaycan–Almaniya münasibətlərinin tarixində yeni mərhələnin başlanğıcı olmaqla yanaşı, ölkəmizin beynəlxalq nüfuzunun daha da möhkəmlənməsinə, siyasi dialoqun dərinləşməsinə, iqtisadi və enerji tərəfdaşlığının genişlənməsinə, eləcə də Cənubi Qafqazda sülh və əməkdaşlıq mühitinin güclənməsinə mühüm töhfə verəcəkdir.

Anar Məmmədov

YAP Gədəbəy rayon təşkilatının əməkdaşı

Paylaş:

Baxılıb: 323 dəfə