Azərbaycan dili – milli kimliyimizi əbədi yaşadan mənəvi sərvət

Bakı:

27 °C

47 %

3 m/s

Əlaqə

AZ RU EN

Ana səhifə / YAP xəbərləri / Azərbaycan dili – milli kimliyimizi əbədi yaşadan mənəvi sərvət

Azərbaycan dili – milli kimliyimizi əbədi yaşadan mənəvi sərvət

29.07.2026 [15:18]

Hər bir xalqın varlığını yaşadan, onun tarixini, mədəniyyətini və milli kimliyini gələcək nəsillərə çatdıran ən böyük mənəvi sərvət ana dilidir. Dil sadəcə ünsiyyət vasitəsi deyil, xalqın yaddaşı, düşüncə tərzi və mənəvi dünyasının aynasıdır. Azərbaycan dili də əsrlər boyu xalqımızın keçdiyi tarixi yolu, milli dəyərlərini və zəngin mədəni irsini qoruyaraq bu günümüzə qədər yaşatmışdır. Məhz buna görə də ana dilimizin qorunması və inkişaf etdirilməsi hər bir vətəndaşın mənəvi məsuliyyəti, dövlətimizin isə daim diqqət mərkəzində saxladığı mühüm məsələlərdən biridir.

Azərbaycan dilinin dövlət dili kimi möhkəmləndirilməsi yolunda Ümummilli Lider Heydər Əliyevin xidmətləri müstəsna əhəmiyyət daşıyır. Sovet dövründə milli dillərin sıxışdırıldığı, rus dilinin üstün mövqeyə çıxarıldığı mürəkkəb siyasi şəraitdə Azərbaycan dilinin hüquqlarını qorumaq böyük cəsarət və uzaqgörənlik tələb edirdi. Məhz Ulu Öndərin qətiyyətli mövqeyi nəticəsində 1978-ci ildə qəbul edilən Azərbaycan SSR Konstitusiyasında "Azərbaycan Sovet Sosialist Respublikasının dövlət dili Azərbaycan dilidir" müddəası təsbit olundu. Həmin dövr üçün bu qərar yalnız hüquqi dəyişiklik deyil, həm də xalqımızın milli özünüdərkinin və gələcək müstəqilliyinin mühüm təminatlarından biri idi.

Müstəqilliyimizin bərpasından sonra Azərbaycan dili dövlət quruculuğunun əsas sütunlarından birinə çevrildi. 1995-ci il Konstitusiyasında dövlət dili statusunun təsbit olunması bu istiqamətdə atılan ən mühüm addımlardan biri oldu. Sonrakı illərdə Prezident İlham Əliyevin rəhbərliyi ilə dilimizin qorunması, inkişaf etdirilməsi və müasir dövrün tələblərinə uyğun zənginləşdirilməsi istiqamətində ardıcıl tədbirlər həyata keçirildi. Latın qrafikalı nəşrlərin genişləndirilməsi, Azərbaycan Milli Ensiklopediyasının hazırlanması, dilçiliyin inkişafına dair dövlət proqramlarının qəbul edilməsi, dövlət dilinin saflığının qorunmasına yönəlmiş fərman və sərəncamlar Azərbaycan dilinin mövqeyini daha da möhkəmləndirdi.

Qloballaşmanın sürətləndiyi müasir dövrdə xarici dillərin öyrənilməsi zəruri olsa da, ana dilinə sevgi və ehtiram hər zaman üstün tutulmalıdır. Dilimizin saflığını qorumaq, onu düzgün işlətmək, xüsusilə də gənc nəslə sevdirərək ötürmək milli kimliyimizin qorunmasının vacib şərtlərindən biridir. Azərbaycan dilinin zənginliyi, ahəngdarlığı və ifadə imkanları xalqımızın mənəvi gücünün, mədəni səviyyəsinin və tarixi irsinin ən parlaq göstəricilərindəndir.

Azərbaycan dili bizim milli sərvətimiz, dövlətçiliyimizin əsas rəmzlərindən və xalqımızın birliyinin təcəssümüdür. Bu dili qorumaq yalnız dilçilərin və ya dövlət qurumlarının deyil, hər bir azərbaycanlının müqəddəs borcudur. Ana dilimizə göstərdiyimiz qayğı əslində tariximizə, mədəniyyətimizə və gələcəyimizə göstərilən qayğıdır. Çünki dili yaşayan xalqın gələcəyi də yaşayır.

Araz Xudadanov

YAP Sabunçu rayon təşkilatının sədri

Paylaş:

Baxılıb: 306 dəfə