YAP Ermənistan tərəfindən Gəncədə törədilən terror aktı ilə əlaqədar 50-dən çox siyasi partiyaya və beynəlxalq təşkilatlara müraciət ünvanlayıb

Bakı:

11 °C

71 %

7 m/s

AZ RU EN

Ana səhifə / YAP xəbərləri / YAP Ermənistan tərəfindən Gəncədə törədilən terror aktı ilə əlaqədar 50-dən çox siyasi partiyaya və beynəlxalq təşkilatlara müraciət ünvanlayıb

YAP Ermənistan tərəfindən Gəncədə törədilən terror aktı ilə əlaqədar 50-dən çox siyasi partiyaya və beynəlxalq təşkilatlara müraciət ünvanlayıb

20.10.2020 [09:54]

Yeni Azərbaycan Partiyası işğalçı erməni silahlı qüvvələri tərəfindən Gəncə şəhərində törədilən terror aktı ilə əlaqədar Avropa Xalqları Partiyasına, Mərkəzçi Demokrat İnternasionalına, Asiya Siyasi Partiyaları Beynəlxalq Konfransına, İslam Əməkdaşlıq Təşkilatına, Avronest Parlament Assambleyasına, Milli Demokratiya İnstitutuna, İqtisadi Əməkdaşlıq Təşkilatına, Ərəb Dövlətləri Liqasına, İslam Dünyası Təhsil, Elm və Mədəniyyət Təşkilatına, Türkiyə Ədalət və İnkişaf Partiyasına, “Yedinaya Rossiya” Partiyasına, Çin Kommunist Partiyasına, Yaponiya Liberal-Demokrat Partiyasına və ümumilikdə 50-dən çox siyasi partiyalara və beynəlxalq təşkilatlara müraciət ünvanlayıb.
YAP-ın mətbuat xidmətindən AZƏRTAC-a bildiriblər ki, müraciətdə bildirilir: “Məlumdur ki, 2020-ci il sentyabrın 27-də səhər saat 06-dan etibarən Ermənistanın hərbi qüvvələri 1994-cü ildən qüvvədə olan atəşkəs razılaşmasını kobud şəkildə pozaraq genişmiqyaslı hərbi əməliyyatlara başlamış, bütün təmas xətti boyunca Azərbaycanın mülki obyektlərini iriçaplı silahlardan və ballistik raketlərdən atəşə tutub. Sentyabrın 27-dən oktyabrın 17-dək Ermənistanın silahlı qüvvələri döyüş bölgələrindən kənarda yerləşən Gəncə və Mingəçevir şəhərlərini, Abşeron, Xızı, Bərdə, Beyləqan, Ağcabədi, Goranboy, Göygöl, Tərtər, Yevlax, Horadiz yaşayış məntəqələrini atəşə tutaraq qadın və uşaqlar daxil olmaqla, 70-ə qədər mülki şəxsi qətlə yetirib, 200-dən çox mülki şəxsi yaralayıblar. Yaralananlar içərisində qadın və uşağın olması diqqət çəkir. Bu hücumlar nəticəsində minlərlə şəxsi evə, eləcə də sosial infrastruktur obyektlərinə və yaşayış binasına ciddi zərər dəyib. Bundan əlavə, işğalçı Ermənistanın hərbi qüvvələri bölgə üçün böyük enerji və irriqasiya əhəmiyyəti daşıyan Mingəçevir Su Elektrik Stansiyasını, Avropanın enerji təhlükəsizliyinin əsasını təşkil edən və regionun iri strateji obyektləri sayılan Bakı-Tbilisi-Ərzurum qaz və Bakı-Tbilisi-Ceyhan neft boru xətlərini hədəf kimi seçərək raket hücumu həyata keçirib. Qeyd olunan şəhərlərə və digər yaşayış məntəqələrinə qarşı qadağan olunmuş “9N235”, həmçinin “M85” bombalarından və “Kaset Sursatlar haqqında” Konvensiyaya (CCM) uyğun olaraq 2008-ci ildə qadağan olunmuş sursatlardan istifadə edib.
Eyni zamanda, Ermənistan hərbi-siyasi hakimiyyəti tərəfindən Azərbaycanın işğal olunmuş ərazilərinə digər ölkələrdən muzdlu terrorçular gətirilərək dinc azərbaycanlı əhaliyə qarşı istifadə olunub. Onlar beynəlxalq humanitar hüququn ən elementar normalarına məhəl qoymayaraq, Azərbaycanın üzərində ağ bayraq qaldırılan tibbi maşınlarını atəşə tutub.
Yeni Azərbaycan Partiyası hesab edir ki, tərəfləri daim atəşkəsə çağıran beynəlxalq ictimaiyyət Ermənistanın beynəlxalq hüquqa və humanitar atəşkəs prinsiplərinə zidd olan bu əməllərinə münasibət bildirməlidir. Humanitar atəşkəs rejiminin qüvvəyə minməsindən cəmi bir neçə saat sonra Gəncə, Mingəçevir və digər yaşayış məntəqələrimizin hədəfə alınması, eləcə də Azərbaycan Silahlı Qüvvələrinə qarşı son hücumlar Ermənistanın beynəlxalq ictimaiyyətə hörmətsizliyinin, eləcə də bu ölkə rəhbərliyinin atəşkəs çağırışlarının riyakarlıqdan başqa bir şey olmadığının göstəricisidir.
Ona görə də Yeni Azərbaycan Partiyası olaraq beynəlxalq qurumları, o cümlədən tərəfdaş siyasi partiyaları və beynəlxalq siyasi partiya təşkilatlarını Ermənistanın humanitar atəşkəsi pozan əməllərini və dinc əhaliyə qarşı hücumlarını qəti şəkildə pisləməyə çağırırıq”.

Paylaş:

Baxılıb: 596 dəfə