Bələdiyyələrin əsas vəzifəsi xalqa xidmətdir

Bakı:

17 °C

63 %

10 m/s

Əlaqə

AZ RU EN

Ana səhifə / YAP xəbərləri / Bələdiyyələrin əsas vəzifəsi xalqa xidmətdir

Bələdiyyələrin əsas vəzifəsi xalqa xidmətdir

17.12.2009 [10:02]

YAP-ın nümayəndələri Nərimanov rayonu “Həsən Əliyev-98a” ünvanında seçicilərlə görüş keçiriblər
Bələdiyyə seçkiləri ilə əlaqədar təbliğat-təşviqat kampaniyası çərçivəsində dünən Yeni Azərbaycan Partiyasının nümayəndələri Nərimanov rayonu “Həsən Əliyev-98a” ünvanında seçicilərlə görüş keçiriblər. YAP Nərimanov rayon təşkilatının sədri, partiyanın bələdiyyə seçkilərində səlahiyyətli nümayəndəsi Təmraz Tağıyev bələdiyyə seçkilərinin ölkənin siyasi həyatında mühüm hadisə olduğunu bildirib. O, qeyd edib ki, yerli özünüidarəetmə institutu Azərbaycanda yeni formalaşıb: “ötən 10 il ərzində bələdiyyələr müəyyən təcrübə qazanıblar. Bununla belə, bu sahədə görüləsi işlər çoxdur. Bilirsiniz ki, dövlət başçısının həyata keçirdiyi siyasət nəticəsində ölkəmiz, xüsusilə regionlarımız inkişaf edir. Bu mənada, bələdiyyələr əhalinin sosial məsələlərinin həllində yaxından iştirak etməlidir”.
Səlahiyyətli nümayəndə qeyd edib ki, Nərimanov bələdiyyəsinə 19 üzv seçilməlidir. Təşkilat sədri YAP tərəfindən seçkilərdə qadınların və gənclərin namizədliyinə də üstünlük verildiyini deyib. özünün də bələdiyyə üzvlüyünə namizəd olduğunu bildirən T.Tağıyev budəfəki seçkilərdə YAP tərəfindən bələdiyyələrə ən layiqli namizədlərin irəli sürüldüyünü vurğulayıb: “YAP-ın bələdiyyə üzrə hər bir yerə namizədi var. İnanırıq ki, doğru seçim edib YAP-ın namizədlərinə səs verəcəksiniz. çünki partiyamızın fəaliyyətinin əsas qayəsi xalqa xidmət etməkdir. Təsadüfi deyil ki, biz bələdiyyə seçkilərinə “Xalqa xidmət naminə” şüarı ilə gedirik. Həmişə olduğu kimi, bu seçkilərdə də fəal olun və 23 dekabrda səsvermədə iştirak edin”.
YAP-ın bələdiyyə seçkilərində səlahiyyətli nümayəndəsi, millət vəkili Rafael Cəbrayılov vətəndaşları seçki hüququndan istifadə etməyə çağırıb. Onun sözlərinə görə, səsvermədə iştirak etməyənlərin seçkinin nəticəsinə şübhə etməyə haqqı yoxdur. Bələdiyyələrə dair mükəmməl qanunvericilik bazasının olduğunu deyən R.Cəbrayılov qeyd edib ki, bu institut əhalinin yerli problemlərinin həlli ilə məşğul olur. Səlahiyyətli nümayəndə bələdiyyələrin hər hansı orqanın deyil, yalnız vətəndaşların qarşısında cavabdeh olduğunu vurğulayıb. Ona görə də, insanlar bu hüquqlarından yetərincə istifadə etməlidirlər. Millət vəkili yerli özünüidarəetmə orqanlarının demokratik cəmiyyətin əsas atributlarından biri olduğunu bildirib.
Bələdiyyə seçkilərinin digər siyasi kampaniyalardan daha fərqli olduğunu deyən səlahiyyətli nümayəndənin sözlərinə görə, burada əsas amil yerlərdə insanlarla münasibətdə olan şəxslərin nüfuzu, şəxsi keyfiyyətləridir. Bələdiyyələrə seçilmiş şəxslər əlbəttə, yerli əhali ilə sıx münasibətlər qurmalı, problemlərin aradan qaldırılmasında böyük rol oynamalıdırlar.
Seçicilərdən Süleyman Mehdiyev Azərbaycanın sürətlə inkişaf etdiyini deyib. Onun sözlərinə görə, bu inkişaf prosesində bələdiyyələr də yaxından iştirak etməlidir. Seçici qeyd edib ki, bələdiyyə üzvü seçilən hər kəs öz məsuliyyətini bilməlidir.
YAP-ın Nərimanov bələdiyyəsinə digər namizədi İradə Qarayeva da seçiciləri bələdiyyə seçkilərində fəal iştirak etməyə çağırıb. Onun sözlərinə görə, seçicilərin səsvermədə iştirakı seçkilərin şəffaflığında mühüm rol oynayır. “Vətəni, dövləti sevirsinizsə, seçkilərdə fəal iştirak edin. Seçki hüququndan istifadə etməklə vətəndaşlıq mövqeyinizi bildirəcəksiniz. Bilirsiniz ki, Ulu öndər Heydər Əliyevin qurucusu olduğu YAP-ın məramı xalqa layiqli xidmət göstərməkdir. YAP-ın namizədlərinə səs verməklə siz onlardan layiqli xidmət görəcəksiniz” - deyə İ.Qarayeva bildirib. Bələdiyyələrin böyük səlahiyyətlərə malik olduğunu bildirən namizədin sözlərinə görə, hər bir seçicinin bələdiyyələrdən problemlərin həllini tələb etmək hüququ var. çünki bələdiyyələri xalq seçir.
Nardar BAYRAMLI

Paylaş:

Baxılıb: 1524 dəfə