Azərbaycanın siyasi tarixində mühüm dönüş nöqtəsinə çevrilən tarixi hadisə baş verdi. 34 il öncə, Ulu Öndər Heydər Əliyevin rəhbərliyi ilə Yeni Azərbaycan Partiyasının əsası qoyuldu və ölkənin ictimai-siyasi həyatında yeni siyasi mərhələnin təməli formalaşdı. 1992-ci il noyabrın 21-i bu baxımdan tariximizin əlamətdar günlərindən biri kimi yadda qaldı.
Yeni Azərbaycan Partiyasının yaradılması Azərbaycanın müasir siyasi tarixində mühüm əhəmiyyət daşıyan hadisələrdən biri kimi yadda qalmışdır. Həmin dövrdə müstəqilliyini yenicə bərpa etmiş Azərbaycan olduqca mürəkkəb siyasi, iqtisadi və hərbi vəziyyətlə üz-üzə qalmışdı. Dövlət müstəqilliyinin ilk illərində ölkədə hökm sürən qeyri-sabitlik, siyasi qarşıdurmalar, idarəçilikdəki böhran və Ermənistanın hərbi təcavüzü xalqın həyatında ciddi çətinliklər yaratmışdı. Belə bir şəraitdə cəmiyyət ölkəni düşdüyü ağır vəziyyətdən çıxara biləcək, dövlətçiliyin qorunmasını və gələcək inkişafını təmin edəcək güclü siyasi liderə ehtiyac duyurdu.
Məhz bu səbəbdən Azərbaycanın ziyalıları, tanınmış ictimai-siyasi xadimləri və vətənpərvər insanları öz ümidlərini Ulu Öndər Heydər Əliyevin zəngin dövlətçilik təcrübəsi, siyasi uzaqgörənliyi və qətiyyətli rəhbərliyi ilə bağladılar. Onlar Ümummilli Liderə müraciət edərək ölkənin gələcəyinə görə məsuliyyəti üzərinə götürməsini və yeni siyasi qüvvənin formalaşmasına rəhbərlik etməsini xahiş etdilər. Tarixə “91-lər”in müraciəti kimi düşən bu çağırış xalqın dəyişiklik istəyini, Heydər Əliyevə olan inamını və Azərbaycanın gələcəyinə dair gözləntilərini ifadə edirdi.
Ulu Öndər Heydər Əliyev xalqın müraciətinə biganə qalmayaraq bu təşəbbüsə müsbət münasibət bildirdi. Bunun nəticəsi olaraq 1992-ci il noyabrın 21-də Naxçıvan şəhərində Yeni Azərbaycan Partiyasının təsis konfransı keçirildi. Azərbaycanın müxtəlif bölgələrini təmsil edən 500-dən artıq nümayəndənin iştirak etdiyi konfransda partiyanın yaradılması haqqında tarixi qərar qəbul olundu və Ulu Öndər Heydər Əliyev yekdilliklə partiyanın sədri seçildi. Bu hadisə ölkənin siyasi həyatında yeni mərhələnin başlanğıcını qoymaqla yanaşı, xalqın gələcəyə olan inamını da gücləndirdi.
Ulu Öndər Heydər Əliyevin yaratdığı və zəngin siyasi irsini bizə miras qoyduğu Yeni Azərbaycan Partiyası bu gün Azərbaycan Respublikasının Prezidenti, Partiyanın Sədri cənab İlham Əliyevin rəhbərliyi ilə öz inkişafının yeni mərhələsini yaşayır. Dövlət başçısının uzaqgörən siyasəti, qətiyyətli rəhbərliyi və müasir çağırışlara uyğun müəyyənləşdirdiyi strateji hədəflər həm ölkəmizin, həm də partiyamızın nüfuzunun daha da yüksəlməsinə, qarşıya qoyulan məqsədlərin uğurla həyata keçirilməsinə xidmət edir. 2026-cı il oktyabrın 2-də keçirilən YAP-ın VIII Qurultayı isə Azərbaycanın ərazi bütövlüyü və dövlət suverenliyi tam bərpa edildikdən sonra baş tutan ilk qurultay kimi xüsusi tarixi əhəmiyyət daşıyır. Qurultayda qarşıdakı dövrün əsas vəzifələri müəyyənləşdirilmiş, partiyanın gələcək fəaliyyət istiqamətləri və yeni strateji hədəfləri bir daha təsdiq olunmuşdur.
Eyni zamanda, Yeni Azərbaycan Partiyasının sıraları ildən-ilə genişlənir, partiyaya qoşulan vətəndaşların, xüsusilə gənclərin sayı davamlı olaraq artır. Bu, həyata keçirilən siyasətə, partiyanın müəyyən etdiyi inkişaf strategiyasına və onun gələcək hədəflərinə göstərilən yüksək etimadın bariz nümunəsidir. Partiyanın dövlət qurumları, ictimai təşkilatlar və müxtəlif sosial qruplarla əməkdaşlığı da getdikcə genişlənir, birgə təşəbbüslər və layihələr yeni məzmun qazanır. Bütün bunlar Yeni Azərbaycan Partiyasının cəmiyyətdəki mövqeyinin daha da möhkəmlənməsinə, milli həmrəyliyin güclənməsinə və ölkəmizin inkişafına verdiyi töhfələrin artmasına xidmət edir.
Şövqi Həsənov,
YAP Şəmkir rayon təşkilatı Aparatının əməkdaşı