YAP Nəsimi rayon təşkilatında bələdiyyə üzvlüyünə gənc namizədlərlə görüş keçirilib

Bakı:

11 °C

87 %

8 m/s

Əlaqə

AZ RU EN

Ana səhifə / YAP xəbərləri / YAP Nəsimi rayon təşkilatında bələdiyyə üzvlüyünə gənc namizədlərlə görüş keçirilib

YAP Nəsimi rayon təşkilatında bələdiyyə üzvlüyünə gənc namizədlərlə görüş keçirilib

16.12.2014 [10:55]

Dekabrın 23-də keçiriləcək bələdiyyə seçkilərinin təbliğat-təşviqat kampaniyası çərçivəsində Yeni Azərbaycan Partiyası (YAP) Nəsimi rayon təşkilatında bələdiyyə üzvlüyünə gənc namizədlərlə görüş keçirilib. Görüş iştirakçıları əvvəlcə Ümummilli lider Heydər Əliyevin xatirəsini bir dəqiqəlik sükutla yad ediblər.
Tədbiri giriş sözü ilə açan YAP Nəsimi rayon təşkilatının sədri, millət vəkili Məlahət İbrahimqızı öncə bələdiyyə seçkilərinin əhəmiyyətindən bəhs edib. Çıxışına davam edən millət vəkili bildirib ki, qələbələr partiyası olan Yeni Azərbaycan Partiyası bu seçkilərə də üstün nüfuzunun və yüksək ictimai dəstəyin fonunda gedir.
Onun sözlərinə görə, builki bələdiyyə seçkilərində YAP, o cümlədən partiyanın Nəsimi rayon təşkilatı tərəfindən irəli sürülmüş namizədlər içərisində gənclər xüsusilə fərqlənirlər. “Belə ki, YAP Nəsimi rayon təşkilatı tərəfindən irəli sürülmüş 19 namizəddən yarısını məhz gənclər təşkil edir. Onlar müxtəlif sahələri təmsil edən gənclərdir. Düşünürəm ki, onlar çalışdıqları kollektivlərdə böyük nüfuza malikdirlər və qarşıdan gələn seçkilərdə də xalq tərəfindən dəstəklənəcəklər”.
Millət vəkili onu da deyib ki, seçkinin nəticəsindən asılı olmayaraq, gənclərimizin fəallıq nümayiş etdirməsinin özü belə uğurdur: “Onu da deyim ki, gənclərin bu fəallığı heç də təsadüfi deyil. Çünki partiyamızın qurucusu Ümummilli lider Heydər Əliyevin əsasını qoyduğu gənclər siyasəti hazırda YAP Sədri, cənab Prezident İlham Əliyev tərəfindən davam etdirilir. Bundan əlavə, namizədliyi partiyamız tərəfindən irəli sürülmüş fəal gənclərimiz müxtəlif dövlət strukturlarında - nazirliklərdə, komitələrdə yüksək səviyyədə təmsil olunurlar. Odur ki, siz namizədlərə partiyamız tərəfindən böyük etimad göstərilib. Hesab edirəm ki, seçkilərin nəticələri də sizlər üçün uğurlu olacaq. Eyni zamanda, əgər hansı namizəd nisbətən az səs toplayacaqsa, o ruhdan düşməməlidir. Çünki bu, bir məktəbdir, sınaqdır. Bəri başdan bütün namizədləri, eləcə də seçkilərdə kim uğur qazanacaqsa, onları təbrik edir, uğurlar arzulayıram”.
Daha sonra çıxış edən bələdiyyə üzvlüyünə namizədlər - Vüsalə Niftəliyeva, Nərmin Qədirova, Müslüm Məmmədov və Əhməd Həsənov onlara göstərilən bu etimada görə partiyanın rəhbərliyinə minnətdarlıq ediblər, Çıxış edənlər onlara göstərilən bu etimadı doğrultmağa çalışacaqlarını bildiriblər.
Sonda, Nəsimi rayonunda 30 mindən artıq YAP üzvünün olduğunu diqqətə çatdıran Məlahət İbrahimqızı seçicilərin bələdiyyə seçkilərində Yeni Azərbaycan Partiyasından olan namizədlərə etimad göstərəcəklərinə əminliyini vurğulayıb.
Səlim LOĞMANOĞLU

Paylaş:

Baxılıb: 837 dəfə