Zəngəzur dəhlizi Azərbaycanın Türk dünyası ilə əlaqələrini daha da gücləndirəcək

Bakı:

25 °C

69 %

4 m/s

Əlaqə

AZ RU EN

Ana səhifə / YAP xəbərləri / Zəngəzur dəhlizi Azərbaycanın Türk dünyası ilə əlaqələrini daha da gücləndirəcək

Zəngəzur dəhlizi Azərbaycanın Türk dünyası ilə əlaqələrini daha da gücləndirəcək

16.12.2022 [11:48]

Azərbaycanın Mərkəzi Asiya ölkələri ilə əlaqələrində dinamizm müşahidə olunur. Bu prosesdə dünyada formalaşan yeni və daha fərqli tranzit, nəqliyyat-kommunikasiya şəbəkəsi mühüm rol oynayır. Ölkəmiz isə geostrateji mövqeyi və daha da genişlənən tranzit imkanları ilə bu prosesdə vacib həlqəyə, Şərqlə Qərb arasında etibarlı nəqliyyat qovşağına çevrilməkdədir.

Azərbaycanın xarici siyasətində əsas prioritet istiqamətlərdən biri türk dövlətləri ilə münasibətlərin daha da yaxşılaşdırılması təşkil edir. Son illərdə Azərbaycan, Türkiyə və Türkmənistan əlaqələrinin inkişafında və münasibətlərin daha da dərinləşməsində dövlət başçılarının qarşılıqlı səfərləri, keçirilən görüşlər xüsusilə böyük əhəmiyyət kəsb etmişdir. Hazırda ölkələrimizi birləşdirən amillər çoxdur. Ən əsası ortaq tarixi keçmiş və milli-mənəvi dəyərlər, dostluq, qardaşlıq və strateji tərəfdaşlıq münasibətlərimizdir. Tarixi bağlar üzərində qurulmuş münasibətlərimiz ölkələrimiz arasında iqtisadiyyat, ticarət, nəqliyyat-logistika və digər sahələrdə əməkdaşlığın inkişafı üçün imkanlar yaradır.

Cari ilin dekabr ayının 14-də Türkmənistanda ilk dəfə olaraq 3 qardaş ölkə - Azərbaycan, Türkiyə və Türkmənistan prezidentlərinin Birinci Zirvə Görüşü keçirildi. Görüş çərçivəsində qardaş ölkələr arasında yeni qlobal miqyaslı enerji və nəqliyyat layihələri ilə bağlı müzakirələr keçirilib. Keçirilən görüşdə liderlərin imzaladıqları mühüm sənədlər onu göstərdi ki, əldə edilən razılıqlar yüksək səviyyədə olan əlaqələrin daha da inkişafına və qarşılıqlı maraq doğuran sahələrdə əməkdaşlığın bundan sonra da gücləndirilməsinə mühüm töhfələr verəcək.

Nəqliyyat-logistika sektorunun inkişafı Azərbaycanla yanaşı qardaş türk dövlətləri üçün də böyük əhəmiyyət kəsb edir. Strateji əhəmiyyətə malik regionda, şimal-cənub, şərq-qərb nəqliyyat dəhlizlərinin qovşağında yerləşən Azərbaycanda bu sahənin inkişafı dövlətimiz üçün hər zaman önəmli olub. Son illər ölkəmiz bu sahədə görülmüş işlərin məntiqi nəticəsi olaraq region üçün mühüm logistika mərkəzinə çevrilmişdir.

Dünyada cərəyan edən son hadisələr fonunda Azərbaycanın da üzərində yerləşdiyi Orta Dəhlizin əhəmiyyəti artmaqdadır. Azərbaycan Prezidentinin uzaqgörən siyasətinin nəticəsi olaraq ölkəmizdə bir sıra mühüm nəqliyyat-logistika infrastrukturu yaradılıb və ölkəmiz beynəlxalq nəqliyyat şəbəkələrinə inteqrasiya olunub. Azərbaycan həyata keçirdiyi irimiqyaslı infrastruktur layihələri vasitəsilə əlverişli regional tranzit mərkəzinə çevrilməkdədir.

Zəngəzur dəhlizi Azərbaycanın Türkiyə ilə əlaqələrini gücləndirəcək, ölkəmizin geoiqtisadi əhəmiyyətini daha da artıracaq. Ən əsası türk dünyası uzun illərdən sonra yenidən Zəngəzur dəhlizi vasitəsilə birləşəcək. Zəngəzur dəhlizi yalnız Şərqi Zəngəzur və Qafqaz üçün deyil, daha geniş mənada region üçün strateji əhəmiyyətə malikdir.

Cənab Prezident İlham Əliyev Zirvə Görüşündə bildirmişdir ki, Zəngəzur dəhlizinin Azərbaycan ərazisindən keçən hissəsində aparılan işlərin dəmir yolu xətti üzrə 40 faizi, avtomobil yolu üzrə 70 faizi icra olunub. Bütün işlər 2024-cü ildə tamamlanacaq və nəticədə yeni nəqliyyat dəhlizi yaranacaq.

Bütün bunlar onu göstərir ki, Cənubi Qafqazda gerçəkləşən proseslərə Azərbaycan nəzarət edir. Eyni zamanda ölkəmiz Avropa ilə Asiyanı birləşdirən nəqliyyat kommunikasiya sisteminin mərkəzinə çevrilir. Yaxın zamanda işə düşəcək Zəngəzur dəhlizi isə bunun əyani təzahürü olacaq.

Varis Rüstəmov,

YAP Sabirabad rayon təşkilatının sədri

Paylaş:

Baxılıb: 527 dəfə