NAXÇIVANIN GÜNƏŞ STRATEGİYASI: YAŞIL ENERJİ QOVŞAĞINA DOĞRU BÖYÜK ADIM

Bakı:

24 °C

69 %

4 m/s

Əlaqə

AZ RU EN

Ana səhifə / YAP xəbərləri / NAXÇIVANIN GÜNƏŞ STRATEGİYASI: YAŞIL ENERJİ QOVŞAĞINA DOĞRU BÖYÜK ADIM

NAXÇIVANIN GÜNƏŞ STRATEGİYASI: YAŞIL ENERJİ QOVŞAĞINA DOĞRU BÖYÜK ADIM

12.08.2026 [17:09]

Prezident İlham Əliyevin Muxtar Respublikaya 17-ci səfəri regionun enerji müstəqilliyini beynəlxalq ixracat səviyyəsinə qaldırır

Naxçıvan Muxtar Respublikası geostrateji mövqeyi və zəngin təbii resursları ilə Azərbaycanın sosial-iqtisadi xəritəsində xüsusi yer tutur. Uzun illər blokada şəraitində yaşamasına baxmayaraq, dövlət tərəfindən həyata keçirilən ardıcıl tədbirlər sonucunda region davamlı inkişaf yoluna çıxıb. Azərbaycan Prezidenti İlham Əliyevin Naxçıvana reallaşdırdığı 17-ci səfəri də bu inkişafın növbəti mərhələsini müəyyənləşdirən mühüm hadisəyə çevrilib.

Səfər çərçivəsində aparılan müzakirələr və elan olunan layihələr göstərir ki, Muxtar Respublika artıq təkcə öz daxili tələbatını ödəyən diyar deyil, həm də regionun əsas "yaşıl enerji" istehsalçısı və ixracatçısı olmaq iddiasındadır. Ölkə miqyasında aparılmış hərtərəfli təhlillər və monitorinqlər Günəş enerjisi istehsalı üçün ən ideal məkanın məhz Naxçıvan olduğunu aşkara çıxarıb.

İllik günəşli saatların çoxluğu və əlverişli iqlim şəraiti bərpaolunan enerji qurğularının yüksək səmərəliliklə işləməsinə imkan verir. Bu potensialdan maksimal istifadə etmək məqsədilə artıq 600 hektardan çox torpaq sahəsi ayrılıb və burada yüzlərlə meqavat gücündə müasir Günəş elektrik stansiyalarının inşası nəzərdə tutulur.

“Naxçıvanda Günəş enerjisinin potensialı çox böyükdür. Aparılan monitorinq və dəqiq təhlil əsasında Günəş elektrik enerjisinin istehsalı üçün Azərbaycan ərazisində ən əlverişli məkan Naxçıvandır.”

— İlham ƏLİYEV

Layihələrin ən diqqətəşayan məqamlarından biri özəl sektorun bu sahəyə fəal cəlb olunmasıdır. Azərbaycandakı əlverişli investisiya mühiti, hüquqi zəmanətlər və layihələrin iqtisadi gəlirliliyi xarici və yerli investorların diqqətini cəlb edir. Özəl kapitalın cəlb edilməsi dövlət büdcəsinə əlavə yük yaratmadan iri həcmli enerji layihələrini reallaşdırmağa imkan verir.

Hazırda Naxçıvanın mövcud 200 meqavatlıq generasiya gücü Muxtar Respublikanın daxili elektrik enerjisi ehtiyacını tam şəkildə qarşılayır. Lakin qəbul olunmuş Dövlət Proqramı yalnız bu günün deyil, gələcəyin tələblərini də nəzərə alır. Sürətli iqtisadi artım və yeni sənaye sahələrinin yaradılması gələcəkdə daha böyük enerjiyə tələbat yaradacaq.

Bununla yanaşı, istehsal ediləcək əlavə "yaşıl enerji" gücləri Zəngəzur dəhlizi və qonşu ölkələrlə mövcud olan kommunikasiya xətləri vasitəsilə xarici bazarlara çıxarılacaq. Bu isə Naxçıvanın regional enerji təhlükəsizliyindəki rolunu artırmaqla bərabər, Muxtar Respublikanın büdcə gəlirlərinə də böyük töhfə verəcək.

Nəticə etibarilə, Naxçıvanda başlanan günəş enerjisi dönüşü ölkənin ümumi "yaşıl iqtisadiyyat" strategiyasının vacib tərkib hissəsidir. Yeni stansiyaların istismara verilməsi regional inkişafa təkan verməklə yanaşı, ərazidə yeni iş yerlərinin açılmasına və sosial rifahın yüksəlməsinə şərait yaradacaq.

Fərəcli Jalə

YAP Ordubad rayon təşkilatının fəalı

Paylaş:

Baxılıb: 441 dəfə