26 Avqust – Laçın Şəhəri Günü: Zəfərdən dirçəlişə uzanan yol

Bakı:

26 °C

47 %

4 m/s

Əlaqə

AZ RU EN

Ana səhifə / YAP xəbərləri / 26 Avqust – Laçın Şəhəri Günü: Zəfərdən dirçəlişə uzanan yol

26 Avqust – Laçın Şəhəri Günü: Zəfərdən dirçəlişə uzanan yol

25.08.2026 [16:13]

Azərbaycan tarixinin ən şərəfli səhifələrindən biri olan Vətən müharibəsində
əldə edilən tarixi Qələbə xalqımızın uzun illər davam edən torpaq həsrətinə son
qoydu. Bu böyük Zəfərin nəticəsində işğal altında olan torpaqlarımız azad edildi,
Azərbaycanın ərazi bütövlüyü və tarixi ədalət bərpa olundu. Bu baxımdan 26
Avqust – Laçın Şəhəri Günü Azərbaycan xalqının yaddaşında xüsusi əhəmiyyət
daşıyan tarixi günlərdən biridir.Laçın şəhərinin azad olunması Azərbaycanın
dövlətçilik tarixində mühüm hadisədir. 2020-ci il 1 dekabr tarixində Laçın rayonu
Azərbaycana qaytarılsa da, Laçın şəhəri, Zabux və Sus kəndləri həmin mərhələdə
Azərbaycanın nəzarətində deyildi. 2022-ci il avqustun 26-da isə Azərbaycan
Ordusunun Laçın şəhərinə daxil olması ilə şəhər üzərində dövlətimizin tam
nəzarəti təmin edildi. Prezident İlham Əliyevin Sərəncamı ilə 26 avqust tarixinin
Laçın şəhəri günü kimi təsis edilməsi də bu tarixi hadisənin əbədiləşdirilməsinə
xidmət edir.Laçının azadlığı Azərbaycan Ordusunun gücünün, dövlətimizin siyasi
iradəsinin və xalqımızın milli həmrəyliyinin növbəti təntənəsi oldu. Bu hadisə həm
də uzun illər doğma yurdlarından ayrı düşmüş laçınlıların öz torpaqlarına
qayıdışına yol açdı. Beləliklə, Laçın üçün yeni bir mərhələ – Böyük Qayıdış və
quruculuq dövrü başladı.Laçının azad olunmasından sonra şəhərin və rayonun
bərpası dövlət siyasətinin mühüm istiqamətlərindən birinə çevrildi. İşğal dövründə
ciddi dağıntılara məruz qalan şəhər qısa müddət ərzində tamamilə yenidən
qurulmağa başladı. Müasir şəhər infrastrukturu yaradıldı, yaşayış binaları,
məktəblər, tibb müəssisələri, inzibati və sosial obyektlər inşa edildi. Bu proses
Azərbaycanın yalnız torpaqlarını azad etmədiyini, eyni zamanda həmin əraziləri ən
müasir standartlara uyğun şəkildə yenidən qurduğunu nümayiş etdirir.
Laçın şəhərinin dirçəldilməsi Böyük Qayıdış proqramının ən mühüm
nümunələrindən biridir. 2023-cü il mayın 27-dən etibarən keçmiş məcburi

köçkünlərin Laçın şəhərinə qayıdışı başladı. Mayın 28-də – Müstəqillik Günündə
Prezident İlham Əliyev Laçına qayıdan ilk sakinlərə evlərinin açarlarını təqdim
etdi. Bununla da illərlə davam edən həsrətin yerini doğma yurdda yeni həyatın
sevinci tutdu.Bu gün Laçın artıq yalnız azad edilmiş şəhər deyil, Azərbaycanın
sürətli quruculuq və inkişaf siyasətinin simvollarından biridir. Şəhərdə müasir
yaşayış məhəllələri salınır, sosial obyektlər yaradılır, yollar və mühəndis-
kommunikasiya infrastrukturu yenilənir. Laçın Beynəlxalq Hava Limanının
istifadəyə verilməsi isə regionun nəqliyyat imkanlarının genişləndirilməsi və
turizm potensialının inkişafı baxımından mühüm əhəmiyyət daşıyır. Laçının təbii
gözəllikləri də şəhərin gələcək inkişafında mühüm rol oynayır. Dağlıq relyefi,
zəngin təbiəti, meşələri və çayları ilə seçilən Laçın Azərbaycanın turizm potensialı
yüksək olan bölgələrindən biridir. Burada yaradılan müasir turizm infrastrukturu
şəhərin gələcəkdə Azərbaycanın mühüm turizm mərkəzlərindən birinə çevrilməsi
üçün geniş imkanlar yaradır. Laçın həm də milli-mədəni irsimizin mühüm
ünvanlarından biridir. Şəhərin və rayonun tarixi-mədəni irsinin qorunması, milli
sənətkarlıq ənənələrinin yaşadılması və gələcək nəsillərə çatdırılması Böyük
Qayıdış prosesinin mühüm tərkib hissəsidir. “Laçın Şəhəri Günü” çərçivəsində
keçirilən tədbirlərdə xalq sənətkarlığı nümunələrinin, rəsm əsərlərinin, musiqi və
teatr proqramlarının nümayiş etdirilməsi şəhərin mədəni həyatının yenidən
canlanmasının göstəricisidir.Laçının bərpası eyni zamanda Azərbaycanın sülh və
inkişaf gündəliyinin mühüm göstəricisidir. İşğaldan azad edilmiş ərazilərdə
aparılan genişmiqyaslı quruculuq işləri ölkəmizin öz resursları hesabına böyük
layihələri həyata keçirmək imkanlarını nümayiş etdirir. Qarabağ və Şərqi
Zəngəzurun yenidən qurulması Azərbaycanın iqtisadi potensialının, siyasi
iradəsinin və milli həmrəyliyinin daha bir göstəricisidir.26 Avqust həm də
şəhidlərimizin müqəddəs xatirəsinin ehtiramla yad edildiyi gündür. Çünki bu günə
gəlib çatmaq Azərbaycan Ordusunun qəhrəman əsgər və zabitlərinin, Vətən

uğrunda canından keçən şəhidlərimizin fədakarlığı hesabına mümkün olub. Onların
göstərdiyi qəhrəmanlıq Azərbaycan xalqının yaddaşında əbədi yaşayacaq.Laçının
timsalında biz bir daha görürük ki, Azərbaycanın Zəfəri yalnız hərbi qələbə ilə
məhdudlaşmır. Bu Qələbə doğma torpaqlara qayıdış, şəhər və kəndlərin yenidən
qurulması, insanların təhlükəsiz və firavan həyatının təmin olunması ilə
tamamlanır. Prezident İlham Əliyevin rəhbərliyi ilə həyata keçirilən Böyük
Qayıdış siyasəti məhz bu məqsədlərə xidmət edir.Bu gün Laçın şəhərində
dalğalanan üçrəngli Azərbaycan Bayrağı illər sonra doğma yurda qayıdan
insanların sevincini, xalqımızın qürurunu və dövlətimizin gücünü özündə əks
etdirir. Laçının yenidən qurulması Azərbaycanın gələcəyə inamının, milli
iradəsinin və qurucu gücünün canlı nümunəsidir. 26 Avqust – Laçın Şəhəri Günü
xalqımız üçün həm Zəfərin, həm qayıdışın, həm də dirçəlişin rəmzidir. Bu
əlamətdar gün bir daha göstərir ki, Azərbaycan öz tarixini, torpaqlarını və milli-
mənəvi dəyərlərini qorumağa qadirdir. Laçının işğaldan azad olunması ilə başlayan
yeni tarix isə artıq quruculuq, inkişaf və firavanlıq salnaməsinə çevrilir.Laçın bu
gün azad, abad və həyatla nəfəs alan şəhərdir. Dünənin həsrətinin, bu günün
qürurunun və sabahın böyük ümidlərinin qovuşduğu Laçın Azərbaycanın Zəfər
tarixinin parlaq səhifələrindən biri kimi əbədi yaşayacaq.
YAP Samux rayon təşkilatının əməkdaşı Lalə Məmmədova