Azərbaycanın uğurlu inkişafının memarı Ulu Öndər Heydər Əliyevdir

Bakı:

21 °C

60 %

5 m/s

Əlaqə

AZ RU EN

Ana səhifə / YAP xəbərləri / Azərbaycanın uğurlu inkişafının memarı Ulu Öndər Heydər Əliyevdir

Azərbaycanın uğurlu inkişafının memarı Ulu Öndər Heydər Əliyevdir

30.11.2022 [11:57]

Ümummilli Lider Heydər Əliyevin Azərbaycan tarixində rolu, həlledici olmaqla bərabər, çoxcəhətli və çoxşaxəli xarakteri ilə xüsusi əhəmiyyətə malikdir. Ölkəyə rəhbərlik etdiyi bütün müddət ərzində cəmiyyətin və dövlətin həyatında onun fəaliyyət dairəsindən və diqqət mərkəzindən kənarda qalan hər hansı bir əhəmiyyətli məsələ olmamışdır.

Azərbaycanın milli müstəqilliyinin bərpası yanlız iqtisadi böhranla deyil, eyni zamanda, hərbi müdaxilə, torpaqlarımızın işğalı, daxili siyasi hərc-mərclik, keçid dövrünün özünəməxsus problemləri ilə müşayiət olunurdu. Belə şəraitdə ölkəmizin qazandığı uğurlar, məhz Ümummilli Lider Heydər Əliyevin rəhbərliyi və gərgin əməyi sayəsində mümkün olmuşdur.

1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev ilk günlərdən Azərbaycanın xarici siyasətini yeniləşdirdi və ölkənin strateji maraqları əsasında yenidən qurdu. Ulu Öndər, ilk növbədə keçmiş hakimiyyətin xarici siyasət sahəsində buraxdığı kobud səhvləri və bunun nəticəsində Azərbaycan ətrafında formalaşmış çox gərgin beynəlxalq siyasi vəziyyəti aradan qaldırmaq istiqamətində iş aparmağa, ölkənin strateji maraqlarını region dövlətlərinin və Qafqazda xüsusi təsiri olan ayrı-ayrı dövlətlərin maraqları ilə uzlaşdırmağa yönəlmiş siyasət yürütməyə başladı.

Heydər Əliyev Azərbaycanın dövlətçilik mənafelərini hər şeydən uca tutaraq müxtəlif dövlətlərin respublikamız üzərində qurulmuş iqtisadi maraq və nüfuz dairəsi uğrunda mübarizələrini nəzərə alaraq, çevik manevrlər və xüsusi taktiki gedişlər etdi.

Azərbaycanın sosial-iqtisadi sahələrdə qazandığı uğurlar Ulu Öndərin ideyalarının, arzu və istəklərinin tamamilə reallaşacağını təsdiq edir. İstiqamətləri Ümummilli Lider Heydər Əliyev tərəfindən müəyyənləşdirilmiş bütün konsepsiyalar dövlətçilik və milli maraqların təmini üçün uğurla davam etdirilir. Azərbaycan inkişaf yolunu dünya iqtisadiyyatının inkişaf meyillərinə uyğun qursa da, respublikamızın milli iqtisadi inkişaf modeli heç bir dövləti təkrarlamır.

Bu gün Azərbaycan dünya miqyasında geostrateji əhəmiyyətə malik olan əlverişli coğrafi mövqeyindən, zəngin təbii ehtiyatlarından və böyük potensialından istifadə edərək, Avropa ilə Asiya arasında körpü rolunu səmərəli surətdə həyata keçirir.

Azərbaycanın inkişafı dinamik və çoxşaxəlidir. Dövlət bu inkişafın təmin olunması üçün üzərinə düşən bütün vəzifələri tam yerinə yetirir.

Əsası Ulu Öndərimiz Heydər Əliyev tərəfindən qoyulmuş Azərbaycanda siyasi və iqtisadi islahatların keçirilməsi hesabına qazanılan böyük uğurlar hər bir azərbaycanlıda fərəh hissi doğurur.

Rövşən Əhmədov

YAP Ağcabədi rayon təşkilatının sədri.

Paylaş:

Baxılıb: 418 dəfə