Azərbaycan dilinin milli kimliyimizdə rolu və Ulu Öndər Heydər Əliyevin dil siyasəti

Bakı:

23 °C

56 %

3 m/s

Əlaqə

AZ RU EN

Ana səhifə / YAP xəbərləri / Azərbaycan dilinin milli kimliyimizdə rolu və Ulu Öndər Heydər Əliyevin dil siyasəti

Azərbaycan dilinin milli kimliyimizdə rolu və Ulu Öndər Heydər Əliyevin dil siyasəti

28.07.2026 [11:31]

Dil hər bir xalqın varlığını, kimliyini və mənəvi dünyasını yaşadan ən müqəddəs dəyərlərdən biridir. Azərbaycan dili də əsrlər boyu xalqımızın milli kimliyini qoruyan, onu bir millət kimi formalaşdıran və gələcəyə daşıyan əsas sütunlardan biri olmuşdur. Bu dil təkcə ünsiyyət vasitəsi deyil, həm də xalqımızın tarixi yaddaşı, mədəni irsi, düşüncə tərzi və dövlətçilik ənənələrinin daşıyıcısıdır.

Azərbaycan dili milli kimliyimizin ayrılmaz hissəsidir. Tarixin müxtəlif mərhələlərində xalqımız müxtəlif siyasi və ictimai çətinliklərlə üzləşsə də, ana dilimiz bu sınaqlardan üzüağ çıxaraq milli ruhumuzu qoruyub saxlamışdır. Xalqımızın ədəbiyyatı, folkloru, musiqisi və mənəvi dəyərləri məhz Azərbaycan dili vasitəsilə formalaşmış və nəsildən-nəslə ötürülmüşdür. Bu baxımdan ana dilimiz milli varlığımızın ən güclü dayağı kimi çıxış edir.

Azərbaycan dilinin dövlət dili kimi möhkəmlənməsi və inkişafı isə Ümummilli Lider Heydər Əliyevin adı ilə qırılmaz şəkildə bağlıdır. Onun uzaqgörən və milli maraqlara söykənən siyasəti nəticəsində dilimiz dövlət səviyyəsində qorunaraq inkişaf etdirilmişdir. Hələ sovet dövründə, 1978-ci ildə qəbul olunan Konstitusiyaya Azərbaycan dilinin dövlət dili kimi daxil edilməsi Ulu Öndərin qətiyyətli siyasi iradəsinin bariz nümunəsi idi. Bu addım milli kimliyimizin qorunması baxımından tarixi əhəmiyyət daşıyırdı.

Müstəqillik illərində Heydər Əliyev Azərbaycan dilinə xüsusi diqqət və qayğı göstərərək onu dövlət siyasətinin prioritet istiqamətlərindən birinə çevirdi. Onun rəhbərliyi ilə Azərbaycan dilinin dövlət idarəçiliyində, təhsil sistemində və ictimai həyatın bütün sahələrində geniş tətbiqi təmin olundu. Latın qrafikalı əlifbaya keçid isə dilimizin inkişafında yeni mərhələnin başlanğıcı oldu. Bu addım Azərbaycan dilinin beynəlxalq aləmdə tanınmasına və müasir dünyaya inteqrasiyasına geniş imkanlar açdı.

Ulu Öndər Heydər Əliyev dilin yalnız qorunmasının deyil, həm də inkişaf etdirilməsinin vacibliyini daim vurğulayırdı. Onun fikrincə, dil xalqın milli sərvəti olmaqla yanaşı, həm də dövlət müstəqilliyinin əsas atributlarından biridir. Bu baxış Azərbaycan dilinin inkişafına sistemli və məqsədyönlü yanaşmanın əsasını qoydu.

Bu gün Ulu Öndərin müəyyən etdiyi dil siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Müasir dövrdə qloballaşmanın təsirləri fonunda Azərbaycan dilinin saflığının qorunması, zənginləşdirilməsi və texnoloji mühitə uyğunlaşdırılması istiqamətində mühüm addımlar atılır. Dövlət səviyyəsində qəbul olunan qərarlar və proqramlar dilimizin inkişafını daha da sürətləndirir. Ölkə Başçısı Azərbaycan dilinə daim yüksək qiymət verərək onun saflığının qorunmasını, zənginləşdirilməsini və bütün sahələrdə geniş tətbiqini dövlət siyasətinin prioritet istiqamətlərindən biri kimi müəyyən etmişdir. Onun rəhbərliyi ilə həyata keçirilən siyasət nəticəsində Azərbaycan dili müasir dövrün tələblərinə uyğun inkişaf edir, beynəlxalq aləmdə nüfuzu daha da artır.

Ana dilimizə göstərilən bu diqqət və qayğı Azərbaycan xalqının milli-mənəvi dəyərlərinə verilən yüksək qiymətin bariz nümunəsidir. Azərbaycan dili bizim qürurumuz, kimliyimiz və gələcəyimizdir.

Azərbaycan dili bu gün həm milli-mənəvi dəyərlərimizin qoruyucusu, həm də müasir elmi, texnoloji və mədəni inkişafın əsas vasitələrindən biridir. Onun beynəlxalq səviyyədə tanınması və öyrənilməsi isə Azərbaycan dövlətinin artan nüfuzunun göstəricisidir.

Nəticə etibarilə, Azərbaycan dili milli kimliyimizin təməl daşı, mənəvi varlığımızın ifadəsi və gələcəyimizin təminatıdır. Ulu Öndər Heydər Əliyevin dil siyasəti bu dəyərin qorunmasına və inkişafına möhkəm zəmin yaratmış, Cənab Prezident İlham Əliyevin rəhbərliyi ilə bu siyasət yeni mərhələyə qədəm qoymuşdur. Hər bir azərbaycanlının borcu ana dilimizi qorumaq, zənginləşdirmək və onu gələcək nəsillərə saf şəkildə çatdırmaqdır.

Ana dilimiz bizim keçmişimiz, bu günümüz və sabahımızdır.

David Həsənov

YAP Naxçıvan şəhər təşkilatının əməkdaşı

Paylaş:

Baxılıb: 323 dəfə