Parlaq Zəfərin üçüncü ildönümü

Bakı:

16 °C

88 %

5 m/s

Əlaqə

AZ RU EN

Ana səhifə / YAP xəbərləri / Parlaq Zəfərin üçüncü ildönümü

Parlaq Zəfərin üçüncü ildönümü

03.11.2023 [14:48]

Məlum olduğu kimi 27 sentyabr 2020-ci ildə başlanmış və cəmi 44 gün davam edən Vətən müharibəsində Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusu işğalçı ölkə Ermənistanın ordusunu darmadağın edərək, 30 il işğal altında olan torpaqlarımızı düşmən tapdağından azad etdi.

Noyabrın 8-də Şuşanın işğaldan azad olunması ilə diz çökən Ermənistan ordusu məğlub olduğunu qəbul etdi. Müzəffər Ali Baş Komandan, Prezident İlham Əliyevin rəhbərliyi altında, hər gün yeni-yeni kənd və şəhərləri işğaldan azad edən Rəşadətli Azərbaycan Ordusunun gücü qarşısında tab gətirə bilməyən Ermənistan noyabrın 10-da kapitulyasiya aktına imza atmalı oldu.

Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın şanlı qələbəsinin şahidi oldu. Azərbaycan Ordusu öz qəhrəmanlığı və peşəkarlığı ilə təkcə Ermənistanın silahlı qüvvələrini məhv etməyib, o, Erməni mifini də məhv etdi. Cəmi 44 gün ərzində Ermənistan ordusu, hərbi texnikası, canlı qüvvəsi məhv edildi və Azərbaycan öz gücünü, öz qüdrətini göstərdi.

Azərbaycan, Rusiya prezidentlərinin və Ermənistanın baş nazirinin 2020-ci il noyabrın 10-da imzaladıqları birgə Bəyanata əsasən, Ağdam, Kəlbəcər və Laçın rayonları azad olunmalı, məcburi köçkünlərin öz doğma yurdlarına qayıtmaları təmin edilməli idi. 20 noyabr – Ağdam, 25 noyabr - Kəlbəcər və 1 dekabr – Laçın şəhəri bir güllə atmadan, şəhid vermədən işğaldan azad edildi və hər üç rayon Azərbaycan Ordusunun nəzarəti altına keçdi. Bu, Azərbaycanın əldə etdiyi ən böyük diplomatik uğurlardan biri kimi tariximizə yazıldı.

Qarabağda qalan qanunsuz erməni silahlı birləşmələri təxribatlarından qalmır, terror aktları törədir, bunun nəticəsi olaraq mülkü vətəndaşlarımız həlak olurdu. Bütün bunlar vadar etdi ki, Azərbaycan antiterror əməliyyatı həyata keçirsin və qanunsuz silahlı dəstələri zərərsizləşdirsin. Cari ilin sentyabrında birgünlük lokal xarakterli antiterror tədbirləri həyata keçirildi, düşmənin qanunsuz silahlı dəstələri məhv edildi. Nəticədə ərazi bütövlüyümüz və suverenliyimiz tam bərpa olundu.

15 oktyabr 2023-cü ildə Dövlətimzin başçısı Xankəndidə Azərbaycanın Dövlət Bayrağını ucaltdı. Bu gün qürür və fəxrlə deyirik ki, artıq ölkəmizin hər bir guşəsində Üçrəngli Bayrağımız dalğalanır. Bütün bunlar bir daha təsdiq etdi ki, Prezident İlham Əliyev heç vaxt başladığı işləri yarımçıq qoymayan,verdiyi vədləri yerinə yetirən və bütün fəaliyyəti boyunca nəyi, nə zaman və necə etməyi çox yaxşı bilən Liderdir. Azad edilmiş ərazilərə səfərləri ilə Prezident İlham Əliyev öz sevincini xalqı ilə bölüşməklə yanaşı, həmin əraziləri tez bir zamanda bərpa etmək, dirçəltmək əzmində olduğunu əyani nümayiş etdirmişdir. Azad edilmiş şəhərlərimizdə, kəndlərimizdə artıq geniş inşaat işləri gedir.

8 noyabrda Azərbaycanın Qarabağda qazandığı böyük Qələbənin üçüncü ildönümü - Zəfər Günü qeyd olunacaq. Bu il isə birinci il olacaq ki, Zəfər Gününü Xankəndində, Xocalıda, Xocavənddə də qeyd edəcəyik.

Sahib Şükürov

Yeni Azərbaycan Partiyası Göyçay rayon təşkilatının sədri

Paylaş:

Baxılıb: 588 dəfə